ESEKYƐLI 1 - NYƐʔƐLƐ LI KÀYORO

Bajegɔ Nyɛʔɛlɛ lí ma li tyɛʔɛ Esekyɛli na we

^1-3 Yɛʔɛ fonɛrɛ mà kɛ̀ kɛ̂ wolo li yere ticɛrɛ woʔo ki wlɛrɛ kɔgunnu woʔo na, domi Esekyɛli, ŋa sraʔa farafɔlɔ Busi najɛ we, bì na yaʔa wa Juwifiyee bee kpafoʔo ni pe dá jo mâ kɛri Kebari lɔkpɔʔɔ tanla, mi da nyɛʔɛlɛ nya le li nyɛʔɛ. Nyɛʔɛlɛ à li anyaʔa tyɛʔɛ ná na. Ki dá bo masanaŋa Yoyakɛn wi ŋklomo yɛlɛ kɔgunnu wolo na. Bajegɔ Nyɛʔɛlɛ à li yo ná ni bì na yaʔa wa Babilɔni klo ni Kebari lɔkpɔʔɔ tanla. Bajegɔ Nyɛʔɛlɛ li dá li kyɛʔɛ pa na na wa ki deʔe na.

⁴ Ga mi dá nya ge kí ga. Tiflɛjinli kpangbanla dá jɛ wa yaa prama kamolo namyɛlɛ na mà plɛn fawɔrɔ ní. Kwɔʔɔ dá bo na nyini mà na nyraʔa li namyɛʔɛ kè bɛfu na. À paʔama kpangbanma ma faʔa kɛli ge mà po nɛ pa kanyɛrɛ nyɛ da pe na tɛʔɛlɛ wa li nulala ni le.

⁵ Awyere ticɛrɛ dá bo wa li nulala ni le. Pi dá bo hɛnwyee lɛgɛ na.

⁶ Yɛrɛ ticɛjɛrɛ dá bo tì bɛfu nigbe nigbe na. Kamara ticɛjɛrɛ dá bo tì bɛfu nigbe nigbe na kpo.

⁷ Ti ceʔe ke dá bo singee. Ti yoocoro à ti po nɛ pa nuple woro nyɛ de. Ti dáa nyi fyɛ fyɛ nɛ pa kanyɛrɛ nyɛ da pé na tɛʔɛlɛ ge.

⁸ Hɛnwyee kyɛrɛ dá bo tí na wa ti kamara noʔo na ti namyɛʔɛ ticɛrɛ wì bɛfu na. Yɛrɛ ticɛjɛrɛ ní kamara ticɛjɛrɛ dá bo ki awyere ticɛrɛ tì bɛfu nigbe nigbe na.

⁹ Ti kamara kanŋaa ke dá hoʔolo kè na. Nà ti da danri, ti ìn je da wa bì da grɛʔɛ, di tì bɛfu ti na sin na sye ti yɛsinmi na me.

¹⁰ Ti yɛrɛ ti pomo miì ma me: Ti yɛʔɛ kà dà bo hɛnwye woʔo. Ti kaligi namyɛlɛ yɛʔɛ pomo à mi po nɛ pa jaripɔlɔ woʔo nyɛ ge. Ti kamolo namyɛlɛ woʔo àʔa po nu woʔo. Ti kruʔu ma, yɛʔɛ àʔa po nɛ pa nyo woʔo nyɛ ge.

¹¹ Ti yɛrɛ nì, ní kamara nì à pi yâ gonʔolo pì na wa namuru ni de. Ti kamara syɛn syɛn tà dà ti wre ton de.

¹² Tì bɛfu nigbe nigbe ti dáa danri na sye ti yɛsinmi na. Nyɛʔɛlɛ li Nyili nà li da sye deʔe ga na, ti naa sye wa ki dere tì bɛfu na. Nà ti da sye deʔe ga na ti ìn je hru bì kloʔo yaʔa ge.

¹³ Bì da ki awyere wele ti na po nɛ pa nagranma pomo nyɛ ní fiklan paʔama ní me. Kwɔʔɔ dá bo na nyi wa ki awyere ti namyɛʔɛ kè bɛfu na mà na pari.

¹⁴ Ki awyere ti dáa sye mà na pan mà po ticaʔara nɛ pa yreʔe fuʔurumu nyɛ me.

¹⁵ Mi dá ki awyere wele. Syongida kɔrɔ syaʔala nyoʔo dá bo ki awyere ticɛrɛ tì bɛfu nigbe nigbe na wa ti noʔo na wa tra na de.

