ESAYI 1 - NYƐʔƐLƐ LI KÀYORO

¹ Amosi najɛ, Esayi wi da gâ nya, áʔa po kí bi ba Juda kluʔu woo ní, ní Jerusalɛmu ta ki masaa bee pe nyiŋi na. Osyasi nì, Jotamu nì, Akasi nì, Esekyasi nì we kí ga:

Hɛɛn bee poò na kà cɛnni ge

² Bajegɔ Nyɛʔɛlɛ à li yo: «Namuru, ta nurú. Tra, ma nagruʔu can, ma lòʔó. Mɛjɛn mí ma pii jo, jango pe krɛ̀ʔɛ̀ lagwɔɔ, di à pe ce ná ma.

³ Nu wi hin wi fɔlɔ cɛn we. Sofɛnlɛ lí na li lihaʔa cɛn wa li fɔlɔ deʔe na ge. Di Israyɛli wi ìn na cɛn. Na hɛɛn poò na kà cɛnni.»

⁴ Ee, yé nyɛ klo la hɛɛn pé nyɛ kapere hanrifɛɛ bɛ ge. Ye kapere tuʔuru tí nyɛ wa yè yuru na de. Yè kluʔu kí nyɛ kapere hanrifɛɛ woʔo. Yé nyɛ pii tipee bɛ ye nì. Yé ma Israyɛli woo pe Nyɛʔɛlɛ, la Bajegɔ Nyɛʔɛlɛ ylɛlɛ wa le mà li faʔara. À ye hru kruʔu ma mà laʔa lí na.

⁵ Nyaʔa ma kan yé na ceʔe su, àʔa hin bo kmohaʔa ìn go ye na adi ge?

⁶ Bì gbe yè tɔwɛrɛ na fɔ bì yà no wa yè yugu na, pwɔʔɔhaʔa wò nyɛ ye na, fɔ mà gâ laʔa klara nì, kmoro dere ní, ní namoro nì, da tí nyɛ nyɛʔɛrɛ de. À ti po wɛgɛ fun. Hùnmù ìn wo tí na. Pe ìn ti pwɔ kpo.

⁷ Yè klo lí ma ko waʔafele. Pé ma yè kyɛrɛ hogo kwɔʔɔ ní. Nabonmoo pé ma yè klo akaba koli be yè yɛʔɛ na. Yrɛbɛ pì bɛfu pí ma cɔʔɔ mà kɔ nɛ pa bɛnfɔlɔ wi hin klo cɔʔɔ pomo ma na ge.

⁸ Jerusalɛmu kàʔà ki korí kì yɛ, nɛ pa kajolo nyɛ la lí nyɛ wa hrɛsɛn nagɔ kere lama ni ge, nɛ pa kere kajolo nyɛ wa yelɛʔɛ kere ni de. Kí nyɛ nɛ pa kàʔà ga nyɛ ki bɛnfɛɛ pé maʔa kɛli ge.

⁹ Nàʔa po Bajegɔ Nyɛʔɛlɛ la Sye wi bɛfu fɔlɔ li ìn dì pèè syɔ wo ni ge, wò bɛfu wo dá bì gu nɛ pa Sodɔmu nì, ní Gɔmore kyɛrɛ hɛɛn pe dá gu pomo ma na ge.

Srɛʔɛ pomo ma mí na Bajegɔ Nyɛʔɛlɛ bɛnʔɛ le

¹⁰ Jerusalɛmu kàʔà kundiʔiyee yèé bee yé nyɛ kloboo nɛ pa Sodɔmu nyɛ we, ye nagruʔu can, ye ga loʔo Bajegɔ Nyɛʔɛlɛ lí yo ge. Hɛɛn yèé bee yé nyɛ nɛ pa Gɔmore nyɛ we, ye wò Nyɛʔɛlɛ li krɛʔɛmɛ loʔo me.

¹¹ Bajegɔ Nyɛʔɛlɛ à li yo: «Yè sraʔayee fafaʔabaa bee yé na kpun, pé bi gban bì nyaʔa no mì na we? Yè mbapyɛɛ bee yé na kpun na hori ge, pé ma na te mà plɛn nupii nylanʔa ní ge. Nupyaʔa disyan koò na lafiʔimi kanʔa ná ma adi mà plɛn mbapleʔe woʔo ní, ní ŋkapɛɛ woʔo ní ge.

¹² Yé na pan mà báa nyini wa na yɛʔɛ̀ ma, di paʔa bo mi dí ye yeri wa mà yo ye baa danrí naʔa na sraʔa go kasyɛn lama ni me yo?

¹³ Yò gáa ban ná kan tonro fun sraʔayee pèè ní adi. Yò gáa sraʔayee pe wriʔi wa na na adi. Kí na na bɛnʔɛ. Yè yefonŋo srɛʔɛ ní, fyonri wlɛʔɛ nì, ní yè fɛti kpandoo yaʔa be. Mi ìn jori srɛʔɛ ga na kí nyɛ wleleʔe kapeʔe nì ge.

¹⁴ Yè yefonŋo fɛtiyee ní, ní yè srɛʔɛ fɛti kpandoo ní pí na na bɛnʔɛ wa na dihon na we ceŋge. Pí na na teʔe. Mi ìn bi gban bì pi co lagunmu ní.

