Matyê 1 - Kaa Shwî

Pəmə́ngâa-njʉʼ Yěso

¹ Mənyôghʼ pəmə́ngâa-njʉʼ Yěso Kəlísto ŋuu cʉŋə-ndə̂ fou Ndavîd, ə́ mbə́ ŋuu ngər-ndə̂ Ábələhâm ə̂ mwo:

² Ábələhâm lə jí Ísaghʼ, Ísaghʼ jî Yokôp, Yokôp jî Yúda gháp pə pəfə̌r pé.

³ Yúda jî Perésʉ gháp Zará, mə́ ghap pə̂ Tamâr, Perésʉ Jî Esəlôm, Esəlôm jî Arâm.

⁴ Arâm jî Aminadâp, Aminadâp jî Náasoŋ, Náasoŋ jî Salə́məu,

⁵ Salə́məu jî Bôoz, mə́ pə Bôoz pə̂ Rahâp, Bôoz jî Obêd, mə́ pə Obêd pə̂ Rwîtə, Obêd jî Yesê,

⁶ Yesê jî fou Ndavîd, fou Ndavîd lə jí Salə́məu, mə́i mə́ pə Salə́məu lə pə́ ngwě Wilí.

⁷ Salə́məu jî Lobohâm, Lobohâm jî Ábya, Ábya jî Azâf,

⁸ Azâf jî Jozafâd, Jozafâd jî Jorâm, Jorâm jî Ozyâs,

⁹ Ozyâs jî Johatâŋ, Johatâŋ jî Ashâazə, Ashâazə jî Ezékyǎsʉ,

¹⁰ Ezékyǎsʉ jî Manasê, Manasê jî Amôŋ, Amôŋ jî Jozyâs,

¹¹ Jozyâs jî Yekonya gháp pə pəfə̌r pé. Ə́ pə̂ mpfu wêi, pə́ ghoutə pye Ísə́lahêl, ə́ ndághʼ gháp ngʉ̌ pəghaŋə tsâŋ ntso, ə́ ndǎghʼ gháp ńdə́r lə̂ Babilônə.

¹² Zə̂ ləwěi pye lei, Yekonya jî Sheltyêl, Sheltyêl jî Zolobabêl,

¹³ Zolobabêl jî Abyûd, Abyûd jî Elyakîm, Elyakîm jî Azôo,

¹⁴ Azôo jî Sadôghʼ, Sadôghʼ jî Akîm, Akîm jî Elyûd

¹⁵ Elyûd jî Elyazâa, Elyazâa jî Matâŋ, Matâŋ jî Yokôp,

¹⁶ Yokôp jî Yosêp, Yosêp pə̂ ndə̌u Mǎyaa, Mǎyaa pə̂ mə́ pə Yěso yi pə́ fûŋ ńgó yé Nzaʼ-nkʉ*.

¹⁷ Ə́ laghʼ nâa mbə̂ məwěi ntsap ləkwo lə̂ ləghə̂m lə̂ fú lə́ Ábələhâm ńgwó ńkə́u lə́ fou Ndavîd; ə́ mbǒu mbə́ məwěi ntsap ləkwo lə̂ ləghə̂m lə̂ fú lə́ fou Ndavîd ə́ ngwó nkə́u lə̂ mpfu yi pə́ lə ghǒu pye Ísə́lahêl, ə́ ndághʼ gháp ńgʉ̌ pəghaŋə-tsâŋ ntso, ə́ ndǎghʼ gháp ńdə́r lə̂ Babilônə; ə́ fú mə́u, ə́ nkə́ ncí ngwô məwěi ntsap ləkwo lə̂ ləghə̂m mboŋə́ wǒ kə́u lə́ Nzaʼ-nkʉ*.

Pə́ jí Yěso

¹⁸ Yo ghíʼ ə́ lə lěi, pə́ poŋə́ jí Yěso Kəlísto. Mə́ yé Mǎyaa lə ghí pə́, mə́i Yosêp túŋu mə́ no tû yé tə pə́ pə̂i, lə́ gháp zʉ́ pyêr pə́ tə́ zôʼ, pə́ jwô a pə̂ yi shuŋú; ə́ ngǐ pə́ yi shuŋú yə́rə́, ə Zəghʼə Ndêi-lěi lə́ ghʉ.

¹⁹ Ndə̌u ye Yosêp pə̂ ŋuu, ə Sê jwô yé ghíʼ ŋuu ndʉŋ-ndʉŋ* mbi zʉ́, lə́ káa a pə́ nkôŋ yé lə̂ sə̂-nzəm Mǎaya mbi lâʼ ghíʼ ləpə̌ʉ* lâʼ záp lə pə́ ntúŋú; ə́ ncʉ́ʼ mə́ nkwâŋ pə́ ghíʼ a wo lə̌ʼ no yé pə́ nzəm-nzəm tə lə́u ŋuu jî yé po.

²⁰ Ə́ mbyér mə́ nkwâŋ kwaŋə́, ə́ ndé njwo, ə́ njwó tâʼ cwôʼ Sê*, a lâʼ lə́ zʉ́ ngô: «Yosêp, gho yi o pə̌ ŋuu ngər-ndə̂ fou Ndavîd, pfú ngwě gho Mǎyaa ńŋə́ ndə̂ tə́ pôghʼ, ńté ńgó â yi shuŋú gháʼá, ə́ pə̂ pə̂ zə̂u yi Zəghʼə Ndêi-lěi lə́ ghʉ̌.

²¹ A ghʉ̌ jí môu mbiŋə, ô cî ləjôghʼ yé ńgó Yěso, ə̂ lághʼ ńdâʼ ngô: “Sê táa ghʉ̌ pə cwôr”, ə́ fûŋ yé yə́rə́, ńté ńgó zʉ́ lə́ táa ghʉ̌ pye lâʼ páp cwôr ndou məno tə́poŋ máp.»

²² Mwo məno laghʼ ḿbə̂utə gháʼa lə̂ tsâr yi Nde lə cóghʼ ntsʉ ntsətə-nkəʉ ye, a lâʼ ngô:

²³ «Pə́ táa ghǐ jwó, môu-ngou pyér pə́ tə́ jǐ no ŋuu mbiŋə, ə́ mbə́ yi shuŋú, ə́ njí môu mbiŋə; ə́ pə cí ləjôghʼ yé ńgó Emányuwêl, ə́ lághʼ ńdâʼ ngô: “Ə Sê wə́ nou paghʼə.”»

²⁴ Yosêp lei tə njyê, ə́ ngʉ̌ zə̂u yi cwôʼ-Sê yǎa ndǎʼ lə́ zʉ́, ə́ mpfú ngwě ye ńŋə́ ndə̂.

²⁵ Lə́ káa gháp zʉ́ láʼ núŋ, tə a lâʼ njí môu wei; Yosêp cî ləjôghʼ yé ńgó Yěso.