LUKE 1 - NYƐʔƐLƐ LI KÀYORO

Kayoʔo ki hlihaʔa

¹ Mí bi ki sɛbɛ ŋa troʔo wa mo Teofile ma ŋa na lagwɔkmaa we. Yé maʔa cɛn mà yo hɛɛn fafaʔabaa dá pè kpanŋi mà kaʔa gee nyoŋo ke dá hanri naʔa wò nulala ni le.

² Ki woo pe da ke nyoŋó mà yala kayoro da nì wo dá da bee ma pe dá ki kaʔa nya ge mà kpe ke hlinyiŋi na, á pe krɛʔɛ ti yofɛɛlɛ ge.

³ Mì fanna, paʔa gâ bo mí ma hɛɛn yugu be kmaʔa mà kpe nyiŋi fafaʔa na ki kaʔa kè bɛfu ní, à mi naʔa honri bì ke hanri bì ke nyoŋo má kan nigbe nigbe,

⁴ jango pé ma ma krɛʔɛ kaʔa gee ní ma gbàn ma ke kanyɛmɛ cɛn me kmaʔa.

Mlɛŋɛ wí ma klu mà Jan wi heme kayoʔo yo

⁵ Nyiŋi ga na Erɔde, wi dá bo Jude klo fɔlɔ ge, sraʔá farafɔlɔ wà dà bo wa, à pe noo yeri Sakari. Wi dá bo sraʔá farafɛɛ klɛnmɛ woo wà, ma pé na yeri Abya womo ge. Wi cɔ fanna, wɔ̀ɔ po Aaron ŋa kluʔu woo wi dá bo sraʔá farafɔlɔ kpangbanŋa ge. À pe noo yeri Elisabɛti.

⁶ Pe syɛnmu pe dá bo sinbee Nyɛʔɛlɛ li yɛʔɛ̀ na mà na wò fɔlɔ wi kayoro kloʔó kì bɛfu tanri klomo fun.

⁷ Pyɔ ìn dà bo pé ma. Mɛjɛn Elisabɛti wi dá bo cɛbahe. Pe syɛnmu fanna, pe dá bo pé ma lɛ kɔ ceŋge.

⁸ Wlɛʔɛ kà na, Sakari wɔ̀ɔ báa wi sraʔá frama tunŋu ko Nyɛʔɛlɛ li yɛʔɛ̀ na wi klɛnmɛ mi tunŋu kɔnyiŋi na ge.

⁹ Bì yala sraʔá farafɛɛ pe kalɛʔɛ nì ge, pe dá nyaʔala le mà Sakari fara wi je wa wò fɔlɔ wi sràʔá go lama ni me, wi ya nudanʔa ca hogo wa.

¹⁰ Ki nudanʔa ca hogonyiŋi na ge, janma mì bɛfu mi dá bo wa dala na na Nyɛʔɛlɛ nyɛri le.

¹¹ Ki nyiŋi na, wò fɔlɔ wi mlɛŋɛ à wà ma bâ wì tyɛʔɛ Sakari na we afanʔa ga kaligi na pé na nudanʔa ca hogo ge.

¹² Sakari wi gɔ́ɔ̀ nya, wi lama à mi wlele wí na. Fyara à tuu co.

¹³ Di mlɛŋɛ wɔ̀ɔ wí po: «Sakari, mò gáa fyaʔa. Nyɛʔɛlɛ lí ma ma nyɛrimi syɔ me. Ma cɔ Elisabɛti wí bi ba pyɔ wà he má ma, wi po nabii. Ma dɔɔ yeri Jan.

¹⁴ Má bi ba lafiʔigbɔmo ta, à hɛɛn fafaʔabaa bí ba bo lafiʔimi nì kpo wi henyiŋi na ge.

¹⁵ Wí bi ba bo hɛnkpangbanŋa wò fɔlɔ wi yɛʔɛ̀ na ge. Wò gá baa dufɛn jo ní yraʔa ga nì hɛn wí bi gban bí jɔ kí da wi yɛʔɛ̀ wo wì na ge. Ali mà kpe wi henyiŋi na ge, Nyɛʔɛlɛ li Nyìli lí bi bɔɔ nyi.

¹⁶ Wí bi ba Israyɛli hɛɛn fafaʔa kan pe yɛʔɛ̀ kan wò fɔlɔ ma we, ŋa pe Nyɛʔɛlɛ le.

¹⁷ Ee, wí bi ba glu Nyɛʔɛlɛ li yɛʔɛ̀ ma li leyoo Eli wi lama ní wi fanŋa pomo ní me, bì tanma le wa tee ní pii ní pe kpafoʔo ni ge. Wí bi ba lecee pe lama krɛʔɛ me bì pe kân pe hɛnsinbee ticlimi ta, jango hɛɛn tyɛnʔɛ gee ke kondó má yaʔa wi ke syɔ wò fɔlɔ kan we.»