¹⁵ Nà ye yè kyɛrɛ jrɛʔɛ bì da nyɛri ge, mi na na yɛʔɛ ton ge, jango ho gá ye nya. Nà ye na nyɛri, mi ìn bi loʔo ye ma. Mɛjɛn yè kyɛrɛ tí ma kran hɛɛn disyan ní ge.

¹⁶ Ye fogo. Ye yè yɛli. Ye ye kahranbeʔe laʔa ge wa na yɛʔɛ̀ ma ge. Ye làʔá kapere hranma na me.

¹⁷ Ye kakmaʔa ki hranma ploʔo me. Yee sinmi ca. Bee pé na cɔlɔ ge, yee pe hari. Yee kasingee hanri piclibee kan be. Yee nyu, yee kucaa syo be.»

Nà ye ce ná ma ge

¹⁸ Ee, Bajegɔ Nyɛʔɛlɛ à li yo: «Ye pan, wo baʔa cɛn wo ma. Ali nàʔa ja bo yè kapere tí na nylanʔa nɛ pa disyan nyɛ ge, pa ti fligi nɛ pa para miʔi nyɛ ge. Ali nà ti ja nylanʔa fɔ bì wɔ ge, pa ti fligi nɛ pa mbajofiʔi nyɛ ge.

¹⁹ Nà ye hanri bí yè dihonyee kan be ná ma bì da nuru ná ma ge, pa ye da klo li hukmara li.

²⁰ Di nà ye ìn ki ta, nà ye ce, mlaʔa kpele pa li ye kpo bì ye kɔ.» Bajegɔ Nyɛʔɛlɛ à li yo ban.

Jerusalɛmu kàʔà ki ylɛmɛ

²¹ Ye ki kàʔà ga wele ki dá bo kafungee kàʔà. Di àʔa bâ grɛʔɛ kyɛnrɛ hanrifɔlɔ. Ki dá bo nyiŋi kanyɛmɛ kaʔa na ge. Sinmi mi dá bo waʔa ni. Di kí ma krɛʔɛ hɛnkpofɛɛ kàʔà.

²² Jerusalɛmu woo, ye dá bo fanfan ni ge nɛ pa wɛrifiʔi nyɛ ge, di ŋaŋa ni, yé nyɛ tonro fun. Ye dá bo nɛ pa dufɛnkmaa nyɛ we, di ŋaŋa ni yé ma krɛʔɛ nyumu.

²³ Ma kundiʔiyee pé ma krɛʔɛ leceele, mà po nɛ nikonmoo pe nagroboo. Pè bɛfu pé na nadanma yrɛbɛ ca, mà na fe akanma piì krugu. Pé na piclibee pe tanʔa syo pe ma. Poò na kucɔ wi kayoʔo nuru ge.

²⁴ Kiì kɔsɔ na, wò Fɔlɔ, Bajegɔ Nyɛʔɛlɛ la Sye wì bɛfu fɔlɔ we, Israyɛli wi Nyɛʔɛlɛ la fanŋa fɔlɔ we, à li yo: «Mí bi na bɛnfɛɛ ja be, bì na fwɔʔɔ ton pè na.

²⁵ Mí bi na kyɛʔɛ pa ma na nɛ fonŋo, Jerusalɛmu. Mí bi ma yɛli kwɔʔɔ ní nɛ pa pee timoro tɛʔɛlɛ mâ ti yɛli pomo ma na ge. Mí bi ma yɛli bì kranma mì bɛfu fara má ni.

²⁶ Mí bi kiti konfɛɛ kan má ma nɛ pa fanfan woo nyɛ be, bì yɛrifɛɛ kan má ma nɛ pa fanfan nyiŋi woo nyɛ be. Ki kruʔu ma, pa pe da ma yeri sinmi kaʔa ní kafungee kaʔa kpo.»

²⁷ Sinyo wí bi syɔ, nòo da kasingee hanri ge. Bee pé bi bà Nyɛʔɛlɛ na bí kruʔu wa pe kapere ma de, ki woo pé bi syɔ sinmi miì fanŋa ni.

²⁸ Di leceele ní, ní kapere hanrifɛɛ ní, pé bi blɛn bì jaʔabu teme na. Bee pé ma Bajegɔ Nyɛʔɛlɛ wa le, pé bi gu.

²⁹ Ee, yé bi ba faʔara ga na yé ma pa ki tiri da na yé na sunnu, á ti klɛn wa yè dihonyee na be ceŋge ge. Yè dihonyee pé bi ba jɔʔɔ ye na ga na yé ma ki nagɔyee bee kpe, jango bì da ga hanri kloʔo ke tɔɔ hɛɛn pé na hanri ge.

³⁰ Yé bi ba grɛʔɛ nɛ pa ki tiri da nyɛ ti wɛbɛ klanʔa wonyiŋi na ge, bì bo nɛ pa ki nagɔyee nyɛ bee nyumu mí ma waʔa wa pe ni ge.

³¹ Ki braʔa fɔlɔ pɔɔ bo nɛ pa kɛnhɛnwaʔaga nyɛ ge. Wi kahranʔa pa ke bo nɛ pa kwɔʔɔ misɛn nyɛ we. Pì syɛnmu pí bi da hori teme na. Hɛn wà woo gban bì ki kwɔʔɔ fiʔi ge.