1 KORƐNTE 1 - NYƐʔƐLƐ LI KÀYORO

Pɔli wí ma Korɛnte kàʔà sɛrifɛɛ syeri be

¹ Mì Pɔli ŋa Nyɛʔɛlɛ lí ma fara bí bo Jesu Krisi wi pitunŋu ge ní Sɔsitɛnni nì, ŋa wò syɛnwoo we,

² Wó ma ki sɛbɛ ŋa troʔo we yèé bee ma yé nyɛ Nyɛʔɛlɛ li sɛrigo woo wa Korɛnte kàʔà ni ge. Lí ma ye fara mà yo ye po li woolo Jesu Krisi ni we. Wó naʔa nyu kpo bee ma pé nyɛ wa deʔe kì bɛfu na mâ na wò fɔlɔ Jesu Krisi kpɔʔɔ we ŋa wí nyɛ wòó ní pee ní wò bɛfu wò fɔlɔ we.

³ Wò To Nyɛʔɛlɛ ní, wò fɔlɔ Jesu Krisi nì pe frɛmɛ ní nyimi kan ye ma.

Yrɛkmaba ba wó ma ta wa Krisi ni we

⁴ Mí na na Nyɛʔɛlɛ syeri le su yè kala na le, mɛjɛn lí ma ye haʔa Jesu Krisi ni we,

⁵ mà yrɛbɛ pì bɛfu nyɛʔɛ ye kan wa wiì ni we kpo, kayoro tì bɛfu yoo, ticlimi mì bɛfu yoo.

⁶ Ki pomo na me, kayoʔo ga mi dá yo ye ma Krisi namyɛlɛ na le kí ma po cɛnŋɛ wa ye ma,

⁷ mà kan akanʔa kɛ̀ ìn bi ye la, nyiŋi ga na yé na wò fɔlɔ Jesu Krisi wi pannyiŋi hanni ge.

⁸ Nyɛʔɛlɛ liì lì tala lí bi da fanŋa ni ye ni fɔ bì ba no wlɛdanʔaŋa na ge, jango ye po baʔahaʔa fun wò fɔlɔ Jesu Krisi wi wlɛʔɛ na ge.

⁹ Mɛjɛn liì Nyɛʔɛlɛ lí nyɛ kafungee fɔlɔ. Liì li la lí ma ye yeri mà bâ ye kpoʔolo li pyɔ Jesu Krisi nì, ŋa wí nyɛ wò fɔlɔ we.

Sɛrigo hɛɛn pe konʔolo

¹⁰ Na woolo, mí na ye fɛn wò fɔlɔ Jesu Krisi wi yele na le mà yo yè noyomo mi da fìnní. Yò gá janmu yè na, di ye plɛ̀n ye po nigbe honriʔi nì, ní noyomo ní me.

¹¹ Mɛjɛn Klowe wi heme woolo pèe maʔa yo ná ma mà yo yé na kon.

¹² Ga mí ma cori bì yo ge kí ga: Yé naʔa nyu yè kân ban: Wà na yo: «Mí nyɛ Pɔli woo.» Wà na yo: «Mí nyɛ Apolɔsi woo.» Wà na yo: «Mí nyɛ Pyɛri woo.» Wà na yo: «Mí nyɛ Krisi woo.»

¹³ Yé naʔa honri mà yo Krisi wí ma konʔolo wì na yo? Pe dá Pɔli wiì kàn wa tipraʔa na ge ye kan yo? Dee de pe dá ye batise Pɔli wiì yele na?

¹⁴ Mí na Nyɛʔɛlɛ syeri le, mɛjɛn mi ìn dà yèé wà batise fɔ mà laʔa Krisipusi nì, ní Gayusi nì nà pee ban ge.

¹⁵ Ki kala na hɛn wà wóo gban bì yo pé ma ye batise na yele liì na.

¹⁶ Á, mí ma lama to. Mì wi mi da ní mâ Sitefanasi go woo batise be kpo ge. Pe tɔɔ namyɛlɛ na le, mi ìn ki cɛn ŋa mi ní mâ batise nɛ ge.

¹⁷ Krisi wi ìn dà ná tun mà yo bì baa hɛɛn batise. Di wi da ná tun mà yo bì baa kayotanʔa nyu ge. Ki woʔo ga kò gáa hanri hɛnwyee ticlimi nì, jango Krisi wi kùʔù wa tipraʔa na ge kò gá bo waʔafe.