¹⁸ Sakari wɔ̀ɔ mlɛŋɛ po we: «Mí biʔi po mɛlɛ bí ki woʔo ga cɛn ge? Mɛjɛn mì we mí ma lɛ ceŋge. Na cɔ fanna, wɔ̀ɔ lɛ ban kpo.»

¹⁹ Mlɛŋɛ wɔ̀ɔ wí po: «Mì wi Gabriyɛli we. Mí na kori wa Nyɛʔɛlɛ tanla le mà na li tunŋu ko ge. Liì li lí ma na tun má ma ge mà yo bì ba ki kayotanʔa yo mà ma.

²⁰ Ɛɛn di, mɛ ìn ba na kayoro na, da tí bi ba funŋu ti funŋunyiŋi na ge. Ki kala na, má bi grɛʔɛ bobo. Mɛ ìn bi da gbanni bì da nyu adi, fɔ bì ba no ki kaʔa gee ke hanriwlɛʔɛ na ge.»

²¹ Ki nyiŋi na, hɛɛn pe dáa Sakari hanni we. Pɔɔ da gáa mori wa Nyɛʔɛlɛ li sràʔá go lama ni me, àʔa pé fo ceŋge.

²² Wi nyininyiŋi na ge, wi ìn dà gban bì yo pé ni. À peʔe cɛn mà yo wí ma yraʔa kà nya wa Nyɛʔɛlɛ li sràʔá go lama ni me nɛbo ŋloʔo gi. Wɔ̀ɔ ko wi boboro ni de mà na kaʔa teri ge pé na jɛnlɛ ní.

²³ Wi tunŋu kɔwlɛrɛ ti gâ funŋu kɔ ge, wɔ̀ɔ kɛri wi kàʔà ni ge.

²⁴ Ki kruʔu ma, wi cɔ Elisabɛti wɔ̀ɔ acɛnlɛ ta mà ko go nî fɔ mà ta yere kɔgunnu.

²⁵ Elisabɛti wɔ̀ɔ yo: Kanyɛmɛ na, wò fɔlɔ wí ma na haʔa. Wɔ̀ɔ nyugara ta ná na mà fɛrɛ laʔa ná na hɛɛn pe yɛʔɛ̀ na ge.

Jesu wi heme kayoʔo

²⁶ Elisabɛti wi acɛnlɛ li yere noli woʔo na ge. Nyɛʔɛlɛ à li mlɛŋɛ ŋa tun pé na yeri Gabriyɛli we wa Galile klo kàʔà kà ni ga pé na yeri Nasarɛti ge.

²⁷ Li dɔɔ́ tun picɛpii wà ma ŋa pé na yeri Mari we. Najɛpii wà dɔ̀ɔ co wi ba bo wi cɔ. Wɔ̀ɔ po masa naŋa Dafide wi kluʔu pyɔ. À pe noo yeri Josɛfu.

²⁸ Mlɛŋɛ wɔ̀ɔ yâ je wa deʔe ga na picɛpii wi dá bo ge mòo po: «Mí ma ma syeri mo ŋa Nyɛʔɛlɛ lí ma haʔa ceŋge ge. Wò fɔlɔ wí nyɛ má ni.»

²⁹ Mari wi lama à mi wlele wí na ceŋge ki kayoʔo ga ki kala na le. Wɔ̀ɔ naʔa honri wa wi lama ni me mà yo: Ki syeriʔi ga ki kɔ̀rɔ́ wí nyɛ nyaʔa ní si.

³⁰ Di mlɛŋɛ wɔ̀ɔ wí po: «Mari, mò gáa fyaʔa. Nyɛʔɛlɛ li haʔama mí nyɛ má ni.

³¹ Wele, má bi ba acɛnlɛ ta bì ba pyɔ he wi po naŋa. Ma baa wi yeri Jesu.

³² Wí bi ba bo hɛnkpangbanŋa. Pé bi baa wi yeri Nyɛgbɔfiʔi Pyɔ. Ee, wò fɔlɔ Nyɛʔɛlɛ lí bi bɔɔ tɛnŋɛ wi po klo fɔlɔ nɛ pa wi tokpɔ Dafide nyɛ we.

³³ Wí bi baa Israyɛli hɛɛn sinni be nyiŋi kì bɛfu na. Wi klo fɛrɛ ti ìn bi gà gɔ fyeu.»

³⁴ Mari wɔ̀ɔ mlɛŋɛ po we: «Ki woʔo ga paʔa gban bì hanri mɛlɛ? Mɛjɛn mí nyɛ pomo ma na, mi ìn jé naŋa kala cɛn kpɛn.»

