JUDE 1 - NYƐʔƐLƐ LI KÀYORO

Syeriʔi

¹ Mì Jude ŋa wí nyɛ Jesu Krisi wi tungɔɔ mâ po Jake wi conlo we, mí bi ki sɛbɛ ŋa troʔo we wa yèé bee ma To Nyɛʔɛlɛ lí ma yeri ge. Yé na li glanʔa. Jesu Krisi fanna wɔ̀ɔ na ye kɔrɔsi kpo.

² Nyugara nì, nyimi ní, ní glanʔama ní pi kpɔʔɔ ye ma.

Ákpoʔo krɛʔɛfɛɛ kayoʔo

³ Na nagroboo, nyiŋi ga na mi dáa nà kpanŋi jango bí sɛbɛ wà nyoŋo buu troʔo wa ye ma wò bɛfu syɔmo kala na le, à mi gáʔà nya kí nyɛ ná ma jiji kala li fɔ bùu nyoŋo bì ye fɛn bì yo: Kí ma yala ye da ján gbanʔa pama kala na, ma Nyɛʔɛlɛ li dá gan li hɛɛn ma be kanhaʔa nigbe to ge.

⁴ Mɛjɛn hɛnkloboo pèè ma je wo ni hrama ni, bee pé na wò Nyɛʔɛlɛ li haʔama wa mâ na mi krɛʔɛ jango, pe kyɛnrɛ tì bɛfu ní, Nyɛʔɛlɛ li da pe cun hɛnsinbee ge bì haʔa wa ki woʔo na ge, pé ma ce Jesu Krisi ma, ŋa wí nyɛ wò kundiʔi nigbe mâ po wò fɔlɔ we. Mà kpe fanfan ni we, pe da glú màʔa nyoŋo mà yo kiti wí bi ba do pé na.

⁵ Ali nàʔa ja bo yé ma ki kaʔa cɛn ge fan kɔ ge, kiì nì ki bɛfu ní, mí ma cori bì lama to ye na ké ni nɛ. Ké gee: Wò fɔlɔ wi da gâ Israyɛli hɛɛn syɔ be mâ pe yrígi wa Ejipite klo ni le, ki kruʔu ma, wɔ̀ɔ hɛɛn bee kpo pe ìn da ba wí na ge.

⁶ Ye lama to mlɛŋɛyee bee ní pe ìn dà go wa pe klɛnmɛ ni me, á pe pe korohaʔa yaʔa ge. Nyɛʔɛlɛ à li pé pwɔ nyoʔomo bagon ní mà pe wa yebliwɔlɔ deʔe na pe kò wa fɔ bì ba no wlɛgbɔʔɔ na, kiti wi ba do pé na.

⁷ Ye nì ye lama to nɛ Sodɔmu kàʔà nì, ní Gɔmore kàʔà nì, ní kyɛ̀rɛ̀ da nì ti dá bo be tì tanla ge. Ti hɛɛn pe dáa danri nɛ pa ki mlɛŋɛyee bee nyɛ be. Pe da pè kân kyɛnrɛ ma de ní fɛrɛ kaʔa ní ge. Ki kyɛ̀rɛ̀ woo pé na cɔlɔ wa kwɔbafiʔi nî mà po lɛgɛ hɛɛn pè bɛfu ma.

⁸ Kí nyɛ ban kpo ki hɛɛn bee ní ŋaŋa ni ge. Pé na ŋloro da ŋolo tí na pe kanʔa á pe na kapere hanri pe wre tara na de. Pé na Nyɛʔɛlɛ li fanŋa faʔara ge mà na namuru kpangbanma fɛɛ teri be.

⁹ Ali Misyɛli ŋa mlɛŋɛkpɔɔ we, nyiŋi ga na wi dáa kakara wa Sotanri ní we Mowisi wi wre kuru na de, wi ìn dàʔa ta bì yo wí ni gbanʔa bùu tyɛʔɛlɛ. Di wi dɔɔ́ po: Kí ma yala wò fɔlɔ wi ma yɛri.

¹⁰ Di ki hɛɛn poò na kaʔa gee cɛnni ge pé na ke faʔara. Ɛɛn di, kaʔa gee pé ma cɛn pe wre nadanma kɔsɔ na nɛ pa nya ajobo nyɛ be ba pí nyɛ ticlimi fun ge, ki kaʔa kee gɛ ké na pe wa kùʔù bajegɔ ni we.

¹¹ Cɔlɔkpɔʔɔ nyɛ pé na dɛ, mɛjɛn pé ma Kanyɛ wi kloʔò kiì kpe mà nì mà pè kân ákpoʔo ma ge gbejanra kɔsɔ na, nɛ pa Balamu nyɛ we mà nì mà ce Nyɛʔɛlɛ ma le mà punŋu nɛ pa Kore nyɛ we.

