EFƐSE 1 - NYƐʔƐLƐ LI KÀYORO

Pɔli wí ma Efɛse kàʔà sɛrifɛɛ syeri be

¹ Mì Pɔli ŋa Jesu Krisi wi pitunŋu we mà yala Nyɛʔɛlɛ li nadanma ní me, mí bi ki sɛbɛ ŋa troʔo we wa yèé sɛrifɛɛ bee ma yé nyɛ wa Efɛse kàʔâ ni mâ po kafungee fɛɛ wa yè kpoʔolomo Jesu Krisi nì we.

² Wò To Nyɛʔɛlɛ ní, wò fɔlɔ Jesu Krisi nì pe frɛmɛ ní nyimi kan ye ma.

Kakmaʔa ga Nyɛʔɛlɛ lí hanri wo na Krisi ni we

³ Wo da Nyɛʔɛlɛ sonni le la lí nyɛ wò fɔlɔ Jesu Krisi wi To we. Wiì wi ŋa wí ma kakmaʔa kì bɛfu hanri wo kan nyìli namyɛlɛ na wa namuru ni wò kpoʔolomo Krisi nì we.

⁴ Mɛjɛn, sanni lí bi drunya hanri we, li dá wo fara wa wò kpoʔolomo Krisi nì we jango wo po ylɛɛ, wo po baʔahaʔa fun li yɛʔɛ̀ na ge li glanʔama fanŋa ni.

⁵ Li da glú màʔa kon màʔa yaʔa mà yo wo po li pii Jesu Krisi fanŋa ni bì yala li nadanma ní me.

⁶ Ki kala na, wo da Nyɛʔɛlɛ kpɔʔɔ le li nadanma yraʔa ki kmara na, da lí ma kan wo ma wa wò kpoʔolomo ni li Piglaan ní we.

⁷ Mɛjɛn Krisi wi dá gu mà wi disyan wo mà wo syɔ wò kapere ma de mà ti yaʔa wo kan mà yala Nyɛʔɛlɛ li nadanma yraʔa ki kpangbanma ní me.

⁸ Lí ma wo haʔa ceŋge mà wo kan ticlimi mì bɛfu ní, ní kacɛnmɛ mì bɛfu ní.

⁹ Ki pomo na me, lí ma li nadanma kahrala tyɛʔɛ wo na mà yala ga nì ki da li glán á liʔi kon máʔà yaʔa mâ yo lí biʔi hanri Krisi fanŋa ni ge.

¹⁰ Li daʔá yo ban mà yo ki nyiŋi nàʔa gá ba dyɛʔɛ ge, pa li namuru ní tra yrɛbɛ pì bɛfu kpoʔolo teme na hɛn nigbe bí bo pi yugu na, ŋa wí nyɛ Krisi we.

¹¹ Nyɛʔɛlɛ li dá wo fara wa wò kpoʔolomo ni Krisi nì jango wo po li woolo bì yala ga nì li da glú mâ kon mâ yaʔa ge. Liì li la lí na kaʔa kè bɛfu hanri ná yala li nadanma honriʔi ní ge.

¹² Ki kala na, wòó bee wó ma klu mâ wò honriʔi pa Krisi na we, wo da Nyɛʔɛlɛ li kmara sonni de.

¹³ Yèé fanna yé ma kanyɛmɛ kayoro loʔo de da tí nyɛ yè syɔmo kayotanʔa ge. À ye pa Krisi na we. Ki nyiŋi na ge, Nyɛʔɛlɛ à li li dyɛ̀nlɛ pa le ye na, la lí nyɛ Nyɛʔɛlɛ li Nyìli le, la Nyɛʔɛlɛ li dá li nofele kon ye ma ge.

¹⁴ Nyɛʔɛlɛ lí ma Nyɛʔɛlɛ li Nyìli kan le wo ma nɛbo krɔkplɛʔɛ gi fɔ bì ba no nyiŋi ga na lí bi ba wò syɔmo funŋu me, jango woʔo cɛn wo yo wó gà ba krɔʔɔ ki tɔ ta, li dá ga nofele kon li woo ma be. Ki kala na, wo da Nyɛʔɛlɛ li kpangbanma sonni me.

Pɔli wi nyɛrimi

¹⁵ Ki kala na, mà kpe nyiŋi ga na mi daʔa loʔó mâ yo yé ma pa wò fɔlɔ Jesu na we ní pomo ma nì sɛrifɛɛ pè bɛfu pé na ye glanʔa ge,

¹⁶ à mi na Nyɛʔɛlɛ syeri le su yè kala na le mà na nyɛri ye kan su,

¹⁷ jango wò fɔlɔ Jesu wi Nyɛʔɛlɛ, la lí nyɛ kpangbanma paʔama mi To we, li ticlimi kan ye ma, li nì liʔi kan ye ma ye da ga cɛnni lí na teri ye na ge, jango ye gbàn ye li cɛn kmaʔa.

¹⁸ Mí na Nyɛʔɛlɛ nyɛri le jango li yè dihon nyɛʔɛ we yè na ye gbàn ye li kpɛnmɛ nya me, ye li yerime mi honriʔi pahaʔa cɛn ge mà plɛn krɔʔɔ ga nì lí ma hanri mâ yaʔa li woo kan be ní ki kmara nì de.

¹⁹ Ye nì yeʔe cɛn pomo ma na li fanŋa kí ma kpɔʔɔ mâ toro wòó bee namyɛlɛ na wó ma pa lí na ge. Ki pomo mí ma yala li fangbɔʔɔ ki tunŋu kɔmo ní me.

²⁰ Ki fandege ní, li dá tunŋu kɔ wa Krisi na we nyiŋi ga na li dɔɔ nyɛ́ móò yrigi wa kuu ni be móò tɛnŋɛ wa li kaligyɛʔɛ na wa namuru ni de.

²¹ Wí nyɛ wa klɛnhaʔa yugu fɛrɛ ní, fanŋa fɛrɛ ní, sye fɛrɛ ní, masaʔa nì pì bɛfu yugu na mà plɛn yegee kè bɛfu ní gee ké nyɛ naʔa tra na de mà plɛn namuru woʔo ní ge.

²² Nyɛʔɛlɛ à li yrɛbɛ pì bɛfu tyɛʔɛ wi cyeʔe noʔo na mòo krɛʔɛ wi po sɛrigo ki yugu kaʔa kè bɛfu na.

²³ Sɛrigo kí nyɛ Krisi wi wre. Wí na ti nyini nɛ pa wí na yrɛbɛ pì bɛfu nyini pomo ma na ge.