2 KORƐNTE 1 - NYƐʔƐLƐ LI KÀYORO

Pɔli wí ma Korɛnte kàʔà sɛrifɛɛ syeri be

¹ Mì Pɔli ŋa Jesu Krisi wi pitunŋu wà wi ná ni ge mà yala Nyɛʔɛlɛ li nadanma ní me ní wò syɛnwoo Timote nì, wó ma ki sɛbɛ ŋa troʔo we Nyɛʔɛlɛ li sɛrigo ma ga kí nyɛ wa Korɛnte kàʔà ni ge mà plɛn sɛrifɛɛ pè bɛfu ní bee pé nyɛ wa Akayi klo lì bɛfu ni ge.

² Wò To Nyɛʔɛlɛ ní, wò fɔlɔ Jesu Krisi nì pe frɛmɛ ní nyimi kan ye ma.

Pɔli wí na Nyɛʔɛlɛ syeri le

³ Wo da Nyɛʔɛlɛ kpɔʔɔ le la lí nyɛ wò fɔlɔ Jesu Krisi wi To we. Lí nyɛ To ŋa wi wí na nyugara taʔa mà po Nyɛʔɛlɛ la lí na wo hari wò kaʔa kè bɛfu na ge.

⁴ Liì li lí na wo hari wò cɔlɔʔɔ kì bɛfu na ge, jango wòó fanna wo da gbànní woo pèè hari pe cɔlɔʔɔ kì bɛfu na haʔama ma nì liì Nyɛʔɛlɛ li dá wo haʔa ge.

⁵ Mɛjɛn pomo ma na wó ma cɔlɔʔɔ fafaʔa ta Krisi ni we, ki podeme miì na wó bi ba haʔama fafaʔa ta Krisi ni we.

⁶ Nà wo da jɔlɔ, ki na po wó na cɔlɔ yè haʔama ní, ní yè syɔmo kala na. Nyɛʔɛlɛ nà li wo haʔa, ki na ní mà po yè haʔama kala li. Ki haʔama mi fanŋa ni ge, pa ye gban bì da cɔlɔdege kaʔa kunnu yè nî gee ké na wo cɔlɔ ge.

⁷ Ki honriʔi àʔa po wa wo ma ceŋge yè kala na le. À woʔo cɛn mà yo pomo ma na yé ma yè woʔo ta wa wò cɔlɔʔɔ ni ge, ki podeme na yé bi yè woʔo ta wa kpo haʔama ma ni Nyɛʔɛlɛ lí na kanʔa wo ma ge.

⁸ Na woolo, cɔlɔʔɔ ga ki dá wo ta wa Asi klo ni le, wó ma cori ye po ki cɛnmɛ ni. Ki dá bo gbanʔa ceŋge mà wɛ wò fanŋa kì bɛfu na fɔ wo ìn dàʔa cɛn bì yo wó bi go nyuwyeʔe na adi.

⁹ Wo dá bo naʔa nyaʔa nɛɛ wò kùʔù kayoʔo pé maʔa yo kɔ. Di ki woʔo ga ki dá hanri jango wò gáa wò honriʔi pa ge wò na fɔ woʔo pà Nyɛʔɛlɛ na la lí na kuu nyɛni ná pe yrigi ge.

¹⁰ Liì li li dá wo syɔ ki kutipeʔe ma ge. Lí bi nì bì wo syɔ nɛ. Ee, wó ma wò honriʔi pa ge liì na mà yo lí bi nì bì wo syɔ nɛ.

¹¹ Mɛjɛn yé bi wo haʔa Nyɛʔɛlɛ nyɛrimi ní me. Ki podeme na me, Nyɛʔɛlɛ pa li ba hɛɛn fafaʔabaa nyɛrimi loʔo me bì wo haʔa. Ki kruʔu ma, ki hɛɛn fafaʔabaa pa pe ba Nyɛʔɛlɛ syeri le wò kala na le.

