MARKUS 5 - ALLAH WENE FANO WENE

Gerasa on mungguat along on endama kwebag anyo lisoho wilibi fesebag wene

¹ Ik humon yenggeleg foma fil it o Gerasa on weregma nindig-aik lausa.

² Lausareg, perahu famen owan wilibik lauk kweleg, ap mungguat wenenebo on endama kuswa anyo, waratuk on owikmu feserukmu etmano en Yesus akit wahasi.

³ At ap anyo, waratuk on owikmu feserukmu etma wereg ma, enggik sabu bosie manggen fam het-deheg neg, duruk katswa famen, het-duk fug ale neg atuk katsi.

⁴ Enggik inim, eyog inim, sabu bosie manggen het-deheg neg duruk katswa famen, dekik-deheg neg duruk kwit, enggik eyog sabu bosie manggen hetdeg anyo libik-lebegdoho hwik-eseheg neg duruk mu halug, it ap homi humdoho en, ap anyo sabu bosie manggen on hetdoho enda kwelap-am fug alereg ma hausa.

⁵ Hupmu hubet, ap homi waratuk on owikmu feserukmu inim, dom fam inim, ngaril noruk kwit, helep fam wat-dil noruk katsi.

⁶ Etma wereg lit, yatman Yesus il fu hasireg, at akit buroho lasireg, apma sebe ulug,

⁷ “Yesus yei. Hat Allah leho mundoho wereg on amloho su, an nanggin-napmin ulug wahen? An nowaruk fug!” ulug, ele humon fam ngaruruk kwit, At Allah unuk hombuk balsi. (

⁸ At Allah unuk hombuk balsi ai, at Yesus en, “Hat mungguat ap endaman wilibik lag!” hweag-itsi mu, at ap anyo Allah unuk hombuk balsi.)

⁹ “Wilibik lag!” hweag-itsireg, “Hat hunuk sa?” Hweag-itsi mu, “Nenebe humdoho deg ma, an nunuk soaleg ai Legiun,” ulug,

¹⁰ “Nenowe yehei! Ap endama suman lisoho dagma etma wilip-nenebuk fug,” ulug, enele ningdoho hweag-utuk katswa.

¹¹ Hweag-utswareg, bule unggulkwe etma wam humdoho ambiang wil noruk kwit wereg ma,

¹² it mungguat anyo en, “Yehei! Wam enendama kwik laul en mon-nenebin,” ulug, Yesus hweag-utswa.

¹³ Anyo Yesus hweag-utswa ma, at anyo en, “Yu o, lakiek!” hweag-esasi. “Lakiek!” hweag-esasi mu, mungguat ap endaman wilibik lausareg wam enendama kuswa ma, di wam su wam 2.000 hag bule unggulmu etman da ngwe, ya ngwe, ik yenggelegma kwik lausa ma, ik anyo en sal-enepsi mu, waratswa.

¹⁴ Ik sal-enepsi mu, it ap wam hwal-enepuk on anyo longgo il lauk kwit, wam sal-enepsi anyo wene, o sili hummu hweag-eseheg, o esanggo esanggo etma hweag-isil laheg, duswa ma, it ap homi anyo en, “Nanggin aha halug, ehesa?” ulug, inil ha wahausa.

¹⁵ Inil hil Yesus akit wahausareg, ap mungguat humdoho endama kuswa anyo, enda kwelap-atsireg, sum wan-debelug, etma hwerieg wereg ma hausareg, enakol atswa.

¹⁶ Enakol atswa ma, it inil hausa anyo en, mungguat ap endama kuswa wene nim, wam ik en sal-enepsi wene nim, bilinggoho ap homi hweag-esausa.

¹⁷ Hweag-esausa ma, it anyo en Yesus it enobam en wilibik lowag ulug, enele ningdoho hweag-utuk katswa.

¹⁸ At Yesus perahu fam kwimin ulug duruk katsi mu, at ap mungguat endama kuswa anyo en, “An ninim laul,” ulug, ele abiroho hweag-itsi.

¹⁹ Hweag-itsi famen, at Yesus en, “Eleg. Hobam hori hinim welahen on weregma lamihindeg, an hat howe helaheg en habihi anyo hweag-esa lag,” ulug, hweag-itsi.

²⁰ Hweag-itsi mu, lasireg, o kota numen etmano Yesus disi wene hweag-isil lasi mu, ap homi humdoho yanderuswa.

Yairus ahaloho inim, hwe mep lauk mu inim hiling-enepfag wene

²¹ Perahu fam at Yesus anyo ik foma fil en nindig-aik wahasireg, ik inggimu wereg ma, ap homi humdoho at akit kabog-dik wahausa.

