GALASE 1 - NYƐʔƐLƐ LI KÀYORO

Syeriʔi

¹ Mì Pɔli mí nyɛ pitunŋu, di hɛɛn pitunŋu ban ná ni. Ho nyɛ pitunŋu hɛɛn fanŋa ni, fɔ Jesu Krisi fanŋa ni, ní To Nyɛʔɛlɛ ní, la li dá Jesu nyɛ móò yrígi kuu ni be.

² Mì nì, ní na sɛrifɛnyɛɛ pè bɛfu ní bee pé nyɛ ná ni ge, wó bi ki sɛbɛ ŋa troʔo we wa yèé bee ma yé nyɛ wa Galase klo sɛrigoro ni de.

³ Wò To Nyɛʔɛlɛ ní, ní wò fɔlɔ Jesu Krisi nì pe frɛmɛ ní nyimi kan ye ma.

⁴ Krisi wiì wi ŋa wi dá gu wò kapere ti kala na, jango bì wo syɔ ki drunyapee wi fanŋa ma ge. Wi daʔá hanri mà yala wò To Nyɛʔɛlɛ li nadanma miì nì.

⁵ Wo da li kpɔʔɔ nyiŋi kì bɛfu na. Ki po ban.

Kayotanʔa kí nyɛ nigbe

⁶ Ga yé ma hanri ge kí ma na pari dɛ. Mɛjɛn yé na lari ticaʔaga Nyɛʔɛlɛ na, la lí ma ye yeri Krisi wi haʔama fanŋa ni ge. À ye na wa na krɛʔɛ na pa kayoro tà na tì yɛ da yé na yeri kayotanʔa ge.

⁷ Ɛɛn di, kayotanʔa kà wò wa adi mà laʔa ga na mi da glú mâ yo ye ma ge. Nà yeʔe nya miʔí yo ban, mɛjɛn pèè nyɛ wa bee pé na yè lama wlele me ye na mà naʔa ca bì kayotanʔa cɔʔɔ ge ga kí na nyu Krisi na we.

⁸ Ali nàʔa ja bo wòó wà wi, ná kiì ban, mlɛŋɛ wà wi ŋa wí ma jɛ wa namuru ni de, nòo kayotanʔa kà yo ye ma ga ki ìn yala ga nì wo da glú mâ yo ye ma ge, Nyɛʔɛlɛ luu dànŋá.

⁹ Wo da glú màʔa yo ye ma pomo ma na ge, mí biʔi yo ye ma ban nɛ ŋaŋa ni ge bì yo: Nà hɛn wà bí da kayotanʔa kà nyu ye ma ga ki ìn yala ga nì ye da glú mâ pa ge, Nyɛʔɛlɛ luu dànŋá.

¹⁰ Ga mí na nyu ge paʔa bo pé yo mí naʔa ca bì da hɛɛn glanʔa yo? Ayo dɛ. Mí naʔa ca bì da Nyɛʔɛlɛ liì glanʔa. Kanyɛmɛ na, ho naʔa ca bì da hɛɛn nadanma hanri. Nàʔa po mi dí bo naʔa ca bì da hɛɛn nadanma hanri ge, mi ìn dì bi bo Krisi wi tungɔɔ.

Pomo ma na Pɔli wi dá grɛʔɛ pitunŋu ge

¹¹ Na woolo, mí ma cori yeʔe cɛn ye yo kayotanʔa ga mí na nyu ge ki ìn jɛ hɛɛn ma.

¹² Mɛjɛn mi ìn ki ta hɛn ma. Hɛn ìn dà ná krɛʔɛ ki ní kpo. Di Jesu Krisi wiì maʔa tyɛʔɛ ná na.

¹³ Mi dá bo na Juwifiyee pe srɛʔɛ kloʔó tanri ge pomo ma na, ye daʔa loʔó. Ki nyiŋi na ge mi dáa sɛrifɛɛ cɔlɔ be ceŋge mà naʔa ca bì pe kloʔò cɔʔɔ ge.

¹⁴ Mi dá bo na sye yɛʔɛ̀ wa Juwifiyee srɛʔɛ kloʔó ni ge mà toro na klo woo fafaʔa na, bee pe dá bo na nibyee be, mɛjɛn mi dáa na tokpɔɔ pe kalɛʔɛ ke kloʔò tanri kmaʔa.

^15-16 Di Nyɛʔɛlɛ li kmama kala na, li da ná fara sanni pé bi na he ge. À li ná yeri jango bì baa li tunŋu ko ge. Di nyiŋi ga ki da li glán, à li li pyɔ tyɛʔɛ we na na, jango bì gban bì da kayotanʔa nyu bee ma poò Juwifiyee ge. Ki kayotanʔa ga kí na nyu li pyɔ na we, mi ìn dà gɛri bì yà hɛn wà yugu.

¹⁷ Mi ìn dà gɛri wa Jerusalɛmu kàʔà ni ge bì yà bee yugu pe dá bo pitunbee na yɛʔɛ̀ ge. Di ki nyidege na ge, mi da gɛrí wa Arabi klo ni le. Ki kruʔu ma, à mi hru mà kɛri Damasi kàʔà ni ge.

¹⁸ Ki gâ yɛʔɛ́ tanri kɔ kɔ ge, à mi kɛri wa Jerusalɛmu kàʔà ni ge, jango wo ya wò cɛn Pyɛri nì we. À mi canwyeʔe syɛn kɔ wa wi ní.

¹⁹ Di mi ìn dà pitunbee wà nya, fɔ mà laʔa Jake wiì nigbe na, ŋa wò fɔlɔ wi conlo we.

²⁰ Ga mí ma yo ye ma naʔa ki sɛbɛ ni we, kayocɛnŋɛ gi. Mɛjɛn Nyɛʔɛlɛ lí maʔa cɛn mà yo ho na flɛnʔɛ.

²¹ Ki kruʔu ma, à mi yâ je wa Siri klo klɛnmɛ ni, ní Silisi klo klɛnmɛ ní me.

²² Bee pe da bá Krisi na we wa Jude klo ni le, pe dá bo pe ìn na cɛn kpɛn.

²³ Di pe dáa ga nuru dron ge hɛɛn pèè dá bo naʔa nyu pé ma mà yo: «Ŋa wi dá bo na wo cɔlɔ fanfan ni ge wí na kayotanʔa nyu hɛɛn ma mà naʔa teri pé na pomo ma na kí ma yala pe pá Jesu na we. Di kplɛʔɛ na, wi dá bo naʔa ca bì da pe kpun bee pe da bá Jesu na we.»

²⁴ À pe na Nyɛʔɛlɛ kpɔʔɔ na kala na le.