JONASI 1 - NYƐʔƐLƐ LI KÀYORO

Jonasi wi ceme Bajegɔ Nyɛʔɛlɛ ma le

¹ Wlɛʔɛ kà na Bajegɔ Nyɛʔɛlɛ li dá yo Jonasi nì ŋa Amitayi najɛ we mà yo:

² «Jɛ, ma kɛri Ninife kàkpɔ̀ʔɔ̀ nî ma ya yo ki hɛɛn ní be gbanʔa. Mɛjɛn mí ma te pe kapere ti hranma ní me.»

³ Di Jonasi wɔ̀ɔ jɛ mà kruʔu wa na fe na sye Tarisi kàʔà jango wi po leʔe Bajegɔ Nyɛʔɛlɛ ní le. Wi dá jɛ mà kɛri Jafa ni. Wɔ̀ɔ yâ nyumu kɔrɔkpɔʔɔ kà nya wa ga ki dáa sye wa Tarisi kàʔà ni ge. Wɔ̀ɔ kí sari mà je wa hɛɛn pe tɔɔ ní be jango bì gɛri wa Tarisi ni bì yà bo leʔe Bajegɔ Nyɛʔɛlɛ ní le.

⁴ Di Bajegɔ Nyɛʔɛlɛ à li tiflɛgbɔʔɔ hanri. Àʔa na funnu wa nyugbɔmo yugu na ge. À tiflɛʔɛ hɔgɔ ma jɛ na pan wa nyugbɔmo na me fɔ nyumu kɔrɔkpɔʔɔ ki dáa jɛn bì jaʔabu.

⁵ Nyumu kɔrɔkpɔʔɔ ki fɛfɛɛ pe dá fya. Pè bɛfu nigbe nigbe à pe na pe nyɛʔɛŋɛɛ nyɛri mà na tuʔuru fara na ti wa wa nyugbɔmo ni me jango nyumu kɔrɔkpɔʔɔ ki kò tifaʔaga. Jonasi wiì wɔ̀ɔ po wí ma trigi mà je wa nyumu kɔrɔkpɔʔɔ ki noʔoma deʔe kà na mà syɛn na ŋolo ceŋge.

⁶ Nyumu kɔrɔkpɔʔɔ ki fɛfɛɛ pe lagwɔ wɔ̀ɔ flo wa wì tanla mà yɔ́ɔ̀ po: «Ma na ŋolo nyaʔa? Jɛ, ma ma nyɛʔɛlɛ nyɛri le. Kana ki nyɛʔɛlɛ lí bi honri wo na jango wò gá gu.»

⁷ Pè bɛfu nigbe nigbe à pe naʔa nyu pè ma mà yo: «Ye pan wo ba nyaʔala le jango wo ŋa cɛn wí kan ki tipeʔe áʔa wo ta ge.» À pe nyaʔala le. Nyaʔala à li Jonasi fara.

⁸ Ki kala na à peʔe yo wí ma mà yo: «Maʔa yo wo kan han kala na ki tipeʔe kí bi wo ta ge? Ma na nyaʔa tunŋu ko? Má ma jɛ hanbe? Pé na ma klo yeri le mɛlɛ? Ma kluʔu woo pé nyɛ hanbee ní?»

⁹ Wɔ̀ɔ pé po: «Mí nyɛ Ebruyee woo. Mí na Bajegɔ Nyɛʔɛlɛ kpɔʔɔ, namuru ti Nyɛʔɛlɛ la li dá nyugbɔmo hanri ní tra ní de.»

¹⁰ Ki kruʔu ma wɔ̀ɔ wi kayoʔo yo pe kân. Fyara à ti nyumu kɔrɔ ki fɛfɛɛ co be ceŋge, nyiŋi ga na pe da gáʔà loʔó mâ yo wi dáa fe bì yà hra leʔe Bajegɔ Nyɛʔɛlɛ na le. À poo yugu mà yo: «Nyaʔa ma kan á ma ki woʔo ga hanri banmɛ ge?»

¹¹ À poo po: «Wo nyaʔa hanri má na jango nyugbɔmo mi yèré yeʔeke wo nì ge?» Mɛjɛn nyugbɔmo mi dáa jrɛʔɛ mà na mì wa gbanʔa ceŋge mà toro kplɛʔɛ na.

¹² Wɔ̀ɔ pé po: «Ye na kpe, ye na wa wa nyugbɔmo ni me. Nyugbɔmo pa mi yere yeʔeke ye nì, mɛjɛn mí maʔa cɛn mì ma ki tiflɛʔɛ hɔgɔ ga jrɛʔɛ máʔà wa ye na ge.»

¹³ Ki hɛɛn pe dáa pè kpanŋi mà na pe nyumu kɔrɔkpɔʔɔ hori ge, jango bì gban bì no wa tra na de. Di pe ìn gban mɛjɛn nyugbɔmo mi dáa jrɛʔɛ pe ni gbanʔa ceŋge fɔ mà toro kplɛʔɛ na ge.

¹⁴ Ki kala na pe dá Bajegɔ Nyɛʔɛlɛ nyɛri le mà yo: «E Bajegɔ Nyɛʔɛlɛ, wó na ma nyɛri jango wò gá gu ki hɛn ŋa wi nyuwyeʔe kala na le. Mò gá hɛnsinŋi disyan fwɔʔɔ wa wo na. Mɛjɛn, mo Bajegɔ Nyɛʔɛlɛ, má na ga hanri kí na ma glanʔa ge.»

¹⁵ Ki kruʔu ma, à pe Jonasi kpe mòo wa wa nyugbɔmo ni me. Nyugbɔmo à mi yere yeʔeke.

¹⁶ Ki hɛɛn à pe fya ceŋge Bajegɔ Nyɛʔɛlɛ na le. À pe sraʔá fara lí ma mà nofegee kon lí ma kpo.