ESTER 3 - ALLAH WENE FANO WENE

Hun Haman en ap homi Yahudi on waroho elehap enebuhuk ulug weim abug wilipfag wene

¹ Anyo debagdeg li eke welatfagdeg en Raja Ahasyweros en hun unuk Haman ai eyabuk Perdana menteri ai welamag ulug unduhuk febag. Haman aire hun Hamedata amloho, hun Agag ai ambiangman ondoho on.

² Airoho unduhuk febagdeg de raja en de autsi pegawai fam hweag-esauk kwit de hun Haman ai along bolug leho foruk kwit de henerohole belabeg kwenangma sahaun uruk kwit leho foruk kamuhup ulug hweag-esebag. Ma re ap homi abirangge en de airoho ebag ale higitdoho duruk katfag, famen de at Mordekhai neg de airoho duruk katfag fug.

³ Airoho duruk fug en de it ap pegawai hun raja obam yabuk duruk on etmano en hein og-hauk kwit de, ‘Hat de nunggwelug hun raja ele sahaloho foruk kahen?’

⁴ ulug hweag-utuk kwit de di salim su salim de wene melaleg wereg aleroho dukwag ulug miming-duruk katfag, famen de iren uruk on anyo holuk fug angge duruk katfag. Aren uruk kwit de, “An de ap Yahudi on deg lahimu, an den ap on fam apma sebe ulug apne wihi ha fug alereg,” ulug uruk katfag. Airoho uruk katfag ma, aren uruk ale anyo re it foma etmano en de hun Haman en Mordekhai fam nangginoho debemisi ulug de at Haman hweag-irik lauk katfag.

⁵ Airoho hweag-irik lebag ma re at Mordekhai en at Haman fam apma sebe ulug leho foruk fug ale anyo oluk atfagdeg de Haman mun olok atfag.

⁶ Ne, at Haman en holduk men de at Mordekhai aire Yahudi ahun ulug oluk atfagdeg de, at Haman en de Mordekhai unggum og-uruhuk ulug wene ebag, famen de at Mordekhai fahet neg de fug ite ap homi Yahudi on abirangge o Persia kwenang ai fam wereg mundoho elehap-enebuhuk ulug wene ebag.

⁷ At Ahasyweros anyo raja weregman neg de tahun nesanggo on wereg kweleg de, bigalem iren wenaharuk katfag on unuk Nisan ai fam de, Haman en de, nukoho nim bigalem nim higit on de ke salim at enda bebag ale ai dukwag ulug de enoluk amag ulug, eneg ale wal-duruk katfag on unuk Purim ai dukwag ulug hweag-esebag. Airoho ebag ma re tanggal 13 bigalem nesanggo on fam, bigalem iren wenaharuk katfag on de unuk Adar ai fam duhuk ulug ebag.

⁸ Airoho ebagdeg at Haman en raja hweag-utuk kwit de, “Nakni, ap homi enunggul unuk nik on eke o kwenang su fam en o Propinsi au fam abirangge etma sahareg wereg. It eneitogdoho enombasi en wene melaleg duruk katfag on duruk on etma re ap homi enunggul unuk amu on nim higitdeg fug, iroho amureg. Airoho deg lit de iren wene melaleg kerajaan su fam wereg on etmano higitdoho duruk fug. Anggere, nakni haren de it ai enendan bolug duruk ale etma duruk kamag ulug embesouk fug.

⁹ Ne, nakni haren henda anggin hapuk eleg halug de, it ap homi ai enebe mundoho elehap-enebukwag ulug wene melaloho wilibin. Ne, nakni haren lahe an hamingming angge wene hobam ihi on ai fano bolug duruk halug de, an hamingming angge en de nakni haren on hangge di angge su angge foruk kahen on etmano fam perak on de 340.000 kilogram en kwelap-hirik waruhuk,” ulug hweag-etfag.

¹⁰ Airoho ebag ma holfagdeg de at raja en de at enggikmu helep sehene kwelabeg latfag on anyo hogdoho re, wene melaleg baloho wilipuk on anyo eneg angge obale dag deboukwag ulug de, hun Haman ap homi Yahudi on eneselei humon anyo og-etfag.

¹¹ Airoho og-etfagadeg at raja en uruk Haman fam kwit de, “Ap homi enunggul unuk ai on mel, uang mel de hat henggikmu foruk kahi, anggere haren diroho duk alere fanoreg bemihin ale ai neg diyug,” ulug hweag-etfag.

^12-13 Airoho hweag-etfag ma re, tanggal 13 bigalem misig fam de at Haman en de it ap raja obahet lisu balduk enap etmano wol-enepfag. Wol-enepfagdeg de iren hun raja en dukwag ulug hweag-etfag ale etmano higitdoho neg lisu balukwag ulug hweag-esebag. Bale folug de iren de ap homi di on su on enele fam ahamdoho baleheg, ne lisu balduk kwit il amu-amu it kerajaan ai apma wereg on en balduk ale etmano higitdoho baleheg, dukwag ulug ebag. Airoho ebag ma re surat anyo at Raja Ahasyweros unuk balfagdeg de, eneg angge re hun ai enggik helep sehene fam dag debebagdeg folo-folo it ap enalong wereg enap mel, gubernur mel, ap yain-kain mel, o propinsi etmano abirangge enobahet mondotfag. Ne, surat baloho mondotfag on ai fam de ele diroho baleg latfag, “Bigalem Adar ai tanggal 13 fam de, ap homi Yahudi on enebe sobal on et, sauwe on et, homi nim omalik doron nim enebe abirangge re enelaheg, esa fug angge binggi enowatlug de enangge mundoho del-dahup.

¹⁴ Ne, wene melaleg aire o propinsi abirangge etma fene ap homi abirangge en nukoho eneg wereg on ai fahet fik-fouk deg welamag ulug saharil lakiyug,” ulug baleg latfag.

¹⁵ Airoho ebag ma re it ap yonggo angge lauk on etmano en de lisu baleg anyo walug folo-folo o kerajaan ai fam en propinsi etmano mundoho fene walug lebag. Ne, at raja en amingming fam de wene melaleg anyo re o Susan it ap homi Persia on enobam indipmu etma nim fag-debag. Airoho debagdeg de at raja nim Haman nim de hweria atfagdeg ik anggur ahaik nauk kwit hwerieg latfag, famen de o Susan fam etma neg de wene anyo fahet youk debagdeg duruk katfag.