Pɔli wí ma wi honriʔi krɛʔɛ ge

¹² Wò kpɔʔɔmo kala lí la: Wò honriʔi kí naʔa nyu wo kan mà yo wó na tanri pomo ma na naʔa drunya ni we yèé yè yɛ̀ʔɛ̀ na ge, mí nyɛ sinmi mà po kmama. Mɛjɛn woò na tanri hɛɛn ticlimi na, dí wó na tanri Nyɛʔɛlɛ li haʔama miì na.

^13-14 À wo na sɛbɛɛ troʔo ye kan dron bee yé na gbanni ná nyu ná pe cɛnni kpo ge. Ali nàʔa ja bo yé na ki cɛnri cɛnni ŋaŋa ni ge, mí ma paʔa na mà yo yé bi baʔa cɛn kmaʔa bì yo wó bi ba bo yè kpɔʔɔmo kala, yèé fanna yé bi ba bo wò kpɔʔɔmo kala wò fɔlɔ Jesu wi wlɛʔɛ na ge.

^15-16 Mí ma pa ki woʔo ga na ge ceŋge fɔ mi dáa ki honri bì doro wa ye ma kpɛn bi na gɛrí Maseduwani klo ni le. Ki kruʔu ma, nà mi gá jɛ wa Maseduwani ni we, pa mi hru bì gɛri wa yè krugu nɛ fonŋo, jango ye haʔama syɛn ta. Ki kruʔu ma, ye nà da ye na haʔa na krɛlɛ na wa Jude klo ni le.

¹⁷ Nyiŋi ga na mi daʔá yo mâ yo mí bi ki woʔo ga hanri ge, yé naʔa honri mà yo na lama mi dá bo na na kon syɛn syɛn yo? Dee di, yé yo ga mí na honri bì hanri ge, mí naʔa hanri mà yala drunya hɛɛn honriʔi ní fɔ bì «ee» nì, ní «ayo» yo nyidege na kɛ?

¹⁸ Nyɛʔɛlɛ lí nyɛ kafungee fɔlɔ pomo ma na ge, ki podeme miì na, ga mi dá yo ye ma ge ki ìn dà bo ee nì, ní ayo ní nyidege na.

¹⁹ Mɛjɛn mì nì, Silasi nì, ní Timote nì wo dá Nyɛʔɛlɛ li Pyɔ Jesu Krisi ŋa kayoʔo jari wa ye kan ge wi ìn dà bo ee nì, ní ayo ní. Di wí nyɛ Nyɛʔɛlɛ li ee wi.

²⁰ Mɛjɛn wiì wi wí nyɛ ee ŋa wí na Nyɛʔɛlɛ li nofegee kè bɛfu funŋu, mà kan Jesu wi fanŋa ni wó naʔa nyu mà yo ki po ban, jango bì da Nyɛʔɛlɛ kpɔʔɔ le.

²¹ Nyɛʔɛlɛ liì li lí na wòó ní yèé kanʔa be fanŋa nì wò kpoʔolomo ni Krisi nì we. Liì li li dá wo fara mâ wo le wa li tunŋu ni ge.

²² Liì li lí ma li jɛnlɛ pa le wo na mâ Nyɛʔɛlɛ li Nyìli kan le wo ma wa wò lama ni me jango li po nɛ pa akplɛʔɛ nyɛ ge.

²³ Nà mi flɛn, Nyɛʔɛlɛ li na kpo, mi dá na krɛlɛ ja le wa yèé Korɛnte kàʔà sɛrifɛɛ ma be jango ho gáa yɛpɛnʔɛ kan ye ma.

²⁴ Woò naʔa ca bì da ye sinni pama namyɛlɛ na le, mɛjɛn yé ma pa kmaʔa Nyɛʔɛlɛ na le. Di wó na tunŋu ko ye nì teme na, jango ye lafiʔimi ta.