SYƆFƐƐ 1 - NYƐʔƐLƐ LI KÀYORO

Israyɛli wí ma klɛn wa Kana klo ni

¹ Josuwe wi da gâ gu kɔ, Israyɛli woo à pe Bajegɔ Nyɛʔɛlɛ yugu le mà yo: Wòó ni be wiwii bi glu wo nì yɛʔɛ̀ bi yá mlaʔa kmo Kana klo woo ní be?

² Bajegɔ Nyɛʔɛlɛ à li yo: «Juda wi klù yɛʔɛ̀ ma. Welé, mí ma klo le wi kyɛʔɛ ni.»

³ Juda wɔ̀ɔ kí yo wi heme woo Simenyo ma we mà yo: «Ma plɛ̀n ná ni wo kɛri wa deʔe ga na pé ma kan ná ma ge, wo ya mlaʔa kmo Kana woo ní be. Mí bi ba blɛn má ni kpo, wo kɛri wa ma deʔe ga na pe dá gan má ma.» Simenyo wɔ̀ɔ plɛn wí ni, à pe kɛri.

⁴ Juda wɔ̀ɔ kɛri. Bajegɔ Nyɛʔɛlɛ à li yâ Kana klo woo ní, ní Fɛrɛsi woo le be pe kyɛrɛ̀ ni. À pe kpo pé ni nabii saamo pii syɛn mà kɛ̀ kê wa Besɛki ni we.

⁵ À pe yâ Adoni Besɛki nya wa Besɛki ni we. À pe to wí na. Ki dá hanri ban. À pe Kana woo ní, ní Fɛrɛsi woo kpo be.

⁶ Adoni Besɛki wɔ̀ɔ jɛ na fe, di à pe pa wí na mòo prɔ mà yɔ́ɔ̀ co mà wi kabɛgbɔyee konlo be wí na kyɛrɛ̀ nì cyeʔe woo ní be.

⁷ Adoni Besɛki wɔ̀ɔ yo: «Pé nyɛ masaa too tanri ní kprɔʔɔ bee pe dá pe cyeʔe ní pe kyɛrɛ̀ kabɛgbɔyee konlo be. Ki masaala à pe báa akaba glo na tabali noʔo na. Nyɛʔɛlɛ lí ma ki nyoʔo nuŋu na kân ga mi dá hanri.» À pe kɛri wí ni Jerusalɛmu ni. Wɔ̀ɔ yâ gu.

⁸ Juda pii à pe to Jerusalɛmu na mòo co. Pe dá ki hɛɛn kpo mlaʔa kpele ní mà kwɔʔɔ le kàʔà na màʔa hogo.

⁹ Juda wi pii à pe ní mà kɛri nɛ jango bì yà do Kana woo na bee pe dáa gori wa angoro dere na de yaajɛhaʔa kaligi namyɛlɛ klɛnmɛ dere ní, angobiʔi dere ní de.

¹⁰ Juda wɔ̀ɔ kɛri mà yâ do Kana klo woo bee na pe dáa gori wa Ebron deʔe na, ga pe dáa yeri fanfan ni Kiriyati Ariba ge. Pe dá Syesyayi nì, Ayima nì, ní Talimayi yee cɔʔɔ be.

¹¹ Wi gâ jɛ be ki deʔe na, wɔ̀ɔ yâ do Debiri kàʔà woo na. Debiri wiì wi pe dáa yeri fanfan ni Kiriyati Sefɛri ge.

¹² Kalɛbu wɔ̀ɔ yo: Mí bi na picɛ Akisa kan ki hɛn ma we wi cɔ ŋa wí bi Kiriyati Sefɛri ja bìʔi kpe ge.

¹³ Otinyɛli ŋa Kalɛbu wi conlo Kenase pyɔ we wɔ̀ɔ fanŋa ta màʔa ja. Kalɛbu wɔ̀ɔ wi picɛ Akisa kan wi ma wi cɔ.

¹⁴ Nyiŋi ga na Akisa wi da gɛrí wi pɔlɔ Otinyɛli kasyɛn ma, wɔ̀ɔ yɔ́ɔ̀ son mà yo wi kere tà nyɛri wi to Kalɛbu ma we. Akisa wi dá drigi wa wi sofɛnlɛ na le. Kalɛbu wɔ̀ɔ wi yugu mà yo: «Má na nyaʔa ca?»

¹⁵ Wɔ̀ɔ wí po: «Ma kmaʔa hanri ná na, mɛjɛn má ma tra kan ná ma wa yaa prama kaligi namyɛlɛ na le. Ma nyumu dere tà kan ná ma kpo.» Nyumu dere da tí nyɛ wa namuru ni ní noʔo woro ní Kalɛbu wɔ̀ɔ tí kan wí ma.

¹⁶ Kenyɛ ŋa Mowisi wi lefɔlɔ we wi pii pe dá jɛ wa hɛʔɛdiri kàʔà ni Juda wi pii ní be wa Juda sinbriʔi ni Aradi wi yaa prama kaligi namyɛlɛ na mà kɛri mà yâ gboʔolo wa pe klo woo ní be.

