2 SAMYƐLI 1 - NYƐʔƐLƐ LI KÀYORO

Dafide wí ma Sawuli wi kùʔù kayoʔo loʔo ge

¹ Sawuli wi kùʔù kruʔu ma, Dafide wi dá jɛ wa Amalɛki woo pe jahaʔa na mà bâ glɛn wa Siklagi ni mà ta wa wlɛrɛ syɛn.

² Wlɛrɛ tanriwoʔo na, à wà ma jɛ wa Sawuli mlaʔa deʔe na ge mà pan. Wi drere à ti po hluguru. Taplɔʔɔ àʔa po wa wi yugu ni ge nɛ pa hɛn ŋa nyɛ wà ma ku wi ma ge. Wi bâ no Dafide tanla nyiŋi ga na, wɔ̀ɔ kpɔbu tra na.

³ Dafide wɔ̀ɔ wi yugu mà yo: «Má ma jɛ hanbe?» Wɔ̀ɔ Dafide po: «Mí ma jɛ Israyɛli woo pe mlaʔa kmohaʔa na mà fɛ̀ mà syɔ.»

⁴ Dafide wɔ̀ɔ yo nɛ: «Kí ma hanri wa mɛlɛ?» Wɔ̀ɔ Dafide po we: «Wò hɛɛn pé ma fɛ mà craʔa wa mlaʔa deʔe na ge. À pe hɛɛn fafaʔa kpo wo ni kpo. Ali Sawuli nì, ní wi najɛ Jonatan nì pe plɛ́n mà ku kpo.»

⁵ Najɛpii ŋa wi da bâ ki kayoro yo de, Dafide wɔ̀ɔ wi yugu mà yo: «Maʔá po mɛlɛ máʔà cɛn mâ yo Sawuli nì, ní wi najɛ Jonatan nì pe ku ge?»

⁶ Najɛpii wɔ̀ɔ Dafide po we: «Mi dá bo wa kalɛʔɛ na Gilibowa angogo na ge mà Sawuli nya wa nroʔoŋo wi colo na le mà nì mà Filisite klo woo pe syon kɔrɔrɔ fɛɛ nya ní pe syongida fɛɛ ní pé na flo naʔa wì tanla.

⁷ Wi gâ wele mà na nya ge, wɔ̀ɔ na yeri, à mi syɔ wí ma.

⁸ Wɔ̀ɔ na yugu mà yo: ‹Han wi má ni?› À muu po: Mí nyɛ Amalɛkiyee woo wi ná ni.

⁹ Wɔ̀ɔ na po: Ma flo naʔa nà tanla ma ba na kpo, mɛjɛn mí naʔa na cɔlɔ ceŋge, di mi ìn gu kpɛn.

¹⁰ À mi flo wì tanla mòo kpo, mɛjɛn mi dɔɔ́ nya màʔa cɛn mà yo, nòo to, wòo gban bì go nyuwyeʔe na adi. Ki kruʔu ma, mi dá wi masaʔa jala kɔ le wa wi yugu na mà kpɛnlɛ fara wa wi kyɛʔɛ na mà pan pí ni má kan.»

¹¹ Dafide wɔ̀ɔ taʔa mà wi drere co mà ti hlugu. Bee pe dá bo wí ni, à peʔe hanri ban kpo.

¹² Kùʔù kayaga àʔa je pé ni, à pe kpele mà su co mà yaa kɔ ge. Pe daʔá hanri ban Sawuli nì, Jonatan nì pee kala na, ní Bajegɔ Nyɛʔɛlɛ li hɛɛn Israyɛli woo pe kala na le, bee Filisite klo woo pe da gbó mlaʔa ni ge.

¹³ Ki kruʔu ma, Dafide wɔ̀ɔ najɛpii yugu ŋa wi dá ban mâ ba ki kayoro yo de wì ma ge mà yo: «Má ma jɛ hanbe?» Wɔ̀ɔ yo: «Mí nyɛ Amalɛki woo naŋa wa najɛ wi ná ni ŋa wi bâ glɛn naʔa ye nì ge.»

