FILEMO 1 - NYƐʔƐLƐ LI KÀYORO

Syeriʔi

¹ Mì Pɔli ŋa kaso fɔlɔ Jesu Krisi kala na le, mì nì, wò syɛnwoo Timote nì, wó bi ki sɛbɛ ŋa troʔo we wa mo Filemo ma we. Má nyɛ wò syɛnwoo mà na wo glanʔa ceŋge mà nì mà po wò tungɔnyɛ nɛ.

² Wó buu troʔo wa ye ma, mo ni, ní cɛlɛ ŋa nì pé na yeri Afya wɔ́ɔ po wò syɛnwoo we, ní Arikipe ŋa wò sorasinyɛ we mà plɛn sɛrifɛɛ bee ní pé na kpoʔolo wa ma go ni ge.

³ Wò to Nyɛʔɛlɛ ní, wò fɔlɔ Jesu Krisi nì pe frɛmɛ ní nyimi kan ye ma.

Glanʔama ma mí nyɛ Filemo ma we

⁴ Nyiŋi o nyiŋi ga mí na Nyɛʔɛlɛ nyɛri le, na syɛnwoo Filemo, mi naa lama tun má ni su, na na Nyɛʔɛlɛ syeri le kpo.

⁵ Mɛjɛn mí naʔa nuru mà yo sɛrifɛɛ pè bɛfu pé na ma glanʔa ní pomo ma nì má ma pa wò fɔlɔ Jesu na we.

⁶ Mí na Nyɛʔɛlɛ nyɛri le, jango má na ma pama teri me hɛɛn na be pomo ma na ge, ki fanŋa kan pé ma. Nàʔa po ban, frɛmɛ mì bɛfu ma mí nyɛ wo ma Krisi ni we pa pe mi cɛn kmaʔa.

⁷ Na woo, glanʔama ma mí nyɛ má ma ge, mí ma lafiʔigbɔmo kan ná ma mà dihon kan ná ma kpo, mɛjɛn má ma dihon kan sɛrifɛɛ ma be.

Pɔli wí ma Filemo nyɛri Onesime kala na

⁸ Ki kala na, ali nàʔa ja bo fanŋa nyɛ ná ma Krisi ni we bì ga yo má kan kí ma yala ma hanri ge,

⁹ di, glanʔama kɔsɔ na, mí na ma nyɛri, mì Pɔli ŋa mí nyɛ lagwɔ we mâ po kasofɔlɔ Krisi kala na ŋaŋa ni ge.

¹⁰ Mí na ma nyɛri Onesime wi kala na le. Wí nyɛ na pyɔ wi wa wò kpoʔolomo ni Krisi nì we, ŋa mí ma he naʔa kaso nî we nyìli namyɛlɛ na.

¹¹ Wi da glú mà po má ma tonro fun fanfan ni we, di ŋaŋa ni ge wí nyɛ tonro nì wò syɛnmu ma, mì nì, mo ní we.

¹² Mí moo nuŋu mòo troʔo wa ma ma wiì wí nyɛ na lama me.

¹³ Mi dá bo naʔa honri bùu yaʔa naʔa nà tanla nyiŋi ga na mí nyɛ naʔa kaso nî kayotanʔa kala na le, jango wi da na hari ma nolo ni le.

¹⁴ Di mi ìn jori bì yraʔa kà hanri ki po mɛ ìn yereʔe na kpɛn, jango kmaʔa ga má bi hanri ge, kò gá bo jiji kala, fɔ ki po lafiʔimi wolo.

¹⁵ Kana, kala la li dɔɔ́ kan wɔ́ɔ laʔa má na nyiŋi cɛnri na jango ma bɔɔ kpe nɛ, wi gbàn wi po ma woo nyiŋi kì bɛfu na.

¹⁶ Di wi ìn bi yà bo má ma nɛ pa ŋklo nyɛ we dron. Wí ma ponro ŋklo na we, mɛjɛn ŋaŋa ni ge wí nyɛ wò syɛnwoo mà na wo glanʔa. Wí na na glanʔa ceŋge. Nàʔa po ban, pɔɔ ma glan fɔ bi doro mì na we wre ti namyɛlɛ na ní wò fɔlɔ wi namyɛlɛ nì le.

¹⁷ Ki kala na, nàʔa po má na na cun nɛ pa ma syɛnwoo nyɛ we, moo cò kmaʔa nɛ pa mì nyɛ we.

¹⁸ Nàʔa po wi dá klomo hanri má ma kala là na ge, ná kiì ban, nàʔa po ma fwɔʔɔ nyɛ wí na ge, ma ki fwɔʔɔ kì bɛfu wa mì na.

¹⁹ Mì mí bi ki woʔo ga nyoŋo ge na kyɛdaʔa nì. Kí ga: Mì Pɔli mí biʔi sari ma ma. Ɛɛn di mi ìn jori bìʔi yo má ma bì yo ma nyuwyeʔe kí nyɛ nɛ pa na fwɔʔɔ nyɛ ga kí nyɛ má na ge.

²⁰ Ee, na syɛnwoo, ma na haʔa ma ki woʔo ga hanri ge na kân wò fɔlɔ wi kala na le. Ma lama fiʔi me na na wò kpoʔolomo ni Krisi nì we.

²¹ Pa mí ma ki woʔo ga nyoŋo máʔà troʔo wa ma ma ge, mí ma paʔa na mà yo má biʔi loʔo ná ma. Ali mí maʔa cɛn mà yo má biʔi hanri fɔ bì doro ga na mí ma yo má kan ge.

²² Ki tɔ na ge, ma syɛnhaʔa hanri wa na kân, mɛjɛn mí ma na honriʔi paʔa na mà yo Nyɛʔɛlɛ lí bi yè nyɛrimi syɔ me bì nì bì na kân ye ma nɛ.

Syere tanʔaŋa

²³ Epafrasi ŋa na kasofɔnyɛ Jesu Krisi kala na le, wí ma ma syeri,

²⁴ mà plɛn na tungɔnyɛɛ pe tɔɔ ní be. Pé bee: Marike nì, ní Arisitarike nì, ní Demasi nì, ní Luke nì.

²⁵ Wò fɔlɔ Jesu Krisi wi yè bɛfu haʔa.