SRAʔA FARAFƐƐ 1 - NYƐʔƐLƐ LI KÀYORO

Sraʔa ŋa pé na hori ge, wi kayoʔo

¹ Bajegɔ Nyɛʔɛlɛ li dá Mowisi yeri we wa kpasyoro go ga ni li dáa li teri ge. À li ki furu kayoro cɛʔɛ́ wí na, jango wi ya ti yo Israyɛli kluʔu woo ma be mà yo:

² «Wa yee ni be na hɛn wà bi ajoʔo sraʔa fara Bajegɔ Nyɛʔɛlɛ ma le, wi pan ajoʔo kà nì, no wi yo, ná kiì ban ajotatugu gi yo.

³ Nàʔa po wi sraʔa ajoʔo kí nyɛ kpangbanŋa ŋa pé na hori ge, kí mà yala ki woo wi pan klàʔa fun nopyala ní kpasyoro gò goyɛʔɛ ga na, Bajegɔ Nyɛʔɛlɛ lí na lì teri ge jango liʔi ta, li ki woò kpe wè.

⁴ Ki woo wi wi kyɛrɛ pa wa sraʔa hoʔo woo wi yugu na. Wi sraʔa pɔɔ syɔ bì wi kapere laʔa de wi na.

⁵ Wi ba nupyala konli wa Bajegɔ Nyɛʔɛlɛ li yɛʔɛ na. Sraʔa fàràfɛɛ bee Aaron najɛɛ pe pan ki disyan nì pe baʔa nyranʔa wa sraʔa farahaʔa dere tì bɛfu na wa kpasyoro gò goyɛʔɛ na, deʔe ga na Bajegɔ Nyɛʔɛlɛ lí na lì teri ge.

⁶ Wi ki sraʔa paʔala, wuu konʔolo wí na.

⁷ Aaron wi najɛɛ bee, sraʔa farafɛɛ pe kɛnhɛnrɛ hanri, pe ti pà wa sraʔa farahaʔa na ge, pe kwɔʔɔ le waʔa na.

⁸ Sraʔa farafɛɛ bee Aaron wi najɛɛ pe ki kara da pe konʔolo kɔ ní, yuru nì, ní ti nylanʔa hanri pe tí pà wa kɛnhɛnrɛ na da pé ma kwɔʔɔ le ge.

⁹ Di ŋa wí ma ki sraʔa fara, wi lama yrɛbɛ ní ceʔe jeʔe ge nyumu ní. Sraʔa farafɔlɔ wi pì bɛfu hogo wa sraʔa farahaʔa na ge. Sraʔa ŋa pé na hori wiì wi, kwɔʔɔ sraʔa wi, wi nuʔu kí na Bajegɔ Nyɛʔɛlɛ glanʔa le.

¹⁰ Nàʔa po ŋa wí ma ki sraʔa fara wi sraʔa wí nyɛ ajotatugu gi, ŋa pé na hori ge, mbyɔ wi, ná kiì ban ŋkpɔ wi. Kí ma yala wi pan klaʔa fun mbyɔ ní, ná kiì ban, ŋkpɔ wi ge.

¹¹ Wi baʔa konli wa sraʔa farahaʔa ki yaajɛhaʔa kamolo namyɛlɛ na wa Bajegɔ Nyɛʔɛlɛ li yɛʔɛ ma ge. Sraʔa farafɛɛ bee Aaron najɛɛ be pe ki disyan nyranʔa wa sraʔa farahaʔa deʔe kì bɛfu na.

¹² Ŋa wí ki sraʔa fara, wuu konʔolo kara da wi konʔolo ní yugu nì gè mà plɛ̀n nylanʔa nì Sraʔa farafɔlɔ wi pi hanri wi pi pà wa sraʔa fàrahaʔa kɛnhɛnrɛ kwɔʔɔ na ge.

¹³ Di ŋa wí ma ki sraʔa fara wi ceʔe ní, ní lama yrɛbɛ jeʔe wi pi yɛli nyumu ní. Sraʔa fàrafɔlɔ wi wì bɛfu fara wuu hògó wa sraʔa farahaʔa na ki nùʔu kí na Bajegɔ Nyɛʔɛlɛ glanʔa le.

¹⁴ Ŋa wi sraʔa wí bi bo kajɛnlɛ woo ge, ŋa pé buu hogo Bajegɔ Nyɛʔɛlɛ kan le, kí mà yala wi pan kotolo ní, ná kiì ban, kookpɛnlɛ li yo ge.

¹⁵ Sraʔa farafɔlɔ wi ba ki kajɛnlɛ fara le sraʔa wa sraʔa farahaʔa na ge. Wi yùgù kon wiʔi hògó wa sraʔa farahaʔa na ge.

¹⁶ Wí dìsyan nyranʔa ge waʔa na kpo, ki kanŋaa tanla ki yaajɛhaʔa namyɛlɛ na wa tyonro deʔe na ge.

¹⁷ Wi li yɛ wa li kamara kpafoʔo ni, di wò ga lí yɛ bì li kon lì na syɛn. Sraʔa farafɔlɔ wi li hògó wa sraʔa farahaʔa na kɛnhɛnrɛ kwɔʔɔ na ge. Sraʔa ŋa pé na hori wiì wi, kwɔʔɔ sraʔa wi, wi nuʔu kí na Bajegɔ Nyɛʔɛlɛ glanʔa le ceŋge.