1 SAMYƐLI 1 - NYƐʔƐLƐ LI KÀYORO

Ani wí ma kɛri Nyɛʔɛlɛ go ni wa Silo kàʔà ni

¹ Naŋa wà dà bo wa kàʔà kà ni. Pé naʔa yeri Hrama kàʔà wa Sufi klɛnmɛ ni. Ki dá bo wa kpo Efrayimu angoro klɛnmɛ ni. Pe dáa ki naŋa yeri we Ɛlikana na wi to yeri we Jerohamu na Jerohamu to yeri Eliyu na Eliyu wi to yeri Towu na Towu wi to yeri Sufi. Wi dá bo Efrayimu wòó woo wà wi.

² Cɛɛ syɛn dá bo wí ma. Pe dáa wà yeri Ani mà na wi tɔ yeri we Penina. Pii dá bo Penina ma we. Di pyɔ ìn bo Ani ma we.

³ Yɛʔɛ́ kè bɛfu na, ki naŋa wi dáa jrɛʔɛ wa ki kàʔà ni na sye Silo ni bì yàá Bajegɔ Nyɛʔɛlɛ kpɔʔɔ le wa la lí nyɛ sye wì bɛfu fɔlɔ we, jango bì sraʔá fara lí ma. Eli wi najɛɛ syɛn pe dá bo wa. Pe dáa wà yeri Ofini na wi tɔ yeri Finɛsi. Pe dá bo Nyɛʔɛlɛ li sraʔá farafɛɛlɛ.

⁴ Ki dá bo Ɛlikana nòo ba ajoʔo kpo ga wí fara sraʔá ge, wí na wi cɔ Penina wi karà tama kan wì ma ní wi pii pe tama ní me.

⁵ Di ki dá bo wi na ti nyoʔo syɛn kan Ani ma we wi tama, mɛjɛn Ani wi dáa wi glanʔa ceŋge. Di Bajegɔ Nyɛʔɛlɛ li ìn piheʔe kan wì ma.

⁶ Penina ŋa cɛlɛ syɛnwoo, wi dáa ki ca nyiŋi kì bɛfu na bì da Ani wi lama gbanni me, jango wi da bin lahromo nì su ga na Bajegɔ Nyɛʔɛlɛ li ìn dà ga piheʔe kan wì ma ge.

⁷ Ki woʔo ga ki dáa hanri ban yɛʔɛ́ kè bɛfu na. Ani noo kɛrí wa Bajegɔ Nyɛʔɛlɛ Go ni, Penina wi na yâ kayaga le wí ni. Ki podeme miì na, Ani wɔ̀ɔ báa gbele. Yɛlɛ o yɛlɛ, wi ìn ki ta bì li.

⁸ Wi pɔlɔ Ɛlikana wɔ̀ɔ wí po: «Ani, má na kpele nyaʔa? Nyaʔa ma po mɛ ìn ki ta bì li ge, á ma lama gban ge? Mi ìn bonro má ma bì doro nabipiʔi kê na we yo?»

⁹ Pe gâ li kɔ, Ani wɔ̀ɔ jɛ mà kɛri wa Nyɛʔɛlɛ li sraʔá go ma wa Silo ni we. Sraʔá farafɔlɔ Eli wi dá bo wa klɛnhaʔa goyɛʔɛ na ge.

¹⁰ Ani wi dá yɛʔɛ̀ pɛn ceŋge. Wɔ̀ɔ na Bajegɔ Nyɛʔɛlɛ nyɛri na kpele ceŋge.

¹¹ Wɔ̀ɔ wi nò kan lí ma mà yo: «Bajegɔ Nyɛʔɛlɛ la Sye wì bɛfu fɔlɔ we, nà ma na cɔlɔʔɔ kala wele le, nà ma lama to ná ni, nà mɛ ìn lama wɔ ná ni ge, nà ma pyɔ kan ná ma nabiple, pa muu nuŋu bùu kân Bajegɔ Nyɛʔɛlɛ ma le wi nyuwyeʔe kì bɛfu ni. Kpele là wo je ga doro wa wi yugu na fyeu!»

¹² Ani pɔɔ da gâ go wi nyɛriʔi na na nyɛri Bajegɔ Nyɛʔɛlɛ ma le, Eli wɔ̀ɔ na wi nò kɔrɔsi ge.

¹³ Ani wi dáa nyu wa wi lama miì ni. Wi nosɛrɛ à tiì nigbe mà na nyɛri. Di hɛn ìn dàá wi yoʔo nuru ge. Eli wɔ̀ɔ naʔa honri mà yo wí ma hunmù jɔ mà tin.

¹⁴ Eli wɔ̀ɔ wí po: «Hunmù mí bi gà jeʔele ma na nyaʔa nyiŋi na? Kí ma yala ma làʔá dufɛn na we ban.»

