DANYƐLI 1 - NYƐʔƐLƐ LI KÀYORO

Danyɛli nì, wi nagroboo ní pé kɛri Babilɔni ni

¹ Jowakimu ŋa wi dá bo Juda klo masanaŋa we, wi da glɛ́n masaʔa na mà ta yɛʔɛ̀ tanri. Tanriwolo na le, Babilɔni klo masanaŋa Nabukodonosɔri wɔ̀ɔ pan mà bâ Jerusalɛmu kàʔà kɛli ge.

² Wò Fɔlɔ wɔ̀ɔ Jowakimu le wi kyɛrɛ̀ ni mòo yaʔa wɔ̀ɔ Nyɛʔɛlɛ li sraʔa go yrɛbɛ pà kpe kpo. Nabukodonosɔri wɔ̀ɔ kaso fɛɛ co mà kɛri pé ni wa Babilɔni klo ni. Ki yrɛbɛ ba wi dá da wɔ̀ɔ bâ pi tyɛʔɛ wa wi nyɛʔɛŋɛɛ ke sràʔá go ni, wa krɔʔɔ tyɛʔɛhaʔa ki gopyɔ ni we.

³ Nabukodonosɔri wɔ̀ɔ kí yo wi tungɔɔ pe lagwɔ ma ŋa pé na yeri Asyepenasi we mà yo wi Israyɛli najɛɛ pèè fara wa masanaŋa heme woo ni be, ná kiì ban, yegbɔʔɔlɔ fɛɛ pe heme woo ni be.

⁴ Ki najɛɛ be, ki ìn yala jɛnlɛ là bí bo wa pe wre deʔe kà na, di kí ma yala pe po kmala. Pe po tikparibele. Pe po ticlibee. Pe po nɛ kaʔa cɛnfɛɛ, pe nì pe po kɔrɔsifɛɛ, jango pe gbàn pe da masanaŋa wi tunŋu ko wa wi masaʔa go ni ge. Pe pe krɛ̀ʔɛ̀ Babilɔni klo hɛnrɛ ní, ní ti nyoŋomo ní me kpo.

⁵ Masanaŋa wɔ̀ɔ yo wlɛʔɛ kì bɛfu na akaba ba wiì wí na ka, pee pi nyoʔo kiì kanʔa pe ma, ní hunmù tyɛnlɛ la nì wiì wí na jo ge, pe pe krɛ̀ʔɛ̀ fɔ pe ta yɛʔɛ́ tanri. Ki nyiŋi nàʔa kɔ, pe je wa wi tunŋu ni, pee ki ko.

⁶ Juda kluʔu najɛɛ ticɛrɛ dá bo wa bee ni pe dá fara ge pé bee: Danyɛli nì, Ananya nì, Mikayɛli nì, ní Asariya nì.

⁷ Masanaŋa wi tungɔɔ lagwɔ wɔ̀ɔ yegee kèè kan pé na fonŋoo. Pe dáa Danyɛli yeri Bɛlitasari, na Ananya yeri Syadraki, na Mikayɛli yeri Mesyaki, na Asariya yeri Abɛdi Nego.

⁸ Danyɛli wɔ̀ɔ yereʔe na wa wi dihon na mà yo wi ìn bi masanaŋa wi akaba kà bì wi dufɛn jɔ jango wò gá wì kran Nyɛʔɛlɛ li yɛʔɛ̀ na. Ki kala na, wɔ̀ɔ kí yo tungɔɔ pe lagwɔ ma mà yo wò gɔɔ ciʔili wi wì kran ki akaba nì be.

⁹ Nyɛʔɛlɛ à liʔi hanri ga wi da nyɛrí ge. Tungɔɔ pe lagwɔɔ wɔ̀ɔ kí syɔ dihonkmaa ní, ní honrigmaʔa nì.

