JƆBI 1 - NYƐʔƐLƐ LI KÀYORO

Jɔbi wi pomawleʔe kpɛʔɛ

¹ Naŋa wà dà bo wa Usi klo ni le, à pe noo yeri Jɔbi. Wi dá bo sinŋi mà po funŋuu. Wɔ̀ɔ na fyaʔa Nyɛʔɛlɛ na ma na wi kɔrɔsi klomo kaʔa ní ge.

² Najɛɛ nasyɛn dà bo wí ma ní picɛɛ tanri ní.

³ Mbara saamo mà kɛ̀ kɛ̂ mà kɛ̀ kɔgunnu nì, nyoʔomɛyee saa kɛ̂ mà kɛ̀ kɔgunnu nì, nupyaʔa à ke po klɛnmɛ saa syɛn ní too kɔgunnu gee ké na fali ge. Sofɛnŋɛɛ à ke po saa syɛn ní too kɔgunnu. Tungɔɔ dá bo wi ma kpo. Ki naŋa wi dá bo lekpangbanŋa mà toro yaajɛhaʔa namyɛlɛ hɛɛn pè bɛfu na.

⁴ Wi najɛɛ pe daa fɛtiyee hanri teme na na hɔlɔ pe kasyɛnrɛ ma de. Pe dáa pe cɛpii tanri yeri be mà báa li na jo teme na pé ni kpo.

⁵ Pe fɛti wlɛrɛ nà ti ba funŋu ge, Jɔbi wi na tun pe na wi najɛɛ yeri be wi na ba pe ylɛmɛ kala kɔ le. Wi dáa jrɛʔɛ fan mà na sraʔa ŋa fara pe na hori ge pè bɛfu nigbe nigbe kala na. Ki dá bo Jɔbi wi na yo kana na pii pé ma kapeʔe kà hanri yo mà Nyɛʔɛlɛ li yele cɔʔɔ wa pe dihonyee ni be. Ki dá bo Jɔbi ma we katraʔa, wɔ̀ɔ naʔa hanri ban su.

⁶ Wlɛʔɛ kà na Nyɛʔɛlɛ li pii à pe kɛri mà yâ yere wa Bajegɔ Nyɛʔɛlɛ li yɛʔɛ ma ge. Sotanri wɔ̀ɔ kɛri mà yâ yere wa pe kpafoʔo ni ge kpo.

⁷ Bajegɔ Nyɛʔɛlɛ à liʔi yo Sotanri ma we mà yo: «Má jɛ hanbé?» Sotanri wɔ̀ɔ yo: «Mí ma jɛ wa na nyarigloro ni wa tra na de.»

⁸ Bajegɔ Nyɛʔɛlɛ à luu po: «Má ma na tungɔɔ Jɔbi pomo kɔrɔsi me yo? Wi nyoʔo wò wa hɛɛn ni be sinmi ní kaʔa funŋumu na me naʔa tra na de. Wi na fyaʔa Nyɛʔɛlɛ na mà na ceʔe kapere ma de.»

⁹ Sotanri wɔ̀ɔ Bajegɔ Nyɛʔɛlɛ po le: «Má naʔa honri mà yo Jɔbi wi na fyaʔa Nyɛʔɛlɛ na le waʔafe yo?

¹⁰ Mo ban má ma wi go ní wi kyɛʔɛ yrɛbɛ pì bɛfu kɛli ge yo? Má maʔa hanri wi kyɛʔɛ yrɛbɛ pì bɛfu à pi na nyɛʔɛ wi kan. Wi ajobo pi ma klo dere tì bɛfu nyi.

¹¹ Di ma ma kyɛʔɛ haʔala maʔa pa wi yrɛbɛ pì bɛfu na, kakara wo wa, pɔɔ ma danŋa mo tapolo ma yɛʔɛ na ge.»

¹² Bajegɔ Nyɛʔɛlɛ à li Sotanri po we: «Ki tɔ na, wi kyɛʔɛ yrɛbɛ pì bɛfu pi ba wa ma yɛʔɛ ma ge, di mò gá maʔa wi wre na de.» Ki nyiŋi na Sotanri wɔ̀ɔ jɛ be Bajegɔ Nyɛʔɛlɛ li yɛʔɛ ma ge.

¹³ Wlɛʔɛ kà na Jɔbi wi najɛɛ ní, wi picɛɛ ní, à pe bâ bo pé na li wa pe lɛ lagwɔɔ go ni.

¹⁴ À tunŋu wà ma pan mà báʔà yo Jɔbi kan mà yo: «Nupyaʔa ke dáa fali, sofɛnŋɛɛ à ke na li be kè tanla.

¹⁵ Ki nyidege na Saba kluʔu woo à pe pan mà bâ do pí na mà pi koli mà tungɔɔ kpo be mlaʔa kpele ní. Mì nigbe ma fɛ mà syɔ mà pan bì ba ki kayoʔo yo ma kan.»

¹⁶ Bi ki naŋa yaʔa wi na nyu adi, à tunŋu wà ma pan nɛ mà báʔà yo mà yo: «Yreʔe ki ma fuʔuru mà to mbara nì ní tungɔɔ na be mà pe hogo pè bɛfu ge. Mì nigbe ma fɛ mà syɔ mà pan bì ba ki kayoʔo yo ge ma kan.»

¹⁷ Bì ki naŋa yaʔa wi na nyu adi, à tunŋu wà ma nì mà jɛ wa nɛ mà bɔ́ɔ̀ po: «Kalideyee pé ma mlagmoo klɛnmɛ tanri kpe mà pan mà bâ do nyoʔomɛyee na mà pè bɛfu koli ma tungɔɔ kpo mlaʔa kpele ní. Mì nigbe ma fɛ mà syɔ mà pan bì ba ki kayoʔo yo ma kan.»

¹⁸ Bì ki naŋa yaʔa wi na nyu adi, à tunŋu wà ma nì mà pan nɛ mà bâ yo: «Ma najɛɛ ní ma picɛɛ ní pee bo na li mà na jo teme na wa pe lɛ lagwɔɔ deʔe na ge.

¹⁹ Ki nyidege na à tiflɛgbɔʔɔ kà ma jɛ wa sinbriʔi gbendeʔe deʔe na ge, ma najɛɛ pe dá bo go ga ni, àʔa bâ ki klɛnʔɛ kè bɛfu ticɛrɛ kaʔabu, mà go can najɛɛ na be. Pè bɛfu à pe ku. Mì nigbe ma syɔ mà pan bì ba ki kayoʔo yo ma kan.»

²⁰ Ki nyiŋi na Jɔbi wɔ̀ɔ jɛ mà wi drekpɔʔɔ hlugu mà wi yugu kpoʔori ge, mà klɛn tra na de.

²¹ Wi daʔa yo mà yo: Pe da na hé waʔafe, mí bi ba hru bì gɛri waʔafe. Bajegɔ Nyɛʔɛlɛ liì daʔá kan à liì maʔa syɔ, pee Bajegɔ Nyɛʔɛlɛ li yele sonni le.

²² Bì Jɔbi yaʔa wa ki cɔlɔʔɔ kì bɛfu ni. Wi ìn kapeʔe hanri. Wi ìn dà Nyɛʔɛlɛ li yele cɔʔɔ ki woʔo kà nigbe kala na.