¹⁵ Ani wɔ̀ɔ wí po: «Ayo, mi ìn hunmù jɔ bì din. Mí nyɛ cɛlɛ ŋa wí na teʔe ge, di hunmù ban mí ma jɔ ge. Mí nyɛ naʔamɛ ge jango bì na cɔlɔʔɔ teʔe kì bɛfu tyɛʔɛ Bajegɔ Nyɛʔɛlɛ na le.

¹⁶ Mò gáa ki honri bì yo na pomo mí nyɛ tipeme. Mɛjɛn ga kí na na ya wa na lama ni, ní ga nì kí na lama wlele na na kiì gi mi dáa nyu fɔ mà bâ no ŋaŋa ni we.»

¹⁷ Eli wɔ̀ɔ wí po: «Maa sye lanyimi na. Yraʔa ga má ma nyɛri Israyɛli woo pe Nyɛʔɛlɛ ma le, liʔi kan má ma.»

¹⁸ Ani wɔ̀ɔ yo: «Maʔa yaʔa bì kmaʔa ta má ma.» Ki kruʔu ma, Ani wɔ̀ɔ kɛri mà yâ li. Wi ìn bo lagbanma ní adi.

¹⁹ À pe bâ jɛ fan ki wlɛʔɛ ki kpɛnkaʔa na mà kɛri mà yâ Bajegɔ Nyɛʔɛlɛ kpɔʔɔ, ki kruʔu ma mà hru mà kɛri pe go nî wa Hrama ni we. Ɛlikana wɔ̀ɔ bâ gboʔolo wi cɔ nì we, Bajegɔ Nyɛʔɛlɛ à li Ani wi nyɛrimi syɔ me.

Samyɛli wi heme ní wi pimi nì

²⁰ Ani wɔ̀ɔ bâ acɛnlɛ ta. Wi henyiŋi ki bâ dyɛʔɛ, wɔ̀ɔ pyɔ he we nabii mà yele kan wí na noo yeri Samyɛli, mɛjɛn wi dá yo: «Mí moo nyɛri Bajegɔ Nyɛʔɛlɛ ma.»

²¹ Ki kruʔu ma, Ɛlikana wɔ̀ɔ bâ gɛri wi go woo pè bɛfu ní bì yà sraʔá fara Bajegɔ Nyɛʔɛlɛ ma ŋa pe dáa fara yɛʔɛ́ kè bɛfu na bì nì bì ga funŋu wi dá wi nò kan ge.

²² Di Ani wi ìn dà gɛri wa. Mɛjɛn wi daʔá yo wi pɔlɔ ma we mà yo: «Pyɔ nòo ga ba laʔa nyrimi na nyiŋi ga na, pa mi gɛri wí ni bì yɔ̀ɔ tyɛʔɛ Bajegɔ Nyɛʔɛlɛ na le bùu yaʔa wi kò wa su.»

²³ Wi pɔlɔ Ɛlikana wɔ̀ɔ wí po: «Ga má ma nya kmaʔa, maʔa hanri. Ma kò naʔa fɔ pyɔ wi ba laʔa nyrimi na me. Kí ma yala Bajegɔ Nyɛʔɛlɛ liì nigbe kayoʔo bí funŋu.» Cɛlɛ wɔ̀ɔ ko wa na pyɔ kanʔa wɔ̀ɔ na ŋori fɔ wɔ̀ɔ ba laʔa nyrimi na me.

²⁴ Nyiŋi ga na pyɔ wi da gâ laʔa nyrimi na me, Ani wɔ̀ɔ kɛri wí ni wa Bajegɔ Nyɛʔɛlɛ li go nî wa Silo ni we. Wi dá yɛʔɛ́ tanri nupyala co mà kɛri lí ni mà plɛn tyâ kasyaʔa nyɛlɛ ní, dufɛn forogo nyɛlɛ ní. Pyɔ wí mɛ ìn dà bo tatunŋu.

²⁵ Pe dá nupyala kpo le mà pan pyɔ nì Eli krugu we.

²⁶ Ani wɔ̀ɔ bɔ́ɔ̀ po: «Gafrɛgɛ, na kafɔlɔ. Kayocɛnŋɛ gi cɛlɛ ŋa wi da bâ yere be mà tanla na Nyɛʔɛlɛ nyɛri le, domi wi.

²⁷ Pyɔ ŋa wiì wi mi dáa nyɛri Bajegɔ Nyɛʔɛlɛ ma le. Ga mi da nyɛrí, Bajegɔ Nyɛʔɛlɛ à liʔi kan ná ma.

²⁸ Kiì kɔsɔ na, mí moo kân Bajegɔ Nyɛʔɛlɛ ma le wi po li woo wi nyuwyeʔe kì bɛfu ni.» Ki kruʔu ma, à pe Bajegɔ Nyɛʔɛlɛ kpɔʔɔ le.