¹⁰ Di lagwɔ wɔ̀ɔ Danyɛli po we: «Na fɔlɔ masanaŋa wiì tapolo wi wí maʔa yo ga yé bi da ga ní ga nì ye bi da jo ge. Mí na fyaʔa mà yo wò gá ba ye nya yé ma waʔa mà toro najɛɛ pe tɔɔ na bee yè nibyee be. Nàʔa hanri ban, yèé yè kala na, masanaŋa pɔɔ ki hanri pe na yugu kon ge.»

¹¹ Mà kan, Danyɛli wɔ̀ɔ kí yo naŋa ŋa ma tungɔɔ lagwɔ wi da pé kan mâ yo wi da hanri pé kan, wiì nì, ní wi nagroboo ní be mà yo:

¹² «Mí na ma fɛn, ma wo po ma wo wele wlɛrɛ kɛ kpafoʔo ni. Pee hyɛʔɛ yrɛbɛ kanʔa wo ma. Woo piì ka, nyumu ní, woo jo.

¹³ Ki kruʔu ma, ma ba wò wre wele de, ma ti tonli najɛɛ bee woro ní pé na hro tyɛnlɛ nigbe li masanaŋa nì we. Ki nyiŋi na, ga má bi hanri wò namyɛlɛ na, pa maʔa hanri bì yala ga nì má ma nya ge.»

¹⁴ Naŋa wɔ̀ɔ yere ki kayoʔo na mà Danyɛli nì, wi nagroboo po mà pe wele wlɛrɛ kɛ kpafoʔo ni.

¹⁵ Ki wlɛrɛ kɛ ti da gâ funŋu kɔ, à peʔe wele màʔa nya Danyɛli nì, wi nagroboo ní pe wre ti dá bo kmara. À pe po fanŋa nì, mà toro najɛɛ bee na pe dáa masanaŋa wi hro tyɛnlɛ li le, da pe dáa ba wa wi tabali na we.

¹⁶ Ki kala na, naŋa ŋa wi dáa pe kaʔa tyonri ge wi ìn dàá ki hro nì, ní ki dufɛn wà kanʔa pé ma, ba pe dá yo wii ganʔa pé ma ge, di wi dáa hɛʔɛ yrɛbɛ pii kanʔa pé ma.

¹⁷ Nyɛʔɛlɛ à liʔi kan ki najɛɛ ticɛrɛ ma, à pe na kaʔa ceʔe ge mà po kaʔa cɛnfɛɛ ceŋge hɛnrɛ ti cɛnmɛ namyɛlɛ na, ní ticlimi nì me. Mà kan, Danyɛli wi dáa gbanni mà na anyaʔama tyɛnʔɛ kè bɛfu ní,ní ŋloro tì bɛfu ti kɔ̀rɔ́ cɛnni we.

¹⁸ Nyiŋi ga masanaŋa Nabukodonosɔri wi da gón ki da gâ gɔ kɔ, ga na pe dá bì ba najɛɛ pè bɛfu tyɛʔɛ wí na, bee pe dá fara, wi tungɔɔ lagwɔɔ wɔ̀ɔ pan pé ni.

¹⁹ Masanaŋa wɔ̀ɔ bâ yo pee pè bɛfu ní, di wi ìn wà nigbe nya wa pee ni be ŋa wí ma yala mâ po nɛ pa Danyɛli nì, ní Ananya nì, Mikayɛli nì, ní Asariyayee nyɛ be. Ki kala na pee bee pe dá yala à pe je wa wi tunŋu ni ge.

²⁰ Ki dá bo masanaŋa nòo pe yugu kala o kala nì, la lí nyɛ ticlimi nì, ní kala cɛnmɛ namyɛlɛ na, pee pé bi krumahru ŋa kan ge, wi na po kmaa ceŋge fɔ mà toro wi masaʔa klɛnmɛ mì bɛfu mi cɛlɛfɛɛ ní lekaala pè bɛfu pe krumahru na we.

²¹ Danyɛli wi dáa masanaŋa wi tunŋu ko ge fɔ mà bâ no Sirusi, ŋa Pɛrisi masanaŋa, wɔ̀ɔ bâ grɛʔɛ Babilɔni masanaŋa.