Hebələ̂ 1 - Kaa Shwî

Sê lə leitə́ lə́ Môu ye ə́ ndâʼ no lə́ pye-mə́soŋ

¹ Ə́ lə pə̂ cǒ mpfu, Sê lêitə́ lə́ pətsətə́-nkəʉ pé, ə́ ndǎʼ no lə́ pə́ mə́ngâa-njʉʼ pághʼə məmpfu tə nzáa mbaa lə̂ məmbə̂u tə nzáa,

² lə́ ə́ pou mbə́ lə́ ləlʉŋə́ nzʉ̂ yi mpfu wo, yi ə́ cʉ́ʼ mbə́ pə́ lə̂ ndághʼ ndyəghʼtə́ lo, a lêitə lə́ Môu ye ə́ ndǎʼ no lə́ paghʼə. A lə pou nkə́ ndêitə́ pə́ lə́ Môu ye wêi ə́ ntsúŋú ndəu nzʉ̂, ə́ ncóghʼ zə̂u tsəm yi ə́ pə́ cər wó lə́ zʉ́.

³ Pə́ jwô ləghûʼ Sê tsəm pə́ ndəu zʉ́, a lâghʼ ḿbə̂ kwaʼ ghíʼ Sê pə̌, a laghʼ tsâr yé yi ə́ ghwǒ mətəʉ ə́ ntôutə nzʉ̂ zei. A lə lei tə sôghʼ məno tə́poŋ pye-mə́soŋ tə ə́ kuʼ, a nkôʼ ńdə́r lə̂ tʉ̌-lə́pû, ə́ nyáŋ lə̂ ndyəghʼə́ pô Tǎa Sê yi təʉ, zʉ́ Sê yi a ghwǒ mətəʉ mə́tsəm.

Môu Sê ghǔʼ ə́ nděi pəcwôʼ Sê

⁴ Ə̂ zə̂u yi ə́ ghʉ̌, Sê lə ghʉ̂ Môu ye ghûʼ ə́ ndêi pəcwôʼ pé, ə́ pə̂ yə́rə́, a ŋə̂ yé lətə̌ʉ yi ə́ lěi yi pəcwôʼ pé.

⁵ Ə́ yaa ngǐ pə́ mə́i Sê laa kə́ lâʼ yé lə̂ cǒ cwôʼ ye ngô: «Ô Môu ghaa, lə̂ fú leʼé wo, məŋ Tə́ gho.» A laa kə́ lâʼ yé lə̂ cǒ cwôʼ Sê ngô: «N ngʉ̌ pə́ Tə́ gho ô pə́ Môu ghaa.»

⁶ Lə́, ə́ lə pə́ mpfu yi Sê lə pə́ ngwô ntə́u Môu ye yi a pə̌ nduŋ-mbi lə́ maa zə̂u tsəm yi a lə tsuŋú, ə́ ndǎʼ ngô: «Pəcwôʼ Sê pə́tsəm ghwo lə̂ nkʉ́ʼtə́ sê mbi zʉ́, ə́ ngúʼtə́ yé.»

⁷ Ə́ ngwǒ lə́ pəcwôʼ Sê, mə́i Sê tû-mbəʉ yé lə lâʼ ńgó gháp pé pəghaŋə-faʼ pé ə́ mbə́ ghíʼ kəfwor, ə́ mbou mbə́ ghíʼ mələ̂ʉ mǒghʼ.

⁸ Lə́ ə́ ngwǒ lə́ Môu ye, a lâʼ ngô: «Ô Sê, lwoŋ-lə́fou zô láʼ cí pə̂ pə́ wó.» Ə́ nkə́ ncí ndâʼ ngô: «O laghʼ pə̂ no lə́nə́ʉ ńsâʼ pye-mə́soŋ.

⁹ O koŋ no yi ə́ pə́ ndʉŋ-ndʉŋ, ə́ mbou mbâa no yi kâa pə́ ndʉŋ-ndʉŋ, ə̂ zə̂u yi ə́ ghʉ̌, Sê yi a pə̌ Sê zô lə wo nou ngaŋə-ku zô, ə́ ntsóʼ pə́ ghô ə́ ndǎghʼ məwə̂r ńtsə̌ʼ ghô, ə́ pə̂ mi ə́ wo ghʉ̌ ô nyáŋ nkə́ mbə̂ pə́ cər lətsei.»

¹⁰ A kə̌ ncí ndâʼ ngô: «Â gho Nde yi o lə fú ləjitə́, ə́ ntsuŋú ndesé, ə́ ndǎghʼ mbô mô ńtsúŋú ləfaŋ.

¹¹ Məzə̂u mei mə́tsəm ghʉ̌ mě, lə́ ə́ ngwǒ lə́ gho, mə́i o láʼ cí pə̂ pə́ wó. Ndesé gháp ləfaŋ táa pəpə́ ghíʼ məlwuŋə məndǐ;

¹² ô kátə́ měi ghíʼ pə́ kátə məlwuŋə məndǐ lə̂, Məzə̂u mei ghʉ̌ pəpə́ ghíʼ məndǐ pəpə lə̂. Lə́ ə́ ngwǒ lə́ gho, mə́i o láʼ cí pə̂ pə́ wó, o láʼ me gho po.»

¹³ Sê laa kə́ lâʼ yé lə̂ cǒ tâʼ lə́ pəcwôʼ pé ngô: «Tó nyáŋ lə̂ ndyəghʼə́ pô ghâa yi təʉ, n ngwo ghʉ̌ pəghaŋə mbəu pô cʉ́ʼ lətǎghʼ məkuʼ zô.»

¹⁴ Pəcwôʼ Sê, ə̂ məzəghʼə, ə́ mə́ fâʼ mbó Sê: a tə̂u gháp ńgó gháp wó mpfútə́ pye pi Sê wo ghʉ̌ gháp cwôr.