2 PYƐRI 1 - NYƐʔƐLƐ LI KÀYORO

Syeriʔi

¹ Mì Simo Pyɛri ŋa Jesu Krisi wi ŋklo we mâ po wi pitunŋu we mí bi ki sɛbɛ ŋa troʔo we wa yèé bee ma yé ma pademe ta Jesu Krisi wi sinmi fanŋa ni ge ma mí nyɛ kmama nɛ pa wò womo nyɛ me. Wiì wi ŋa wí nyɛ wò Nyɛʔɛlɛ mâ po wò Syɔfɔlɔ we.

² Frɛmɛ ní, nyimi ní pi kpɔʔɔ ye ma, Nyɛʔɛlɛ ní, wò fɔlɔ Jesu ní pe cɛnmɛ fanŋa ni ge.

Sɛrifɛɛ pe yerime ní, ní pe frala nì

³ Wi Nyɛʔɛlɛ pomo fangbɔʔɔ kí ma yrɛbɛ pì bɛfu kan wo ma ba pí bi gban bí wo haʔa wó da danri wó da Nyɛʔɛlɛ kpɔʔɔ le. Li cɛnmɛ fanŋa ni, wó ma ki wobo ta be. Liì li lí ma wo yeri li kmara nì, ní li kmama nì pi fanŋa ni ge.

⁴ Li pomo na me, lí ma nofegee kan wo ma, gee ké nyɛ kmaʔala mâ po kpandoʔolo, jango, ke fanŋa ni, ye syɔ cɔʔɔmo ma ma mí nyɛ naʔa drunya ni we kapere laa como kala na le bì yè tama ta wa Nyɛʔɛlɛ pomo ni me.

⁵ Kiì kala na, ye yè kpanŋi yè dihon wì bɛfu ní, ye tanʔagmama haʔa wa yè pama na me. Ye nì ye kacɛnmɛ haʔa wa tanʔagmama na me.

⁶ Ye macomo cɛnmɛ haʔa wa kacɛnmɛ na me. Ye nì ye lagunmu haʔa wa macomo cɛnmɛ na me. Ye Nyɛʔɛlɛ li kpɔʔɔmo haʔa wa lagunmu na me.

⁷ Ye nì ye hedeme glanʔama haʔa wa Nyɛʔɛlɛ li kpɔʔɔmo na me. Ye glanʔama haʔa wa hedeme glanʔama na me.

⁸ Mɛjɛn ki wobo ba, nà pi po ye ma ge, nà kà bí da hari wa pi na nɛ ge, pa pi gan yò gá bo tinyamaa bì bo kabanoyee, ga na yé na wò fɔlɔ Jesu Krisi cɛnni we.

⁹ Di ki wobo poò nyɛ hɛn ŋa ma ge woò na nyaʔa leʔe fɔ wí nyɛ fyon. Wí ma lama wɔ pomo ma nì wi fanfan kapere ti jeʔé mâ laʔa wí na ge.

¹⁰ Kiì kɔsɔ na, na woolo, yeʔe yaʔa kà bí da hari wa ga na yé na yè kpanŋi ge, ye yè yerime ní yè frala kala hanri ye li cò kmaʔa. Mɛjɛn, nà ye da ki woʔo ga hanri ge, yòo ba grugu bì do kapeʔe ni fyeu.

¹¹ Ki pomo na me, Nyɛʔɛlɛ pa li kloʔò hanri bìʔi nyɛʔɛ ye kan ye je wa Jesu Krisi wi bajegɔ masaʔa ni ge, ŋa wí nyɛ wò fɔlɔ mâ po wò Syɔfɔlɔ we.

¹² Kiì kɔsɔ na, mí bi da lama tun ye na su ki kaʔa ní ge, ali nàʔa ja bo yèé yé ma ke cɛn kɔ ge mà hri wa kanyɛmɛ ma ni yé ma ta kɔ ge.

¹³ Ee, nà mi po nyuwyeʔe na adi, mí maʔa honri mà yo kí ma yala bì da lama tun ye na ki kaʔa ní ge bì da dihon kanʔa ye ma.

¹⁴ Mɛjɛn mí maʔa cɛn mà yo, nyiŋi ga na mí bi ba nyini wa na wre ni de, kí na nori mà yala ga nì wò fɔlɔ Jesu Krisi wi dá yo mâ fligi ná kan ge.

¹⁵ Di mí bi da nà kpanŋi jango na kùʔù kruʔu ma ge ye gbàn yee lama tun ki kaʔa ní ge nyiŋi kì bɛfu na.

Bee pé ma Krisi wi kpangbanma nya me

¹⁶ Nyiŋi ga na wo dá wò fɔlɔ Jesu Krisi wi fangbɔʔɔ ní, ní wi panma tyɛʔɛ me ye na ge, migoro ban wo dáa nyu ye kan ge. Di wo dá wi kpangbanma nya me wò nyɛʔɛ ní ge.

¹⁷ Wo dá bo wa, nyiŋi ga na wi dá sonmo nì, kpɔʔɔmo ta To Nyɛʔɛlɛ ma le. Ki nyiŋi na ge, ákpolo là dà nyini wa kpangbanma paʔama ni me mà yo: «Ki woo ŋa wí nyɛ na piglaan wi. Wí na na glanʔa ceŋge.»

¹⁸ Nyiŋi ga na wo dá bo wí ni wa angogmala yugu na ge, wòó tapoboo à wo ki àkpolo loʔo, nyiŋi ga na li dá nyini wa namuru ni de.

¹⁹ Ki pomo na me, wó maʔa nya Nyɛʔɛlɛ leyoo pe kayoro da tí nyɛ wo ma ge tí ma yala wò pama ní me ceŋge. Nàʔa po ban, paʔa bo pronʔo ye da ki kayoro kɔrɔsi de nɛ pa lamba nyɛ ŋa wí na nyi mà na pari wa wɔmo deʔe na fɔ kpɛnmɛ mi to, nyibaaŋolo li ba kpɛnmɛ paʔa wa yè dihon ni we.

²⁰ Di kí ma yala ye ki woʔo ga cɛn kpɛn ye yo Nyɛʔɛlɛ leyoo pe kayoro da tí nyɛ wa nyoŋoro li sɛbɛ ni we, hɛn wà wóo gban bì tà kɔ̀rɔ́ cɛn wi fandaʔa ni ge.

²¹ Mɛjɛn Nyɛʔɛlɛ li leyoo kayoro tɛ ìn dà yo bì yala hɛn nadanma ní dron. Di Nyɛʔɛlɛ li Nyìli li dáa hɛɛn sinni be. À pe na Nyɛʔɛlɛ li kayoro nyu de.