¹² Ki hɛɛn bee pé na li wa ye nì yè fɛtiyee na be fɛrɛ fun mà po nɛɛ degranra di. Pé na honri pee pè na dron. Pé nyɛ nɛ pa fara da nyɛ tiflɛʔɛ kí na ŋroʔo, áʔa hín bo toò na pan hɔgɔ nì ge. À pe ní mà po nɛ pa tiri da nyɛ toò na pibi seri ti sɛnyiŋi na, da pé ma klɔʔɔ ge, á ti ku pinni pinni ge.

¹³ À pe ní mà po nɛ pa nyugbɔmo nyumu nyɛ ma tiflɛgbɔʔɔ ki hîn na kpin ná wa gbanʔa ge. Pe fɛrɛ kaʔa fanna ké nyɛ nɛ pa ki nyugbɔmo takprɔʔɔ nyɛ ge. À pe ní mà po nɛ pa ŋoŋoo nyɛ gee ké na nyari ná hɔlɔ mâ klɛn yebliwɔlɔ liì kan nyiŋi kì bɛfu na ge.

¹⁴ Ali Enoke, ŋa wi dá bo wò tokpɔɔ nasyɛnwoo mà kpe Adan na we, wi da glú mà ki hɛɛn pe kayoʔo yo ge mà yo: «Wele, wò fɔlɔ wí na pan wi mlɛŋɛyee saamo pii fafaʔa ní,

¹⁵ bì ba kiti kon hɛɛn pè bɛfu na. Bì cɔlɔʔɔ wa hɛnkloboo pè bɛfu na pe kakloʔo kala na gee pe dá hanri wí na. Ní kayogbanra tì bɛfu ní da bee pé nyɛ hɛn kloboo pe dáa nyu ná wa wí ma ge.»

¹⁶ Ki hɛɛn bee pé na kon su mà na pe tɔɔ hanʔa be. À pe na tanri na yala kaʔa gee ní ke laa kí na pe wre cun de. À pe na pè kpɔʔɔ mà na hɛɛn fyɛbu na pe li.

Yrɛmɛ ní fɛnmɛ kayoro

¹⁷ Di yèé bee na nagroboo be, ye da lama tun kayoro da nì wò fɔlɔ Jesu Krisi wi pitunbee pe da glú mâ yo ge,

¹⁸ mâ yo: «Nyidanʔara na de, hɛɛn pèè bi ba bo naʔa bì da pè kle ye na bì da danri, bì da yala kakloʔo gee ní ke laa kí na pe cun ge.»

¹⁹ Ki woo pee bɛ pé na hɛɛn konʔolo be pè na ge. Pe wre nadanma miì na pe sinni. Nyɛʔɛlɛ li Nyìli loò nyɛ pé ma.

²⁰ Di, na nagroboo, yeʔe yaʔa kà bí da hari wa yè fanŋa na ge ní yè pama ní ma mí nyɛ kmama ceŋge ge. Ye da nyɛrí Nyɛʔɛlɛ li Nyìli fanŋa ni.

²¹ Ye da yè kpanŋi jango ye da Nyɛʔɛlɛ glanʔa le su. Ye da wò fɔlɔ Jesu Krisi wi nyugara hanni da tí bi ba danʔa nyuwyeʔe bajegɔ ní ge.

²² Ye da nyugara taʔa bee na pe lama mí na pe kon syɛn syɛn ge.

²³ Ye pe syɔ. Ki po nɛɛ yé ma pe kle mà pe fara kwɔʔɔ nî. Ye nì ye nyugara ta pèè na nɛ, di ye da fyaʔá. Ali pe drere ti po ye ma nɛɛ yraʔa ga gi kí ma kran kapere laa ga nì kí na wre cun de, ti da ye bɛnʔɛ.

Nyɛʔɛlɛ li sonmo

²⁴ Wo da Nyɛʔɛlɛ kpɔʔɔ le la lí bi gban bí da ye kɔrɔsi jango yò ga grugu bì do, bi ní bí ye yrìgí li kpangbanma yɛʔɛ́ ma lafiʔimi nì, baʔahaʔa fun ge.

²⁵ Liì nigbe nyɛ Nyɛʔɛlɛ mà po wò Syɔfɔlɔ. Kpɔʔɔmo nì, kpangbanma ní, fanŋa nì, ní sye ní bí bo lí ma su wò fɔlɔ Jesu Krisi fanŋa ni mà kpe fanfan nyiŋi na ŋaŋa woʔo nî, fɔ nyiŋi kì bɛfu na. Ki po ban.