1 PYƐRI 1 - NYƐʔƐLƐ LI KÀYORO

Syeriʔi

¹ Mì Pyɛri ŋa Jesu Krisi wi pitunŋu we mí bi ki sɛbɛ ŋa troʔo we wa ye ma, yèé bee Nyɛʔɛlɛ lí ma fara ge mâ po ye ma craʔa mà yâ bo nabonmoo wa klòʔo ni ge gee pé na yeri Ponte nì, Galase nì, Kapadɔsi nì, Asi nì, ní Bitini nì we.

² To Nyɛʔɛlɛ li da glú mà ye fara mà yala ga nì li da gón mâ yaʔa ge, jango ye po Nyɛʔɛlɛ woolo Nyɛʔɛlɛ li Nyìli li fanŋa ni, ye nì ye da nurú Jesu Krisi ma we, wi disyan ki nyraʔala li ye jeʔe, li ye yɛli. Nyɛʔɛlɛ li frɛmɛ ní, li nyimi ní pi kpɔʔɔ ye ma.

Wò honriʔí pahaʔa kí nyɛ nyuwyeʔe ní

³ Wo da Nyɛʔɛlɛ sonni le, la lí nyɛ wò fɔlɔ Jesu Krisi wi To we. Wò nyugara pa ti gâ wa lí na ceŋge ge, lí ma wo he fonŋo Jesu Krisi wi nyɛmanyinimi kuu ni be miì fanŋa ni. Ki pomo na me, wó ma honriʔi pahaʔa ta, ga kí nyɛ nyuwyeʔe ní ge,

⁴ mà nì mà krɔʔɔ ta ga koò na cɔʔɔ, koò na kran, ki kmara toò na ko. Kí nyɛ wa ye kan tyɛʔɛhaʔa namuru ni de.

⁵ Pa yé ma pa Nyɛʔɛlɛ na le, li fanŋa kí na ye kɔrɔsi fɔ bì ba no syɔmo ma na mí nyɛ kondoyaʔama jango li ba mi tyɛʔɛ hɛɛn na be nyidanʔaŋa na ge.

⁶ Ki kala na le, yé nyɛ lafiʔigbɔmo nì, ali nàʔa ja bo kí ma yala ye po yɛpɛnʔɛ ní nyiŋi cɛnri na yɛgbanra tyɛnʔɛ fafaʔa kala na le.

⁷ Ki yɛgbanra ti yugu kiì gi ga jango, nà pe gá yè pama po bi mi welé kɔ ge, mi po sinmi. Wele, tɛ wí nyɛ yraʔa kà gi kí na cɔʔɔ. Kiì nì kì bɛfu ní, pé noo pin noo wele kwɔʔɔ ní. Ki podeme miì na, yè pama ma mí ma ponro tɛɛ na we, pé na mi pin na mi wele jango mi po sinmi. Nàʔa po ban, pa ye ba sonmo ta, ní kmara nì, ní kpɔʔɔmo nì, nyiŋi ga na Jesu Krisi wí bi ba wì tyɛʔɛ ge.

⁸ Ali nàʔa ja bo ye ìn joó nya, wí na ye glanʔa. Ali nàʔa ja bo yoò noo nyaʔa ŋaŋa ni ge, pa yé ma pa wí na ge, yé nyɛ lafiʔigbɔmo nì, ma mí nyɛ kmara womo me. Mí nyɛ kpangbanma fɔ hɛn wóo gbân bì mi kɔ̀rɔ́ nyɛli bùu kɔ.

⁹ Mɛjɛn yé na yè nyìgée ke syɔmo taʔa, ma mí nyɛ yè pama mi yugu ge.

¹⁰ Nyɛʔɛlɛ leyokplɛɛ pe dáa honri ki syɔmo ma na me mà na mi kɔ̀rɔ́ ca we ceŋge. Pee bɛ pe da glú mâ yo nadanma akanʔa ga kala na Nyɛʔɛlɛ lí bi ba gan ye ma ge.

¹¹ Pe dáa pè kpanŋi jango bì da nyiŋi ga cɛnni ki kaʔa ké bi ba no ge ní pomo ma nì ké bi ba hanri ge bì yala ga nì Krisi wi Nyìli la, li dá bo wa pe nî li dáa ki teri pé na mà yo Krisi wí bi ba jɔlɔ bì na da bì kpangbanma ta me.

