BILANGAN 1 - ALLAH WENE FANO WENE

Ap homi Israel on keram ininuk baloho sensus wenag-enepfag wene

¹ Tanggal satu bigalem bireneg on enameg li tahun bireneg on fam ap Israel on o Mesir embeselug wilibik watfagdeg lei kwe lauk li Allah ele at Musa fam Sinai lekman o Tuhan Obam Sabo wirigmu etmano diroho hweag-irik watfag,

² “Hat hun Harun hinim en de it ap homi Israel on abirangge enenuk baloho wenaharuk kwit, enenggul unuk hundomog enahain elekwe domog baliyug. It ap on enenuk wenako balduk kwit de,

³ it umur dua puluh tahun emberim fil on en tentara weim yabuk alereg on halug, it enenuk balduk kwit, enowesi nim esan misig lohwal heg baliyug.

⁴ It enenggul unuk domog ai en ap misig heg hit let-henebukwag ulug hweag-esakiyug,” ulug hweag-etfag.

^5-16 It enenggul unuk domog etmano en enowesi wene melal-enepuk on omano Musa, Harun inim let enebukwag ulug, eneko fesebag on enenuk de su. Unggul unuk Enowe melal-enepuk on Ruben on Elizur hun Syedeur amloho Simeon on Selumiel hun Zurisyadai amloho Yehuda on Nahason hun Aminadab amloho Isakhar on Netaneel hun Zuar amloho Zebulon on Eliab hun Helon amloho Efraim on Elisama hun Amihud amloho Manasye on Gamaliel hun Pedazur amloho Benyamin on Abidan hun Gideoni amloho Dan on Ahiezer hun Amisyadai amloho Asyer on Pagiel hun Okhran amloho Gad on Elyasaf hun Rehuel amloho Naftali on Ahira hun Enam amloho

Unggul unuk Enowe melal-enepuk on

¹⁷ It ap enebe nesanggo en etan let-enepukmu re it Musa, Harun inim en de

¹⁸ ap homi omano abirangge re tanggal satu bigalem bireneg on wereg kweleg kabog-dukwag ulug hweag-esebag ma, kabog-debag ma re it ap homi inindip endag-atil watfag aleroho it enunggul unuk ebe on domog deg aleroho neg lisu balfag. It ap on neg enebe umur dua puluh tahun emberim fil deg on At Tuhan en wene melale fesebag

¹⁹ aleroho enunuk balfagdeg wenag-enepfag. Mundoho aire at Musa en o Sinai leimu etma wereg lit debag.

^20-46 Ap enebe umur dua puluh tahun emberim fil deg on iren tentara welam alereg on omano re, enunuk enunggul unuk deg aleroho, it enahain elekwe deg aleroho bal-enepuk kwit de, at Ruben hun Yakub amloho wandeba on anyo fam en de Naftali huli anyo balfag. It enebe seberoho re: Enunggul unuk Ap enebe seberoho re Ruben on 46.500 en Simeon on 59.300 en Gad on 45.650 en Yehuda on 74.600 en Isakhar on 54.400 en Zebulon on 57.400 en Efraim on 40.500 en Manasye on 32.200 en Benyamin on 35.400 en Dan on 62.700 en Asyer on 41.500 en Naftali on 53.400 en Enebe seberoho re: 603.550 en

Enunggul unuk Ap enebe seberoho re

⁴⁷ It ap Lewi on neg de it ap enunggul unuk amu on etma nim seberoho enunuk balfag fug,

⁴⁸ aire At Tuhan en Musa fam hweag-utuk kwit,

⁴⁹ “Haren ap tentara welam on enunuk balduk kwit aire, it enunggul unuk Lewi enap de enunuk baluk fug.

⁵⁰ It aire An Nobam Sabo ebe inim sabo ai ilonggoman duruk angge nim hwalduk kamag ulug hweag-esakiyug. It eneyabuk de An Nobam Sabo ai bearulug laheg, hwaleheg, duruk kamuhup. It enebe re o Sabo ai maseroho etma enobam sabo sal-dauk kamuhup.

⁵¹ Hit lahe henebe hihiloho lakoho halug de, it ap Lewi on ai en An Nobam sabo ai meiyaloho walug lalug de obale ketma etma wirik lauk kamuhup. It Lewi enap ai on de fug famen it ap homi amu on eke en o Sabo ai horogma aik lauk halug de unggum ebe binggi waruhup.

⁵² It ap homi Israel on amu on etma re enobam sabo enebe kabog-heheg wiruhup, it ap enunggul unuk domog etmano enesahalimu en de enobam sabo wirig kwe bendera eneg angge deleg on anyo aluluk kwe wiruhup.

⁵³ Famen de it ap Lewi on de An Nobam Sabo aluluk maseroho wiruhup. It ai en de ap homi en horogdoho aik wahail lauk em, ai fam An nolok atlug it Israel on etmano binggi enowarihi ha no re iren kahaleg welamuhup,” ulug hweag-etfag.

⁵⁴ Airoho hweag-etfag ma re it ap homi Israel on anyo en de Tuhan en Musa fene en wene melaloho hweag-esebag ale anyo higitdoho debag.