³⁵ Mlɛŋɛ wɔ̀ɔ Mari po we: «Nyɛʔɛlɛ li Nyìli lí bi ba drigi ma na. Nyɛgbɔfiʔi ki fanŋa paʔa dòn má na nɛbo faʔa gi. Ki kala na, pyɔ ŋa ma bi ba he ge pé bi baa wi yeri Kmaa bì nì bì dɔɔ yeri Nyɛʔɛlɛ Pyɔ.

³⁶ Wele, Elisabɛti fanna, ŋa ma heme woo we, wí nyɛ acɛnlɛ nì wi lagwɔmo mì bɛfu ní. Ee, wiì ŋa pe dáa yeri cɛbahe we, ki yege ga kí nyɛ noliwoʔo gi, áʔa po wí nyɛ ki acɛnlɛ nì le.

³⁷ Mɛjɛn Nyɛʔɛlɛ lí na gbanni na yraʔa kì bɛfu hanri.»

³⁸ Mari wɔ̀ɔ yo: «Mí nyɛ wò fɔlɔ wi ŋkojɔ. Ki hanri ná na nɛ pa má maʔa yo ge.» Mlɛŋɛ wɔ̀ɔ jɛ be wì tanla mà kɛri.

Mari wí ma kɛri Elisabɛti krugu

³⁹ Ki kruʔu ma ge, Mari wɔ̀ɔ bâ jɛ mà fyala mà kɛri wa Jude klo kàʔà kà ni angoro deʔe na ge,

⁴⁰ mà yâ je wa Sakari go nî ge mà Elisabɛti syeri we.

⁴¹ Nyiŋi ga na Elisabɛti wi gâ Mari wi syeriʔi loʔo ge, pyɔ wɔ̀ɔ kpoʔoro wa wi lama ni me, Elisabɛti wɔ̀ɔ nyí Nyɛʔɛlɛ li Nyìli ní le,

⁴² mà taʔara mà yo: «Má nyɛ frɛmɛ ní mà toro cɛɛ pè bɛfu na. Pyɔ ŋa má bi ba he ge, wí nyɛ frɛmɛ ní kpo.

⁴³ Han wi ná ni fɔ na fɔlɔ wi no wí da ban nà krugu ge?

⁴⁴ Mɛjɛn nyiŋi ga na mí ma ma syeriʔi loʔo ge, ki nyidege na, pyɔ wɔ̀ɔ kpoʔoro wa na lama ni me lafiʔimi kala na le.

⁴⁵ Mo ŋa má ma paʔa na mâ yo ga wò fɔlɔ wí ma yo má kan, kí bi ba funŋu ge, má nyɛ frɛmɛ ní.»

Mari wi ŋuʔu

⁴⁶ Mari wɔ̀ɔ yo: «Na lama mí na wò fɔlɔ kpɔʔɔ we.

⁴⁷ Na nyìli lí nyɛ lafiʔigbɔmo nì na Syɔfɔlɔ Nyɛʔɛlɛ li kala na le.

⁴⁸ Mɛjɛn mì ŋa li ŋkojɔ we. Lí ma na kɔrɔsi na crɛmɛ nyiŋi na ge. Ee, mà kpe alaʔa na fɔ bì ba no nyiŋi kì bɛfu hɛɛn na, pé bi daʔa nyu bì yo mí nyɛ frɛmɛ ní,

⁴⁹ mɛjɛn sye wì bɛfu fɔlɔ wí ma kakpɔʔɔ̀ hanri ná kan. Wi yele lí nyɛ kmala ceŋge.

⁵⁰ Wí na nyugara taʔa nyiŋi kì bɛfu na bee na pé noo kpɔʔɔ ge.

⁵¹ Wi kyɛʔɛ fangbɔʔɔ nî, wí ma hɛɛn bee craʔa pé na pè kpɔʔɔ wa pe lama ni me.

⁵² Wí ma klòʔo fɛɛ jrɛʔɛ be wa pe klo fɛrɛ aconro na de. Di bee pé na pè cɛrɛ ge, wɔ̀ɔ pe kpɔʔɔ.

⁵³ Wí ma yrɛkmaba fafaʔa kan fyomo fɛɛ ma be mà masaa yaʔa à pe na sye kyɛrɛ̀ nì waʔafe.

⁵⁴ Nofele la wi da gón wò tokpɔɔ ma be wí ma li fwɔʔɔ tón ge mà bâ Israyɛli hɛɛn haʔa bee wi tungɔɔ be.

⁵⁵ Ee, wí ma lama to pé na mà nyugara ta Abrahamu nì, wi kluʔu pii na be nyiŋi kì bɛfu na.»

⁵⁶ Ki kruʔu ma, Mari wɔ̀ɔ ko wa Elisabɛti nì we mà yere tanri nyoʔo kɔ mà na hru mà kɛri kàʔa ge.

Jan Batise wi heme kayoʔo

⁵⁷ Elisabɛti wi henyiŋi ki da gâ no kɔ ge, wɔ̀ɔ pyɔ he we naŋa.