²² Kabog-dik wahausareg wereg ma, ap it Yahudi somban uruk obam hwalduk on eke unuk Yairus wahasireg, Yesus apma sebe ulug,

²³ orohole elaheg debelug wereg lit, “Yesus yei, an nahaloho ouk en waram ale deg ma, waram no, oluk welamag ulug, henggik at ebe fam sebeloho fanoap dik ma,” hweag-ereheg neg disi.

²⁴ Hweag-ereheg neg disi mu, at Yesus inim lausa. Inim lauk mu, it ap homi humdoho ombolim lauk kwit, inim hwililipdoho lausa.

²⁵ Hwililipdoho lauk mu, hwe amep lauk kweleg, tahun nesanggoen disi anyo,

²⁶ fano dukwag ulug, angge humdoho it ap hiling-enepuk on og-esauk mu, it mundoho en deheg neg duruk katswa famen, ouk anyo eleg am fug angge, humdoho duruk katsi.

²⁷ At hwe anyo Yesus en hiling-enebil noruk uruk ale esanggo holsi mu, ap homi enenggelegman ambol fil horog aik lasireg,

²⁸ “Asum bal-hamin men fano napmisi,” bolug, Yesus asum bal-hasi.

²⁹ Asum bal-hasireg, amep wamburuk katsi anyo bal-atsi mu, “Namep duruk katihik anyo ketia neg hiling-nabeheik hihi,” boruk kweleg,

³⁰ at Yesus anyo en omamne eke eleg atuk mu furebahat-dasireg, ap homi hwililipdoho waharuk on anyo alukwe endenoho kumu esauk kwit, “An nasum san bal-neehen?” hweag-esasi.

³¹ Hweag-esasi mu, at ele wauk on anyo en, “Ap homi het-husug wereg ma, esehen famen, hat nunggwelug, San bal-neehen, uruk kahen?” hweag-utswa.

³² Hweag-utswa ma, at Yesus en, “San bal-neeheik,” ulug, il og-enepsi.

³³ Il og-enepsi men, hwe anyo, “Fano nabeheik hihi,” besireg, akol en owag elek duruk kwit, at apma sebe ulug, “An den dihi,” ulug, bekitdoho fag-disi.

³⁴ Fag-disi mu, at Yesus en, “Naut, hat henda an nobam dip-debelug demdoho behen fam fano ahen. Anggin hapuk katsi anyo eleg aha ma, henda hambukdoho hobam lag!” hweag-itsi.

³⁵ Owan hweag-utuk kweleg, it Yahudi enowe somban uruk obam hwalduk on anyo obam en yonggo wahausareg, ap Yairus hweag-utuk kwit, “Yairus nowe yei, hahaloho fahe waraha man, nunggwelug hweag-esauk on su we alemaroho hondoholug waharuk kahen?” ulug, hweag-utswa.

³⁶ Hweag-utswa anyo, Yesus esanggo holsi famen, enele sebeloho foruk kwit, at ap Yahudi somban uruk obam hwalduk on anyo hweag-utuk kwit, “Henda nobam dip-debelug, demdoho boruk kamin. Hakol bouk fug,” ulug, hweag-itsireg,

³⁷ “It ap homi hesangge ninim laul eleg,” ulug, at Petrus inim, Yakobus aut Yohanes inim, Yesus inim enemu lausareg,

³⁸ ap Yairus obam horog aik wahausareg, ap homi enele saling-kwaling uruk kwit, oba yareheg, oba yi-yi ye-ye uruk mu, esasireg,

³⁹ olma kwik lausa. Olma kwik lalug hweag-esauk kwit, “Hwele duhum on su waraha fug. We nohoruk mu, nunggwelug henele saling-kwaling eheg, oba yareheg, duruk kahep?” hweag-esasi.

⁴⁰ Hweag-esasi mu, it anyo en unda yako belapswa famen, ap homi mundoho muko wilibi feselug, hwele akni isinga inim, at ori inim wahausa anyo inim, og-eneplug hwele weregma kwik lausa.

⁴¹ Kwik lausareg, hwele anyo enggik senetuk kwit, “Talita kum,” hweag-itsi. Ai, nit nenele fam de, “Hwele su, inamin ulug hweag-hirihi,” hweag-itsi.

⁴² Hweag-itsi mu, at hwele anyo inatsireg olekwe etma noruk katsi. Hwele anyo duhum atuk eleg kweleg, tahun nesanggoen hasi mu, noruk katsi halug, ap mundoho en, “Yaho hwi!” ulug, yanderuswa.

⁴³ Yanderuswa man, Yesus en ele omamneroho ap homi hweag-esauk kwit, “At hwele fano debihi su, ap homi hweag-esa fug,” hweag-esasireg, “Hwele su siburu nowag ulug og-emek,” ulug, hweag-esasi.