EBRUYEE 1 - NYƐʔƐLƐ LI KÀYORO

Nyɛʔɛlɛ lí ma yo wo nì li pyɔ wi fanŋa ni

¹ Fanfan ni we, Nyɛʔɛlɛ li dáa nyu cɛn cɛn wò tokpɔɔ ni be li leyoo pe noro ni pomo fafaʔa nì.

² Di ki wlɛrɛ da ni tí nyɛ tanʔara de, lí ma yo wo nì li Pyɔ fanŋa ni ge. Li dá drunya hanri we wiì fanŋa ni mà yo yrɛbɛ pì bɛfu pi ba glɛn wiì kan.

³ Nyɛʔɛlɛ li Pyɔ wí nyɛ kpɛnmɛ paʔama mà po li pomo na. Wí na yrɛbɛ pì bɛfu cun li fanŋa kayoro ní de. Wi da gâ ga funŋu kɔ kí bi gân hɛɛn pe kapere tí da yari pé kan ge, wɔ̀ɔ yâ glɛn wa namuru ni Nyɛʔɛlɛ li kaligi na, la lí nyɛ sye wì bɛfu fɔlɔ we.

Nyɛʔɛlɛ li Pyɔ wí kpɔʔɔ mlɛŋɛyee na be

⁴ Wí ma kpɔʔɔ mlɛŋɛyee na be mà yala yele la nì Nyɛʔɛlɛ lí ma kan wí ma ge, la lí ma kpɔʔɔ pe woʔo na ge.

⁵ Mɛjɛn Nyɛʔɛlɛ li ìn jeʔe yo mlɛŋɛ wà ma bí yo: Mo wi na Pyɔ we. Mí ma ma he alaʔa nî ge. Li ìn jeʔe yo mlɛŋɛ wà kala na bì yo: Mí bi bo wi To. Pɔɔ bo na Pyɔ.

⁶ Ali nyiŋi ga na li dá bì li Pikplɛɛ troʔo we naʔa drunya ni we, à li yo: Kí ma yala mlɛŋɛyee pè bɛfu pe dɔɔ kpɔʔɔ.

⁷ Di li daʔá yo mlɛŋɛyee namyɛlɛ na mà yo: Lí na li mlɛŋɛyee krɛʔɛ be tiflɛʔɛ mà na li tungɔɔ krɛʔɛ be kɔnyigee.

⁸ Ɛɛn di, li daʔá yo li Pyɔ wi namyɛlɛ na le mà yo: Nyɛʔɛlɛ, ma masaʔa paʔa go be nyiŋi kì bɛfu na. Má na ma hɛɛn sinni be sinmi ní.

⁹ Sinmi mí na ma glanʔa. Klomo à mi na ma bɛnʔɛ. Ki kala na, Nyɛʔɛlɛ la lí nyɛ ma Nyɛʔɛlɛ le, lí ma ma fara ma ma kân lafiʔigbɔmo nì mà toro ma nibyee na be.

¹⁰ À li ní mà yo nɛ: Wò fɔlɔ, drunya wi hlinyiŋi na, ma dá tra yrigi de mà namuru hanri ma kyɛdaʔa nì ge.

¹¹ Ki wobo pí bi ba gɔ, di mo we, pa ma go be su. Ee, pì bɛfu pí bi ba lɛ nɛ pa dreʔe nyɛ ge.

¹² Pa ma pi klolo nɛ pa drekpɔʔɔ nyɛ ge. Ee, pí bi ba grɛʔɛ nɛ pa drere nyɛ de. Di mo we, pa ma go be su bagrɛʔɛ. Mɛ ìn bi gà lɛ fyeu.

¹³ Nyɛʔɛlɛ li ìn jeʔe yo li mlɛŋɛyee wà ma bì yo: Ma ba glɛn na kaligi na fɔ bì ba ma bɛnfɛɛ le be wa ma cyeʔe noʔo na nɛ bo ke pahaʔa gi ge.

¹⁴ Mlɛŋɛyee pe tunŋu kí nyɛ nyaʔa ní? Pè bɛfu pé nyɛ nyìgée gee ké na Nyɛʔɛlɛ li tunŋu ko ge. À li na ke tunnu jango ke yaa bee hari lí bi syɔ ge.