ESTER 4 - ALLAH WENE FANO WENE

At Mordekhai en de Ester en let-nenebukwag ulug heng ebag wene

¹ Airoho debag ale anyo at Mordekhai en holfagdeg de, aren fong waroho ulug de asum deneloho embesebagdeg de sum belahi sum lahaboho, ne ul unggulmu hilili febagdeg de at ebe o kota fene etmano lauk kwit oba yiahan ele hum fam yatil lauk katfag.

² Airoho lebagdeg de at ebe hun raja obam wirigmu kwik laukmu sokolma etano aik lebagdeg de, it ap sum belahwi sum wandeg on de etma kwik lauk fug mu re at ebe sokolma etano bok aik lebag.

³ Ne, at debag ale ai higitdoho re, wene melaleg hun raja en anyo unduhuk febag ma re, ap homi Yahudi on o propinsi abirangge etmano en oho oba yatfag. Airoho yatuk kwit de, iren siburu hweang welaheg, oba yareheg, ne nunggwelug nenebuhup ulug eheg, duruk kweleg, ap homi iron fomane humdoho re enesum belahwi sum wan-debebagdeg, ul emberimmu yinggig latfag.

⁴ Airoho debag ma re at Mordekhai en debag ale anyo fahet, it hwelani duhum on mel, ap yabuk eneko ratu Ester obahet duruk kamag ulug fesebag on anyo mel, at Ester hweag-irik lebagman de Ester enda mundoho hesilfag. Airoho debagdeg at Ester en hun Mordekhai asum belahwi sum etmano obalma ulug sum mon-enebik watfag famen de Mordekhai en wauk ale erimdoho embesebag.

⁵ Ai en de hwe Ester en hun Hatah, ap yabuk eneg on duruk ahun at Ester obahet duruk kamag ulug raja en unduhuk febag on anyo wol-debagdeg hweag-utuk kwit de, “Haren hun Mordekhai ai en nunggwelug deheik, ne nangginoho atsi mu,” ulug hein wag lakin ulug mingming-debag.

⁶ Airoho mingming debag ma re at Hatah anyo hun Mordekhai akit o kota kwenang ohoman sokole raja obam kwik lauk on fam etano wereg ma akit lebag.

⁷ Lebag ma re Mordekhai en de hun Hatah fam de atfag ale etmano mel, ne at Haman en uang perak on hun raja en a uang fahat daukmu kwelabuhuk ulug ebag ale etmano mel, ne airoho debelug de ap homi Yahudi on binggi enowaruhuk ulug ebag ale etmano mel dindil-etfag.

⁸ Airoho ebagdeg de at Mordekhai en de, hun raja en lisu baleg o Susan en wilipfag on, lisu ai fam ap homi Yahudi on mundoho elehap-enebukwag ulug baloho wilipfag on anyo kumu heheg balfag on mel, hun Hatah og-etfag. Og-etfagdeg de Mordekhai en hun Hatah fam uruk kwit de, “Surat aure Ester og-utlug de wene ai fahet at furoho hweag-umuk, ne at Ester en ohore hun raja akit kwik lalug ap homi at unggul unuk on etma fahet enda nesowag ulug, heng ik kukagdoho hweag-umuk,” ulug hweag-etfag.

⁹ Airoho hweag-etfag ma re at Hatah anyo Ester akit lebagdeg de, wene Mordekhai en hweag-umuk ulug ebag ale etmano hweag-irik lebag.

¹⁰ Famen de hwe Ester en nikangge at yonggo mondorik waharuk kwit de wene diroho iyug ulug ebag,

¹¹ “Di ap su ap homi oho ap oho re hun raja en unuk yiko wol-duk elegman, raja obam olohotma etma kwik lauk on de unggum enobam feselug binggi enowatuk. Wene aire wene melaleg duruk kamag ulug on wereg ma, at raja wene komo-duruk enap fam en de ap homi we on o propinsi oma mundoho fam de abirangge en wene ai fahet enoluk deg. Famen we kwe misig neg wene melaleg wereg on ai fam en se am ale koloreg on aire, at raja en andomuk emas on anyo ap anyo fam bil hauk halug. Ne, airoho atuk halug neg de ap ai ahap wendaram alereg. Famen de bigalem misig hunduko su fam de at raja en oho eke wol-napuk fug,” ulug mondotfag.

¹² Airoho mondotfag ma re at Hatah en de wene Ester en ebag on anyo Mordekhai en hweag-irik lebag.

¹³ Airoho hweag-etfag ma at Mordekhai en de wene hwe Ester fahet ulug diroho mondotfag, “Hat hebe hun raja obam welahen ai fam de, ap homi Yahudi amu on de enowaruhup ale enabug wilibig an de koloroho welahi, bouk fug!

¹⁴ Ap homi Yahudi on de diroho suroho ulug uk men de dil-dilen oho enahap wendaram alereg. Famen de hat de ketia deg lahen eta hagdoho neg hele eleg angge welahen ha man de, hat hebe wararuhunmu re, hat hakni ambiangman ondoho on anyo mundoho kobog ik lahu. Famen de hat hebe hun raja ohwe amag ulug momal-hapsi aire li airoho deg li eiya haren eke dukwag ulug momal-hapsi lam a, aire sa oluk deg?” ulug mondotfag.

¹⁵ Airoho mondotfag ma re at Ester en wene diroho ulug hun Mordekhai fam mondotfag,

¹⁶ “Ap homi Yahudi on o Susan fam wereg on etma kabog-debeselug, hit de nukoho henahan eta fam siburu mel, ik mel na fug angge wereg lit an nobahet somban uruk kamuk. Ne, an ohore an nim it hwelani duhum an nobahet yabuk duruk on oma nim ohore nenambilik hweang welamuhuk. Airoho duhukdeg neg de, wene melaleg owag lahale folug famen de an nebe raja wereg ma kwik lahuk. Wene ai fahet an wararuhuk halug aire, wararuhuk fano neg!” ulug mondotfag.

¹⁷ Airoho ebag ma re at Mordekhai anyo lebagdeg de, at Ester en diyug ulug hweag-etfag ale etmano mundoho dik lebag.