JAKE 1 - NYƐʔƐLƐ LI KÀYORO

Syeriʔi

¹ Mì Jake ŋa, Nyɛʔɛlɛ ní wò fɔlɔ Jesu Krisi nì pe tungɔɔ we, mí na ye syeri, yèé Israyɛli klɛnmɛ kɛ̂ ma kɛ syɛn ma mi dá jraʔa ge.

Pama ní, ticlimi nì

² Na woolo, yɛgbanra tyɛnʔɛ kè bɛfu gee ké na ye taʔa ge ye da ke cùn lafiʔigbɔmo kala.

³ Mɛjɛn yé maʔa cɛn mà yo Nyɛʔɛlɛ nà li da yè pama pin bì da mi wele ge, paʔa gban bì ye kan ye da yɛgbanra kaʔa kunnu ye nî.

⁴ Di kí ma yala yɛgbanra kaʔa gee yé na kunnu ye nî ge ke fùnŋù kpɛn, jango yèé fanna, ye fùnŋù kpo, yraʔa kà wò gá ye la.

⁵ Nàʔa po wà nyɛ wa ye ni, ticlimi mi ìn wi tín ge, wi mi nyɛ̀rí Nyɛʔɛlɛ ma le, la lí na hɛɛn pè bɛfu kanʔa ticaʔaga, lagbanma fun ge, pa li mi kân wí ma.

⁶ Di kí ma yala wi mi nyɛ̀rí pama ní, wi lama mò gáa wi kon syɛn syɛn. Mɛjɛn ŋa wi lama mí noo kon syɛn syɛn ge, wí nyɛ nɛ pa nyugbɔmo kokoloyee nyɛ be, ma tiflɛʔɛ ki hîn na mi kpin ná mi wa na hɔlɔ ge.

⁷ Ki hɛn ŋa wò gáa ki honri bì yo wí bi yraʔa kà ta wò fɔlɔ ma we.

⁸ Mɛjɛn ki woo wí nyɛ honriʔi syɛn fɔlɔ wi. Kloʔò nigbe ná joo tín.

Fyomo nì, masaʔa nì

⁹ Wò woo ŋa wí nyɛ fyomo fɔlɔ, wi da bin lafiʔimi nì ga na Nyɛʔɛlɛ lí buu kpɔʔɔ ge.

¹⁰ Masa naŋa fanna, Nyɛʔɛlɛ nà li jɔɔ cɛrɛ, kí ma yala wi po lafiʔimi nì, mɛjɛn masaa pé gà ba doro nɛ pa nya wofyɛnʔɛ nyɛ ge.

¹¹ Yaa nàʔa gá jɛ ki kwɔʔɔ kì bɛfu ní, ki na nya waʔa ge. Nya wofyɛnʔɛ ki na klanʔa mà wo. Ki kmara ti na cɔʔɔ́. Ki podeme na me, masaa fanna, pe woʔo kí bi ba bo banmɛ ge kpo pe kahranʔa kè bɛfu ní.

Yɛgbanra nì, kapeʔe ki laa como nì

¹² Hɛn ŋa wí na yɛgbanʔa kaʔa kunnu wi nî ge, ki woo pɔɔ bo frɛmɛ ní, mɛjɛn nòo yɛgbanʔa kaʔa kun ge wi nî kmaʔa, pɔɔ nyuwyeʔe ki tonro ta we, ŋa wò fɔlɔ wí yo wí bi gan bee ma wí na pe glanʔa ge.

¹³ Kapeʔe ki laa nàʔa da hɛn wà cun, wò gá yo kí na jrɛʔɛ Nyɛʔɛlɛ ma. Mɛjɛn kapeʔe ki laa kòo gban bì Nyɛʔɛlɛ co le. Liì lì tala loò na kapeʔe ki laa panʔa ge hɛn ma.

¹⁴ Di hɛn wì bɛfu kapeʔe ki laa kí noo cun, nyiŋi ga na wi lama honribere tí noo ŋroʔo nóo fanla ge.

¹⁵ Kapeʔe ki laa nàʔa acɛnlɛ ta, ki na ba kapeʔe he. Kapeʔe nàʔa gá ba lɛ kɔ ge, kiì ki na kùʔù he.

¹⁶ Na woolo, yèé bee yé na na glanʔa ge, yò gáa yè fanla ki woʔo ga nì ge:

¹⁷ Akmaba pì bɛfu ní, ní nadanma yrɛbɛ pì bɛfu ní ba wó na taʔa ge pí na jrɛʔɛ Nyɛʔɛlɛ ma, la li dá namuru paʔama yrigi me. Liì li loò na krɛʔɛ ge, áʔa hín bo yraʔa kɛ̀ ìn bi gban bi lí krɛʔɛ wɔlɔ ge.

¹⁸ Ki dá liì glan, à li wo he kayocɛnŋɛ fanŋa ni ge, jango wo po kplɛɛ wa li ahranma ni be.

Ye da nurú, ye daʔa hanri

¹⁹ Na woolo, ye da lama tun kmaʔa ki woʔo ga nì ge, kí ga: Kí ma yala hɛn wì bɛfu wi da nagruʔu can, wi da nurú ticaʔaga. Wi da bin nyíŋi yoʔo ní lagbanma ní pi namyɛlɛ na le.

²⁰ Mɛjɛn hɛn ŋa wí nyɛ lagbanma ní, wòo gban bì ga hanri kí nyɛ sinŋi Nyɛʔɛlɛ li yɛʔɛ̀ na ge.

²¹ Ki kala na, ye làʔá tipere tì bɛfu na ní labeme mì bɛfu ní. Ye kayoʔo kpe ge lagunmu ní, ga Nyɛʔɛlɛ lí ma tòn wa yè dihon na we, ga kí bi gban bí yè syɔ ge.

²² Yò gáa glɛn bì da Nyɛʔɛlɛ li kayoro nuru de dron. Nà kiì ban, paʔa bo yé na yè fanla. Di ye da ga hanri tí na nyu ge.

²³ Mɛjɛn hɛn nòo da Nyɛʔɛlɛ li kayoro nuru de, di nà wi ìn da ga hanri tí na nyu ge, wi na po nɛ pa hɛn ŋa nyɛ wí na wi yɛtaʔa wele ayleʔe ni ge.

²⁴ Di wi gâ wì wele mâ kɛri kɔ ge, wɔ̀ɔ lama wɔ wi pomo ní me.

²⁵ Di hɛn ŋa wí ma Nyɛʔɛlɛ li furu kayoro wele de kɔrɔsi na, da tí nyɛ funŋuru ná hɛɛn syo be, nòo tí co kmaʔa nà wi ìn da ti nuru dron bì nì bì da lama wo tí ni ge, di nòo da ga hanri tí na nyu ge, Nyɛʔɛlɛ pa li da frɛmɛ kanʔa wí ma wi kahranʔa kè bɛfu na.

²⁶ Nà hɛn wà bí daʔa honri bì yo wí na Nyɛʔɛlɛ kloʔó tanri, di nà wi ìn da wi noyomo sinni me, paʔa bo wí na wì fanla. Wi srɛʔɛ kloʔó àʔa po waʔafe.

²⁷ Srɛʔɛ kloʔó ga kí nyɛ ylɛʔɛ mâ po kranma fun wò To Nyɛʔɛlɛ li yɛʔɛ̀ na ge, kí ga: Ma da picribee wele be ní kucaa ní be, ma da pe hari pe cɔlɔʔɔ na ge, ma da mà kɔrɔsi drunya kranma mì bɛfu ní.