ƐSITƐRI 1 - NYƐʔƐLƐ LI KÀYORO

Masanaŋa Asyerusi wi fɛti kpangbanŋa kayoʔo

¹ Ki kaʔa ke dá hanri masanaŋa Asyerusi wi masaʔa nyiŋi na. Ki Asyerusi wi masaʔa klɛnmɛ mi dá gbe wa Ɛndi klo na fɔ mà yâ no wa Etyopi klo na le. Wi dá bo klòʔo too noli ní nasyɛn ke masanaŋa kpangbanŋa.

² Masanaŋa Asyerusi wi dá bo wa wi masaʔa aconʔo na wa Susi fanŋa kàʔà ni ge.

³ Wi da glɛ́n masaʔa na. Ki yɛʔɛ́ tanriwolo na le, wɔ̀ɔ fɛti kpangbanŋa hanri wi lekpandoo ní, wi kundiʔiyee kan be. Pɛrisi klo woo ní, Medi klo woo pe sorasiyee pe kundiʔiyee ní, klòʔo fɛɛ ní, ní ki klòʔo lekpandoo pè bɛfu ní pe dá bo wa.

⁴ Wi dá wi masaʔa nì, ní ki kmara nì, ní wi fangbɔʔɔ tyɛʔɛ pè na fɔ mà yâ da yere noli.

⁵ Ki wlɛrɛ ti da gâ funŋu kɔ ge, masanaŋa wɔ̀ɔ fɛti kpangbanŋa hanri wlɛrɛ nasyɛn kpafoʔo ni wa Susi fanŋa kàʔà ni ga kí nyɛ masanaŋa kàʔà ge. Wi dɔɔ́ hanri hɛɛn pè bɛfu kala na lekpandoo ní, yribee ní be. Ki fɛti pe dɔɔ́ hanri wa masanaŋa wi kasyɛn nagɔ ni we.

⁶ Kpasyoro tà tyɛnʔɛ dá bo wa firi nì, bula woro ní. À pe ti pwɔ pɛgbanra ŋglɛnʔɛ klɛnʔɛ na, wɛrifiʔi feʔebee ní, ní lɛn maʔaŋaa fiʔili ní, ní nyɛʔɛlɛ hlɛnʔɛ hlɛnʔɛ ni. Pe dá tɛ nì, wɛrifiʔi asyɛnpleʔe hanri mà ke tyɛʔɛ wa pɛgbanra ŋglɛnrɛ klɛnʔɛ noʔo na. Ki ŋglɛnrɛ tà dá bo nyɛrɛ. À tà ma po firi. À tà ma po nɛmiʔi woro. Ti tɔ à ti po wɔrɔ.

⁷ Pe dáa masanaŋa wi hunmù kanʔa me hɛɛn ma be wa wi tɛ ajɔʔɔlɔ ni ge. Kè bɛfu à ke po tyɛnʔɛ tyɛnʔɛ. Lɛ̀ ìn blɛn là nì. Dufɛn wi dáa ban pé kan mà yala masanaŋa wi yrɛbɛ kanma pomo ní me.

⁸ Cromo ìn dà bo wa. Hɛɛn pe dáa jo pe nadanma na. Mɛjɛn masanaŋa wi daʔá yo wi go tungɔɔ kan be mà yo pe hɛɛn pe lama fiʔi me.

⁹ Masanaŋa wi cɔ, ŋa pé na yeri Fasiti, wiì fanna, wɔ̀ɔ fɛti kpangbanŋa wà hanri kpo klo cɛɛ kan be wa masanaŋa Asyerusi wi masaʔa go ni ge.

Masanaŋa cɔ Fasiti wi wama kayoʔo

¹⁰ Wlɛrɛ nasyɛnwoʔo na, nyiŋi ga na masanaŋa Asyerusi wi dá bo lafiʔimi nì dufɛn ŋa kala na wi dá jɔ ge, wɔ̀ɔ wi go tungɔɔ nasyɛn bee tun be. Pe yegee ké gee: Meyuma, Bisita, Yaribona, Bigita, Abagita, Setari, Karikasi nì,

¹¹ mà yo pe ya masanaŋa cɔ Fasiti yeri we, wi masaʔa jala kán, wi pan wi ba yèré wa wiì masanaŋa wi yɛʔɛ̀ ma ge, jango wi wi kmara tyɛʔɛ hɛɛn na be, ní kundiʔiyee ní be, mɛjɛn wi dá bo kmaa ceŋge.