¹² Nyɛʔɛlɛ li daʔa tyɛʔɛ ki leyoo na be mà yo nyiŋi ga na pe dáa ki kaʔa nyu ge. Pe ìn dàá ke nyu pee tapoboo kala na fɔ yèé kala na. Ŋaŋa ni ge, kayotanʔa yofɛɛ à pe bâ ke yo ye ma Nyɛʔɛlɛ li Nyìli li fanŋa ni, la Nyɛʔɛlɛ li dá jrɛʔɛ wa namuru ni de mâ li troʔo naʔa ge. Ki kaʔa ke laa àʔa na mlɛŋɛyee cun be ceŋge, à pe cori bì ke cɛn.

Kí ma yala sɛrifɛɛ pe da danrí sinmi na

¹³ Ki tɔ na ge, ye kòndó ye yaʔa, ye po celebee, ye nì ye yè honriʔi kì bɛfu pa haʔama ma na yé bi ba da nyiŋi ga na Krisi wí bi ba wì tyɛʔɛ hɛɛn na be.

¹⁴ Ye da Nyɛʔɛlɛ kpɔʔɔ le. Yò gáa danri bì yala wre ti nadanma kaʔa ke laa tipeʔe ga nì ki dáa ye cun yè kabajɛnrɛ nyiŋi na ge.

¹⁵ Di, pa Nyɛʔɛlɛ la lí ma ye yeri ge lí nyɛ kmala, kí ma yala yèé fanna ye po hɛnkmaa wa yè tanʔama mì bɛfu ni.

¹⁶ Mɛjɛn kí nyɛ wa nyoŋoʔo Nyɛʔɛlɛ li sɛbɛ ni we mà yo: Kí ma yala ye po hɛnkmaa, mɛjɛn mì mí nyɛ kmaa.

¹⁷ Nyɛʔɛlɛ liì na kiti kon hɛɛn pè bɛfu na na yala pe tungɔʔɔ ní ge. Loò na hɛn wà ponro wà na. Nàʔa po yé na li yeri yè To yè nyɛrimi ni me, kí ma yala yè tanʔama mi daʔa teri hɛɛn na be pomo ma na yé na fyaʔa lí na nyiŋi kì bɛfu na, ga yé bi gɔ naʔa ki drunya ni we.

¹⁸ Mɛjɛn yé maʔa cɛn pomo ma na Nyɛʔɛlɛ lí ma ye syɔ yè tonro fun tanʔama pomo ma me ma ye dá da yè tokpɔɔ ma be. Li ìn ye syɔ yrɛbɛ ba nì pí na cɔʔɔ ge nɛ pa waafiʔi nyɛ ge ní tɛɛ nì we.

¹⁹ Ayo, lí ma ye syɔ pɛgbanra na, da tí nyɛ Krisi wi disyan gi ge. Wí nyɛ nɛ pa mbaple la nyɛ lí nyɛ jɛnlɛ fun mâ po kranma fun ge.

²⁰ Sanni Nyɛʔɛlɛ lí bi drunya hanri we, li da glú mà Krisi fara we. À li bɔ́ɔ̀ tyɛʔɛ drunya na we yè kala na ki nyidanʔaŋa na ge.

²¹ Wiì fanŋa ni, yé ma pa Nyɛʔɛlɛ na le, la li dɔɔ nyɛ́ móò yrígi kuu ni be móò kpɔʔɔ ceŋge ge. Nàʔa po ban, yè pama ní, yè honriʔi pahaʔa ní pa ye pi pa Nyɛʔɛlɛ liì na.

²² Yé ma kanyɛmɛ kpɔʔɔ me mà yè lama jeʔe me mà mi yɛli fɔ yèé ní, yè woo ní à ye na yè glanʔa dihonkmaa ní. Ye da yè glanʔa ban yè dihon wì bɛfu ní.

²³ Mɛjɛn yé ma he fonŋo Nyɛʔɛlɛ li kayoro fanŋa ni, da tí nyɛ wyere mâ po ti ìn bi jè ga gɔ ge. Ki pomo na me, yé nyɛ to ŋa pii wi ìn bi gà gu ge. Yoò nyɛ to ŋa pii wí bi gà gu ge.

²⁴ Nyɛʔɛlɛ sɛbɛ wí naʔa nyu mà yo: Hɛɛn pè bɛfu pé nyɛ nɛ pa nya nyɛ ge. Pe kmara tì bɛfu à ti po nɛ pa nya wofyɛnʔɛ nyɛ ge. Nya ki na waʔa. Ki wofyɛnʔɛ ki na klanʔa mà wo.

²⁵ Di wò fɔlɔ wi kayoro tí bi go be nyiŋi kì bɛfu na. Ki kayoro tiì di da kayotanʔa nì ge, ga pe dá yo ye ma ge.