⁵⁸ Wi nibyee ní, ní wi heme woo ní be, pe gáʔà loʔo mâ yo wò fɔlɔ wí ma nyugara ta wí na ceŋge ge, à pe plɛn mà po wí ni lafiʔimi na.

⁵⁹ Pyɔ wi gâ wlɛrɛ natanri ta kɔ ge, à pe kɛri wí ni jango pe yɔɔ lege. Pe dáa ki ca bì wi to yele kan wí na bì dɔɔ yeri Sakari.

⁶⁰ Di wi no wɔ̀ɔ kí yo mà yo: «Eʔe, kí ma yala pe dɔɔ yeri Jan.»

⁶¹ À poo po: «Ki yele la loò mɛɛ nyɛ ma heme woo wà na,»

⁶² mà wi to yugu we jɛnlɛ là tyɛnlɛ ní mà yo: «Má ma cori pe da ma pyɔ yeri we mɛlɛ?»

⁶³ Yraʔa ga na pé na nyoŋo ge, wɔ̀ɔ ki nyɛri pé ma mà yele nyoŋo le wa mà yo: «Pe dɔɔ yeri Jan.» Àʔa pè bɛfu fo.

⁶⁴ Ki nyidege na ge, wɔ̀ɔ na gbanni na nyu nɛ mà na Nyɛʔɛlɛ sonni le.

⁶⁵ Pe nibyee pè bɛfu à pe fya ceŋge. Hɛɛn à pe na ki kaʔa kè bɛfu nyu na hɔlɔ wa Jude klo angoro dere ti bɛfu na.

⁶⁶ Hɛɛn pè bɛfu bee pe da ke loʔó ge, à pe na honri ké na mà yo: «Ki pyɔ ŋa we wí bi gà ba bo mɛlɛ sin?» Kanyɛmɛ na, Nyɛʔɛlɛ li sye wi dá bo wí ni.

Sakari wi ŋuʔu

⁶⁷ Wi to Sakari wɔ̀ɔ nyi Nyɛʔɛlɛ li Nyìli na le mà na Nyɛʔɛlɛ li kayoro nyu nɛ pa li leyoo nyɛ we mà yo:

⁶⁸ «Wo da wò fɔlɔ sonni we ŋa wí nyɛ Israyɛli hɛɛn pe Nyɛʔɛlɛ le, mɛjɛn wí ma pan mà bâ wi hɛɛn haʔa be mà pe yugu syɔ ge.

⁶⁹ Wɔ̀ɔ Syɔfɔlɔ yrigi wo kan ŋa wí nyɛ fangbɔʔɔ ní mâ po Dafide wi kluʔu pyɔ we.

⁷⁰ Kiì gi ga wi dá yo wi leyoo pe noro na de mà kpe fanfan nyiŋi na ge,

⁷¹ mâ yo: Wí bi wo syɔ wò bɛnfɛɛ ma be ní bee fanŋa ní pé ma wo cɛ ge.

⁷² Wí bi nyugara ta wò tokpɔɔ na be bì lama to nɛ wi nofegmala ní le.

⁷³ Mɛjɛn Nyɛʔɛlɛ li dá lì klan wò to Abrahamu kan we mà yo

⁷⁴ lí bi ba wo syɔ wò bɛnfɛɛ pe fanŋa ma ge bì wo kan wo da li kpɔʔɔ fyara fun,

⁷⁵ wò lama mi po ylɛmɛ, wo po sinbee li yɛʔɛ̀ na ge wò nyuwyeʔe kì bɛfu ni.

⁷⁶ Ɛɛn di, na pyɔ, pé bi da ma yeri Nyɛgbɔfiʔi ki leyoo wà. Mɛjɛn má bi glu wò fɔlɔ wi yɛʔɛ̀ ma bì da wi kloro yɛli de,

⁷⁷ bì daʔa teri wi hɛɛn na be, peʔe cɛn pe yo wí bi pe kapere yaʔa de pe kân bì pe syɔ.

⁷⁸ Mɛjɛn wò Nyɛʔɛlɛ lí na nyugara taʔa wo na ceŋge. Lí biʔi kân namuru kpɛnmɛ mi ba baʔa wo na nɛbo kpɛntomo mi,

⁷⁹ jango, bee pé nyɛ wa yeblimi ni, ní kùʔù fyara ní pe ki kpɛnmɛ nya me. Ki pomo na me, lí bi wo kan wo da nyimi kloʔó tanri ge.»

⁸⁰ Pyɔ wi dáa lɛʔɛ mà na fanŋa taʔa wi nyìli namyɛʔɛ na ge. Wi dáa gori sinbriʔi dere na fɔ mà bâ no nyiŋi ga na wí bi wì tyɛʔɛ Israyɛli woo na be.