JOWƐLI 1 - NYƐʔƐLƐ LI KÀYORO

¹ Wò Fɔlɔ wí ma kayoro da yo Petuwɛli najɛ Jowɛli ma tí da:

Kabɛrɛ nì, wama ní pí ma klo nyi le

² Lagwɔɔ, ye ki woʔo ga loʔo ge. Klo hɛɛn yè bɛfu ye nagruʔu can, yeʔe lòʔó. Ki woʔo ga ki da glú mà hanri yè nyiŋi na yo, ná kiì ban, yè tokpɔɔ pe nyiŋi na ge yo?

³ Yeʔe yo yeʔe fligi yè pii ma be, pee pe baʔa yo pe pii kan be. Pe pii pe baʔa yo pe kluʔu pii ma bee pé na pan wa ge.

⁴ Akaba ba pe da fali fyɛnrɛ ti da pi ká. Ba pi korí kabɛkuru à ti pi ka. Ba pi korí gafyɛnyee à pe pi ka. Ba pi korí, denŋe wɔ̀ɔ pi ka.

⁵ Ye nyɛ, yèé bee hunjɔɔ be yee gbèlé. Yee yoolo yè bɛfu ge, dufɛn jɔfɛɛlɛ, ga na hrɛsɛn wí ma kɔ ge. Dufɛn fonŋo wí bi gɔ ye ma.

⁶ Mɛjɛn klo là hɛɛn braʔa fɛɛ mà bâ do na klo na le. Pé nyɛ fanŋa nì ceŋge mà po no fun. Nà pe da dyɛʔɛ pe ganʔa ke na po nɛ pa jari woʔo nyɛ ge. Pe ganjogoo ké nyɛ nɛ pa jaripɔlɔ woʔo nyɛ ge.

⁷ Pé ma na hrɛsɛn kere cɔʔɔ de, mà na syatiri kaʔabu kaʔabu de, mà ti kaclara nagɔrɔ laʔala de mà ti wa, à ti ko firi.

⁸ Yee gbèlé nɛ pa cɛfonbii wi hin kasyaʔa dreʔe le na kpele wi pɔlɔ kuʔu na pe duu pɔri ŋa kan fonŋo ge.

⁹ Nadanma yrɛbɛ ní, ní dufɛn sraʔa ní pí ma kɔ wa Bajegɔ Nyɛʔɛlɛ li go ni ge. Sraʔa farafɛɛ bee pé nyɛ wa mâ na Bajegɔ Nyɛʔɛlɛ li tunŋu ko, pé na kpele kiì kala na.

¹⁰ Nya lama yrɛbɛ pì bɛfu pí ma cɔʔɔ. Tra à ti po yɛpɛnʔɛ ní. Mɛjɛn ble akaʔa pibi pí ma cɔʔɔ. Dufɛn fonŋo wɔ̀ɔ waʔa. Hunmu à mi fleʔe

¹¹ Caflaala, fɛrɛ bi don ye na. Hrɛsɛn nagɔ kere fɛɛ, yee gbèlé ble nì ɔrisye kala na, mɛjɛn kere akaba pì bɛfu pí ma cɔʔɔ.

¹² Hrɛsɛn tiri tí ma waʔa. Syatiri à ti fanla, grenadi tiri ní, wlɛglɛnʔɛ ní, pɔmu tiri ní, ní nya lama tiri tì bɛfu tí waʔa. Nyimi wò wa adi hɛɛn ma be.

Su como kayoʔo, ní wò Fɔlɔ wi nyɛrimɛ ní

¹³ Sraʔa farafɛɛ, ye kasyaʔa drere le, yee gbèlé. Yèé bee yé na tunŋu ko wa wò Fɔlɔ wi sraʔa farahaʔa na ge, yee gbèlé. Na Nyɛʔɛlɛ li go ki tungɔɔ, ye kasyaʔa drere le, yee gbèlé yee ban. Mɛjɛn tyâ sraʔa yee ní, ní dufɛn sraʔa frama yrɛbɛ ní pi fleʔe wa yè Nyɛʔɛlɛ li go ni ge.

¹⁴ Ye su como kayoʔo jari, ye kpoʔolomo ylɛmɛ hanri. Ye lagwɔɔ ní klo hɛɛn pè bɛfu kpoʔolo wa wò Fɔlɔ ŋa yè Nyɛʔɛlɛ li go ni ge. Ye kpele, ye wò Fɔlɔ yeri we.

Nyɛʔɛlɛ li nafunŋu wlɛʔɛ

¹⁵ Ee, cɔlɔʔɔ wlɛʔɛ kí na pan wa. Kí ma no kɔ. Wò Fɔlɔ wi wlɛʔɛ kí na pan nɛ pa Sye wì bɛfu fɔlɔ wí na hɛɛn cɔʔɔ pomo ma na ge.

¹⁶ Hro ti ìn gɔ mà jɛ be wò yɛʔɛ ma ge yo? Lafiʔimi taʔaraʔa kí bi ga gɔ wa wò Nyɛʔɛlɛ li go ni ge yo?

¹⁷ Akaʔa pibi pí ma fonʔo wa tra ni de. Bogoo akaba à pi kɔ. Akaba cɛʔɛhara tí ma cɔʔɔ, mɛjɛn akaba pibi pi kɔ́.

¹⁸ Ajobo dara tí na cɛn. Nifafaʔara ti fya, mɛjɛn lihaʔa wò nyɛ pí ma. Mbafafaʔara tí na cɔlɔ.

Nyɛʔɛlɛ leyoo wi nyɛrimɛ

¹⁹ Wò Fɔlɔ, mí na kpele na ma yeri, mɛjɛn kwɔʔɔ kí ma ajobo naʔahara tì bɛfu hogo wa nya lama ni me. Kwɔʔɔ àʔa ní mà tiri hogo de kpo.

²⁰ Ali jariyee pé na cɛn mà krugu, mɛjɛn nyumu mí ma waʔa. Kwɔʔɔ kí ma nyakmaʔa dere tì bɛfu hogo.