¹² Nyiŋi ga na masanaŋa wi tungɔɔ pe da gáa wi tunmu yo me wi cɔ Fasiti kan we, wɔ̀ɔ ki ce. Wi ìn ki ta bì wi kayoro kpɔʔɔ de. Masanaŋa wi lama à mi gban wi na ceŋge.

¹³ Masanaŋa wɔ̀ɔ yo wi ticlimi fɛɛ ní be, bee pe dá nyiri cɛn de, mɛjɛn kiì gi wi da glu mâ na hanri fan furu kayoro cɛnfɛɛ ní be, ní kiti kaʔa cɛnfɛɛ pè bɛfu ní.

¹⁴ Pe yegee ké gee: Karisyena, Syetari, Adimata, Tarisisi, Mɛrɛsi, Marisena nì, ní Memukan nì. Pɛrisi klo nì, ní Mɛdi klo kundiʔiyee nasyɛn dà bo wa masanaŋa wi yɛʔɛ̀ ma ge. Pee bɛ pe da glɛ́n masaʔa ki degblɛrɛ na de. Pe dá bo masanaŋa tanla we ton.

¹⁵ Masanaŋa wɔ̀ɔ pé po: «Wo nyaʔa hanri masanaŋa cɔ na we bì yala wò furu kaʔa ní ge? Mɛjɛn domi masanaŋa Asyerusi we, mí ma na go tungɔɔ tun, á pe yâ kayoro da yo wí kan, wi ìn ti kpɔʔɔ.»

¹⁶ Memukan wɔ̀ɔ kí yo masanaŋa nì, ní kundiʔiyee pè bɛfu yɛʔɛ̀ na mà yo: «Masanaŋa cɔ Fasiti wí ma kaklolo hanri ceŋge. Wi ìn li hanri masanaŋa wiì nigbe na, di kundiʔiyee pè bɛfu wi ní masanaŋa Asyerusi wi klo klɛnmɛ hɛɛn pè bɛfu ní wí ma ki kaklolo hanri pee na.

¹⁷ Mɛjɛn kala la masanaŋa cɔ wí ma hanri, cɛɛ pè bɛfu pé biʔi loʔo. Paʔa pe kan pee pe pɛɛ faʔara be bì daʔa nyu bì yo: ‹Masanaŋa Asyerusi wi dá yo pe pan masanaŋa cɔ Fasiti nì, wi ba yèré wa wi yɛʔɛ̀ ma ge, di Fasiti wi ìn ki ta bì ban.›

¹⁸ Pɛrisi klo kundiʔiyee pe cɛɛ ní, Medi klo kundiʔiyee pe cɛɛ ní, pa pe masanaŋa wi cɔ wi kahranla loʔo, bì da ki kayotere nyu pe pɛɛ kan be. Ki woʔo paʔa grɛʔɛ bì bo faʔarama kala, bì nì bì bo kayagbɔʔɔ ceŋge.

¹⁹ Nàʔa po kí bi yala má ma ge, masanaŋa, ma kayokpɔʔɔ kà yo fanŋa nì. Pe ki kayoʔo nyoŋo ge wa Pɛrisiyee ní Mediyee pe furu kayoro sɛbɛ ni we. Ki kayoʔo kò je ga grɛʔɛ. Ki ìn yala Fasiti wi ba nì wi yere wa nɛ masanaŋa Asyerusi wi yɛʔɛ̀ ma ge adi. Pa Fasiti wí nyɛ masanaŋa wi cɔ ge, masanaŋa wi ki fanŋa syɔ wi ma, wiʔi kan cɛlɛ wà ma wì yɛ, ŋa wí ma toro Fasiti na we.

²⁰ Ma kayoʔo nàʔa no wa ma masaʔa ki kpangbanma dere tì bɛfu na ge, cɛɛ pè bɛfu pa pe da pe pɛɛ kpɔʔɔ be, bee kpandoo ní yribee ní be.»

²¹ Ki kayoro à ti masanaŋa glan we ní wi kundiʔiyee ní be. Masanaŋa wɔ̀ɔ ki woʔo hanri ge mà yala Memukan wi kayoro ní de.

²² Wi dá sɛbɛ troʔo wa wi klo klɛnmɛ mì bɛfu ni. Wi dá klɛnmɛ mì bɛfu ni mi sɛbɛ nyoŋo mà yala pe nyoŋomo pomo ní me mà hɛɛn tyɛnʔɛ kè bɛfu ke woo nyoŋo mà yala ke hɛnrɛ ní de mà yo nabii pè bɛfu pe klɛn pe go woo yugu na, pee nyu pe hɛntara tiì ni.