AGIJE 1 - NYƐʔƐLƐ LI KÀYORO

Nyɛʔɛlɛ li sraʔa go ki fanfonmo

¹ Masanaŋa Dariyusi wi masaʔa yɛʔɛlɛ syɛn wolo li yere noli woʔo ki wlɛgblɛʔɛ na, Bajegɔ Nyɛʔɛlɛ à li yo li leyoo Agije no na, wɔ̀ɔ kí yo Juda klo kundiʔi Sorobabɛli ma we, wi dá bo Seyalicɛli najɛ, ní sraʔa farafɔlɔ Josuwe ma we, wiì wi dá bo Josadake najɛ.

² Sye wì bɛfu fɔlɔ Bajegɔ Nyɛʔɛlɛ à li yo: «Ki hɛɛn bee pé naʔa nyu mà yo Bajegɔ Nyɛʔɛlɛ li sraʔa go ki fannyiŋi ki ìn je dyɛʔɛ kpɛn.

³ Ki kala na, Bajegɔ Nyɛʔɛlɛ lí ma yo li leyoo ŋa li tungɔɔ Agije wi no na mà yo:

⁴ Yèé ma be, kí nyɛ ylaʔa yo ye klɛn wa yè gokmara ni de mà feri yrɛkmama ní, di Bajegɔ Nyɛʔɛlɛ li sraʔa go ki kò be toʔo ge yo?

⁵ Ki kala na, Sye wì bɛfu fɔlɔ Bajegɔ Nyɛʔɛlɛ lí yo: Kloʔo ga yé ma kpe ge, ye honriʔi na kmaʔa ceŋge.

⁶ Ye dá akaba fafaʔa ton, di ye ìn ba akaba fafaʔa ta bì pi kon. Yé na li, di yoò na tinli. Yé na jo, di yè nyujɔʔɔ ki in je gɔ. Kpasyoro nyɛ ye na lere, di toò na wyere ko ye na. Wa yèé ni bee pé na tunŋu ko mâ na gbejanra taʔa, pé na ti wa kasyara da ni tí nyɛ fruguru ge.

⁷ Bajegɔ Nyɛʔɛlɛ la Sye wì bɛfu fɔlɔ à li yo: Kloʔo ga yé ma kpe ge, ye honriʔi na ceŋge.

⁸ Ye luʔu wa angogo na, ye pan tiri ní, ye ba sraʔa go fan ge. Paʔa glan domi nì we, pa mi kpɔʔɔmo ta Bajegɔ Nyɛʔɛlɛ à li yo ban.

⁹ Ye dáa honri na pa akaba fafaʔa tama na, di ye ìn ba akaba fafaʔa ta. Ye dáa ki honri mà yo yé bi yè akaba kon bì ban pí ni yè goro ni nyiŋi ga na, à mi pì bɛfu fɛ na no tiflɛʔɛ ní ge. Ki dá hanri nyaʔa kɔsɔ na? Mɛjɛn na sraʔa go kí ma cɔʔɔ, di yèé yè bɛfu nigbe nigbe yé na fyala na yè gotara fanri de.

¹⁰ Ki kala na, namuru da wa yè yugu na ge, ti ìn ki ta bì kamɛŋɛ kà kan ye ma. Tra ti ìn ki ta bì akaba ba kan ye ma yé na fali ge.

¹¹ Mí ma waama hanri, à mi co wa yè kere ni de, yè angoro ní, yè ble nì, ní yè hrɛsɛn nì, yè hunmu farahara ní, ní tra ti tonro tayrɛbɛ nì, ní hɛɛn ní, ajobo nì, ní yè kyɛʔɛ ahranma pì bɛfu ní.»

¹² Ki nyiŋi na, Seyalicɛli najɛ Sorobabɛli nì, ní Josadake najɛ ŋa sraʔa farafɛɛ kundiʔi Josuwe nì, ní hɛɛn pe tɔɔ pè bɛfu ní, à pe nagruʔu can, jango bì Bajegɔ Nyɛʔɛlɛ la pe Nyɛʔɛlɛ li noyomo loʔo ma mi dá yo Nyɛʔɛlɛ leyoo Agije ma wi mi yo pé kan ge. Hɛɛn pè bɛfu à pe fya Bajegɔ Nyɛʔɛlɛ na le.

¹³ Bajegɔ Nyɛʔɛlɛ li dá Agije tun wi ba yo ki hɛɛn bee ní bì yala liì Bajegɔ Nyɛʔɛlɛ li tunmu ní ma li dá gan wí ma ge mà yo: «Mí nyɛ ye nì.»

¹⁴ Ki kruʔu ma, Bajegɔ Nyɛʔɛlɛ à li Juda klo kundiʔi Sorobabɛli nì, sraʔa farafɛɛ kundiʔi Josuwe nì, ní hɛɛn pè bɛfu kan dihon nì. Pè bɛfu pe dá ban mà bâ Bajegɔ Nyɛʔɛlɛ la Sye wì bɛfu fɔlɔ li sraʔa go tunŋu hli ge.

¹⁵ Ki dá hanri masanaŋa Dariyusi wi masaʔa yɛʔɛ syɛn wolo li yere noli woʔo ki wlɛrɛ fonɛrɛ mà kɛ̀ ticɛrɛ woʔo na.