¹⁷ Juda nì, wi heme woo Simenyo nì à pe kɛri mà yâ Kana klo woo bee ja pe da glɛ́n wa Tisefati ni we. Pe dá funmu le ki kàʔà na ge. À pe na ki kàʔà yeri Orima.

¹⁸ Juda wɔ̀ɔ ní mà Gasa kàʔà nì, ní ki klɛnmɛ syɔ me, Asikalon nì, wi klɛnmɛ nì, Ekron nì, wi klɛnmɛ nì.

¹⁹ Bajegɔ Nyɛʔɛlɛ à li po Juda nì we. Wɔ̀ɔ angoro deʔe syɔ màʔa ta. Di wi ìn dà angoro tindɛrɛ deʔe hɛɛn pe tra syɔ de pe ma, mɛjɛn pe syongida kɔrɔrɔ ti dá bo timoro woro.

²⁰ Pe dá Ebron kan Kalɛbu mà nɛ pa Mowisi wi daʔá yo ge. Wɔ̀ɔ Anaki wi najɛɛ tanri pe tra syɔ de pe ma.

²¹ Bɛnjamɛ wi pii pe ìn dà Yebusi woo pe tra syɔ pe ma bee pe da glɛ́n wa Jerusalɛmu ni we. Fɔ mà bâ no alaʔa na Yebusi woo pé ma klɛn wa Jerusalɛmu ni Bɛnjamɛ wi pii ní be.

²² Josɛfu wi go woo à pe kɛri mà yâ do Betɛli na we. Bajegɔ Nyɛʔɛlɛ à li po pé ni.

²³ Josɛfu go woo pe dá pèè tun, à pe yâ Betɛli nyari mòo wele. Fanfan ni pe dáa Betɛli yeri we Lusi.

²⁴ Ki tunbee à pe yâ naŋa wà nya wí na nyini wa kàʔà ni ge. À poo po: «Maʔa tyɛʔɛ wo na deʔe ga na pé na jin ná sye wa kàʔà ni ge. Pa wo ba kmaʔa hanri má na.»

²⁵ Wɔ̀ɔ kàʔà jehaʔa tyɛʔɛ pe na. À pe kàʔà hɛɛn kpo be mlaʔa kpele ní, di pe dá wiì nì, wi heme yaʔa, à pe kɛri.

²⁶ Ki naŋa wɔ̀ɔ kɛri Ɛti woo pe klo ni mà yâ kàʔà kà kan wa mà naʔa yeri Lusi. Pé naʔa yeri ban fɔ mà bâ no alaʔa na.

²⁷ Manase wi ìn dà ki hɛɛn pe tra syɔ pe ma bee pe dá bo wa Bɛti Syenya ni, ki klɛnmɛ nì, Tahanaki nì, wi klɛnmɛ nì, Dɔri nì, wi klɛnmɛ nì, Yibleyamu nì, wi klɛnmɛ nì, Megido nì, wi klɛnmɛ nì. Kana woo pe dá jori bì go wa ki klo ni le.

²⁸ Nyiŋi ga na Israyɛli woo pe da gâ fanŋa ta, à pe Kana woo co, à pe na tunŋu ko pé kan, di pe ìn gban bì pe tra syɔ pe ma.

²⁹ Efrayimu wi ìn dà Kana woo pe tra syɔ pe ma bee pe dá bo wa Gesɛri ni we. Kana woo à pe ko wa Efrayimu woo ní be Gesɛri ni we.

³⁰ Sabilon wi ìn dà pe tra syɔ pe ma bee pe da glɛ́n wa Nahalali ni we. Kana woo à pe klɛn wa Sabilon woo pe kpafoʔo ni, di pe da pe ciʔilí, à pe na jiji tunŋu ko.

³¹ Asɛri wi ìn dà hɛɛn bee tra syɔ pe da glɛ́n wa Ako ni we, ní Sidon woo ní, Aklabi woo ní, Akisibi woo ní, Eliba woo ní, Afiki woo ní, ní Hrehobe woo ní be.

³² Asɛri woo pe da glɛ́n wa Kana woo pe kpafoʔo ni bee pe dá bo wa klo ni le, mɛjɛn pe ìn dà pe tra syɔ pe ma.

³³ Nɛfitali wi ìn dà Bɛti Kemɛki wi hɛɛn pe tra syɔ de pe ma ní bee ní pe dá bo wa Bɛti Anati ni we. Pe da glɛ́n wa Kana woo bee ní pe dá bo wa klo ni le. Di Bɛti Kemɛki kàʔà woo ní, ní Bɛti Anati kàʔà woo ní pe dáa jiji tunŋu ko.

³⁴ Amori woo à pe Dan kluʔu woo ŋroʔo be wa angoro ni de. Pe ìn dà pe yaʔa pe trìgì wa angoro tindɛʔɛ deʔe na ge.

³⁵ Amori woo pe dá jori bì glɛn wa Ari Erɛsi ni, ní Ayalon nì, Kalibimu nì we. Di Josɛfu wi go woo à pe kyɛʔɛ pa pe na mà pe co, à pe na tunŋu ko pé kan fanŋa na.

³⁶ Amori woo pe tra kanla li dá jɛ wa Akrabimu ma mà kɛri mà yâ doro wa fɔ Sela na we.