MAZMUR 1 - ALLAH WENE FANO WENE

BUKU KERAM ON: MAZMUR 1–41 Enahayeg mun eberoho hauk kamuhup on

¹ It ap homi ap kwasikdoho neg duruk on en enawene komo uruk on muko duk eleg angge deheg, ap siag duruk on enobabut ilitdoho duk eleg angge welaheg, ap Allah unuk sebeloho folug siahap duruk on nim seberuk fug angge deheg duruk fug,

² famen de Tuhan awene melaleg anyo duruk ale fahet mun ambonoreg lit ne wene anyo nukoho nim hup anggo nim meneni ebetuk kwit neg wereg on etma enahayeg hauk kamag.

³ Ap homi aireg on aire aren di ale su ale durukmu ambiangma fano ale neg atuk karuhu; at de e ik elanma wilibig on en anggen yihig li fam anggen yihikeg ne enggela halo uk fug angge welaheg, deg anyo hag deg laruhu.

⁴ It ap homi kwasikdoho neg duruk on aire aham deg: at aire no asinahap hol en firoho del-fol-esauk anyo hag deg lamuhup.

⁵ Ap kwasikdoho neg duruk on aire At Allah en ayo wiroho unggum og-uruhu ne it At omaliki on de amu minggiroho fohu.

⁶ Ap homi wene holoho neg duruk on de Tuhan en melaloho feseheg, enalong baloho fahat-enusug laheg duruk, famen de ap kwasikdoho neg duruk on de enebe eleg atuk mu etma fil lauk.