¹⁶ Ti ceʔe ke hranma pomo ní pomo ma nì ti na nyaʔa ge, ti dá ŋglɛnʔɛ ga lɛ pé na yeri krisolite ge. Tì bɛfu ticɛrɛ ti dá bo teme na. Tì bɛfu ticɛrɛ ti dá hanri pomo ma na ki dá bo nɛ pa ma yo ceʔe ke dáa kè pari na ke kon.

¹⁷ Ti dáa danri na sye ti namyɛʔɛ ticɛrɛ wì bɛfu na. Ti dáa sye ti yɛsinmi na. Ti je hru bì kloʔo ga kpe ti dá jɛ ge.

¹⁸ Ti syaʔa gee kologrɛʔɛgɛɛ ke da jɛ̀ri ceŋge mà na nyi fyɛ fyɛ, mà po fyara woʔolo ceŋge. Ti ceʔe ticɛrɛ ticɛrɛ wì bɛfu nyɛʔɛ ke da ke kolo mà ke krɛʔɛ.

¹⁹ Ki awyere ticɛrɛ nà ti da danri nyiŋi ga na, ti syaʔa ke naa gloʔo tì tanla. Nà ti jɛ namuru ni, ti syaʔa ke na jɛ wa kpo tra na de.

²⁰ Nyɛʔɛlɛ li Nyili li dáa sye deʔe o deʔe, tiì ti naa sye wa kpo Nyili lí na sye deʔe ga na ge. Ti syaʔa ke na jɛ namuru ni tì tanla gee ke dá bo tí na ge.

²¹ Awyere nà ti da danri nyiŋi ga na, ti syaʔa ke naa danri kpo. Nà ti yere, syaʔa ke na yere kpo. Nà ti jɛ namuru ni, syaʔa ke na plɛn mà jɛ namuru ni tí ni teme na, mɛjɛn nyuwyeʔe ga ki dá bo wa ki awyere ni kiì tege gi ki dá bo wa syaʔa ni ge kpo.

²² Nyɛʔɛlɛ ní tra ní pi kpafowaʔa ki nyoʔo dà bo wa ki awyere ti yugu na tiì nì, namuru ní pi kpafoʔo ni ge mà po na nyi fyɛ fyɛ nɛ pa ŋglɛnʔɛ ga ki nyɛ paʔara ge.

²³ Wa ti noʔoma ni, ti kamara syɛn syɛn tà dà jɛ mà sin tì ní. Tì bɛfu nigbe nigbe ti kamara syɛn syɛn tà dà pi wre dere tì bɛfu ton.

²⁴ Ki dá bo ki awyere nà ti da sye, mi naa ti tunnumu nuru nɛ pa nyufafaʔa womo nyɛ me nɛ pa Sye wì bɛfu fɔlɔ akpolo nyɛ le. Li akpolo lí nyɛ nɛ mlagmoo kpoʔolomo tunnumu mi. Nà ti yere, ti na ti kamara trigi de.

²⁵ Nà ti yere bì ti kamara trigi nyiŋi ga na, tunnumu kpangbanma mà na nyini wa ti yugu namuru kpafoʔo yugu na ge.

²⁶ Wa ki awyere yugu na kpafowaʔa yugu ki dá bo nɛ pa masaʔa aconʔo nyɛ ga pé hanri bula ŋglɛnrɛ ní ge. Àʔa po hɛnwye lɛgɛ mà klɛnʔɛ na wa yrɛbɛ pì bɛfu yugu na.

²⁷ Mi dá ki woo nya wí na nyi fyɛ fyɛ wa ki masaʔa aconʔo na ge mà ki namyɛʔɛ kè bɛfu kolo mà ke krɛʔɛ nɛ pa kanyɛrɛ nyɛ da pe tɛʔɛlɛ ge, mà kpe wi hɛnŋɛɛ na fɔ mà yâ no wi yugu deʔe na. Ki dáa nyi fyɛ fyɛ nɛ pa kwɔʔɔ paʔama nyɛ me. Mà kpe wi nulala ni mà trigi mà kɛri noʔo na, wɔ̀ɔ po nɛ pa kwɔʔɔ ki paʔama nyɛ me.

²⁸ Paʔama ma mi dá bo wa wi namyɛʔɛ kè bɛfu na, mi dá bo nɛ pa Nyɛʔɛlɛ li pwɔlɔ nyɛ la pé na nyaʔa wa faʔa ni hɔgɔ panwlɛʔɛ na ge. Ki paʔama mi dá Bajegɔ Nyɛʔɛlɛ li kpangbanma kmara paʔama lɛ me. Mi da gâ mi nya kɔ, à mi to mà na yɛʔɛ kan tra na. Ki nyiŋi na, à mi yoʔo kà loʔo.