¹⁴ Dafide wɔ̀ɔ wí po: «Nyaʔa ma po mɛ ìn dì fya, á maʔa ta mâ masanaŋa ŋa kpo Bajegɔ Nyɛʔɛlɛ lí ma fara ge?»

¹⁵ Dafide wɔ̀ɔ wi najɛɛ wà yeri mà bɔ́ɔ̀ po: «Flo wa wì tanla. Moo kpo!» Ki woo wɔ̀ɔ taʔa ma Amalɛki woo najɛ kmo mòo kpo

¹⁶ Dafide wɔ̀ɔ wí po: «Ma kapeʔe ma kan, á ma ku ge. Mɛjɛn ma notaʔa kiì ma kiti kon ma na ga na má maʔa yo mâ yo má ma masanaŋa ŋa kpo Bajegɔ Nyɛʔɛlɛ li dí fara ge.»

Dafide wi kùú konlo ŋuʔu Sawuli nì Jonatan kala na

¹⁷ Dafide wɔ̀ɔ kuu konlo ŋuʔu ŋu Sawuli nì wi najɛ Jonatan nì pe kùʔù kala na le.

¹⁸ Wɔ̀ɔ yo pe Juda kluʔu woo krɛʔɛ be ki ŋuʔu ní ge. Anda ŋuʔu gi. Kí nyɛ wa nyoŋoʔo Hɛnsinŋi wi sɛbɛ ni we.

¹⁹ E Israyɛli, wa ma angoro na, pé ma ma mlagmoo dihon fɛɛ kpo be. Ma braʔa fɛɛ pè bɛfu pé ma to!

²⁰ Yò gaʔa yo wa Gati kàʔà ni ge. Yò gá ki kayoro jari de wa Asikalon kalama kloro ni de, jango kò gaa glanʔa Filisite klo cɛɛ ni be. Balegebee pe cɛɛ pò gáa bin lafiʔimi nì.

²¹ Gilibowa angoro, kamɛŋɛ ní, hɔgɔ nì pò gá do wa ye na. Kere da tí na akaba seri tò gá ye ton adi! Mɛjɛn pé ma mlagmoo dihon fɛɛ pe timoro atɔʔɔbɔ wa wa ki deʔe kiì na nɛ pa yrɛbɛ ba nyɛ pé ma kran ge. Pe ìn bi je ga hùnmù mà krugu wa Sawuli wi timoro atɔʔɔgɔ na ge adi.

²² Jonatan wi anda ki ìn dàá sye mlaʔa ma, kí po ki ìn hɛn kla bì disyan wo ge. Sawuli wi mlaʔa kpele li ìn dàá nuŋu kruʔu ma, kí po li ìn wi bɛnfɛɛ kmo be.

²³ Sawuli nì, Jonatan nì pe dáa pe glanʔa mà po yoflinmi nì. Pe wyeme nyiŋi na yoo, pe kùʔù nyiŋi na yoo, pe ìn ki ta bì laʔa pe na. Pe dá bo ticaʔabaa mà toro kajɛnrɛ da na pé na yeri nyoyee be. À pe po fanŋa ni mà toro jariyee na be.

²⁴ Israyɛli picɛɛ, yee gbèlé Sawuli na we, ŋa wi dáa kpasyonyɛrɛ ni ye na mâ na ye feri ge. ŋa wi dáa tɛ yrɛbɛ fafaʔa pun wa yè drere na de.

²⁵ Ki ma po mɛlɛ, à pe yâ ki braʔa fɛɛ kpo be mâ pe wa wa mlaʔa deʔe na ge? Kí ma po mɛlɛ, á pe Jonatan kpo móò wa wa angogoo na ge?

²⁶ Na lama mí na na ya, nasyɛnwoo Jonatan mo ma kala na le. Ma dí bo na na glanʔa ceŋge. Mi dáa mo glanʔa we pomo ma na, àʔa po kapraʔa woʔo. Ma dáa na glanʔa fɔ mà toro cɛɛ pe glanʔama na me.

²⁷ Kí ma hanri mɛlɛ, á pe ki braʔa fɛɛ bee can be? Kí hanri mɛlɛ mlaʔa kmoyrɛbɛ á pi punŋu ge?