Jesu Krisi wí nyɛ Nyɛʔɛlɛ li fanŋa

¹⁸ Tipraʔa kayoʔo kí nyɛ letɔmo mi hɛɛn bee yɛʔɛ́ na pé nyɛ wa punŋumu klòʔò nî ge. Di kí nyɛ Nyɛʔɛlɛ li fanŋa gi wòó bee ma wó nyɛ wa syɔmo kloʔó ni ge.

¹⁹ Mɛjɛn kí nyɛ wa nyoŋoʔo mà yo: Mí bi ticlimi fɛɛ pe ticlimi cɔʔɔ me bì kacɛnmɛɛ pe kaʔa cɛnmɛ krɛʔɛ mi po waʔafe womo.

²⁰ Ticlimi fɔlɔ wí bi nyaʔa yo nɛ? Ná kiì ban, sɛbɛ cɛnfɔlɔ wí bi nyaʔa yo? Ki ŋaŋa kakara fɔlɔ pɔɔ nyaʔa yo? Nyɛʔɛlɛ lí maʔa tyɛʔɛ wo na mà yo ki drunya ŋa wi ticlimi mí nyɛ letɔmo mi.

²¹ Di pa kí nyɛ wa Nyɛʔɛlɛ li ticlimi ni me drunya hɛɛn pe ìn dà gban bì li cɛn pe ticlimi nì me, àʔa klan Nyɛʔɛlɛ ni le li hɛɛn bee syɔ pe pá Jesu na we kayoʔo ga fanŋa ni drunya hɛɛn pé na cun letɔmo woʔo ge.

²² Juwifiyee pé na kafonŋoo nyɛri. Grɛkiyee à pe na ticlimi ca.

²³ Di wòó wó mɛɛ na Krisi kaʔa jari mà yo pe dɔɔ kán tipraʔa na. Ki kayoʔo kí na Juwifiyee bɛnʔɛ be mà po letɔmo kayoʔo klòʔo ke tɔɔ ma ge.

²⁴ Di pè bɛfu bee Nyɛʔɛlɛ lí ma yeri ge Juwifiyee yoo, klòʔo ke tɔɔ hɛɛn yoo, Krisi wí nyɛ ki woo ma be Nyɛʔɛlɛ li fanŋa mà po li ticlimi.

²⁵ Mɛjɛn ga hɛɛn pé na nyaʔa nɛbo Nyɛʔɛlɛ li letɔmo mi, kí nyɛ ticligi mà toro hɛɛn woʔo na ge. Ga pé na nyaʔa nɛbo Nyɛʔɛlɛ li fanŋa funmu mi, kí nyɛ fanŋa nì mà toro hɛɛn woʔo na ge.

²⁶ Na woolo, ye dá bo pomo ma na, nyiŋi ga na Nyɛʔɛlɛ li dá ye yeri ge ye da honri mí na. Mɛjɛn fafaʔabaa ìn dà bo wa ye ni bee pé nyɛ ticlimi fɛɛ drunya wi yɛʔɛ̀ na ge mâ po fanŋa fɛɛ mâ po nɛ yegbɔʔɔlɔ fɛɛ ge.

²⁷ Di Nyɛʔɛlɛ lí ma ga fara kí nyɛ letɔmo mi drunya hɛɛn pe yɛʔɛ̀ na ge, jango bì fɛrɛ tòn ticlimi fɛɛ na be. À li ga fara kí nyɛ fanŋa fun drunya hɛɛn pe yɛʔɛ̀ na ge, jango bì fɛrɛ tòn fanŋa fɛɛ na be.

²⁸ Nyɛʔɛlɛ à li ga fara koò yegbɔlɔ ní, ga drunya hɛɛn pé na faʔara ge, ga koò nyɛ pé ma yraʔa ge, jango ga kí nyɛ pé ma yraʔa ge ki krɛ̀ʔɛ̀ waʔafe.

²⁹ Ki pomo na me hɛn wà wò gáa wì kpɔʔɔ Nyɛʔɛlɛ li yɛʔɛ̀ na ge.

³⁰ Di Nyɛʔɛlɛ à li ye kpoʔolo wa Jesu Krisi nì we mòo kân, wɔ̀ɔ po wò ticlimi. Wiì fanŋa ni à wo po sinbee Nyɛʔɛlɛ li yɛʔɛ̀ na ge mà po ylɛɛ mà syɔ,

³¹ jango ki da hanri nɛ pa kí nyɛ wa nyoŋoʔo mâ yo: Sanni hɛn wi da wi kpɔʔɔ ge, wi da wò fɔlɔ kpɔʔɔ we ga na wí ma hanri ge.