Filîpə 1 - Kaa Shwî

Ə tsêʼtə

¹ Məŋ Pôl, ə́ ngʉ́ Timotêi; pâghʼ pye pi paghʼ faʼ nzəm Yěso Kəlísto. Paghʼ ŋwáʼá ŋwaʼa wo, ə́ ŋə̂ lə́ pye pi gháp lə lěi nzəm Yěso Kəlísto, ə́ ncʉ́ʼ pye Sê, ə́ túsoŋ Filîpə; ə́ ŋə̂ mbaa mbó pye pi gháp nâŋtə məcûʼtə pye-Kəlísto, ə́ nkʉʼʉ́ ŋə̂ mbó pye pi gháp pfûtə lə̂ fâʼ məfaʼ cər məcûʼtə pye Kəlísto:

² Ńgó Tə́ waghʼə Sê gháp Nde waghʼə Yěso Kəlísto ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

Pôl pə̌ sʉ̂ʉtə Sê tû pye-Kəlísto pi ə́ pə̂ túsoŋ Filîpə

³ M mə̌ ŋə̂ nkhwo mbó Sê zaa, ə́ maa mpfu tsəm yi n nkwǎŋ wéi.

⁴ Ə́ pə̂ mpfu tsəm yi m mə̌ sʉ̂ʉtə Sê tû pei, n ndâghʼ pə́ lətsei ńsʉ́ʉtə́,

⁵ ńté mbə̂u yi pei laghʼ ńtóutə́ ghâa lə̂ ntsə́tə́ Nkəʉ Shʉʼʉ, tə fú ghíʼ pei lə pə́i Nkəʉ Shʉʼʉ zêi, ə́ ntó ńkə́u leʼé wo.

⁶ Tâʼ no yi m mə̌ ntsuŋú ńjí pə́ ńgó Sê yi a kə ghʉ̌ pei khwôr faʼ shʉʼʉ yo, wo kə́ tóutə́ wéi tə wǒ kə́u ləlyəghʼtə́, ə́ leʼé yi Yěso Kəlísto wo kə́ cí tó.

⁷ Zə̂ zə̂u yi n ntsâa zěi lə́ pei pə́tsəm, ńté no n nkoŋ wéi tə myâghʼ ntə̂ʉ ghâa. Pei pə́tsəm pə́ ntôutə ghâa lə̂ faʼ yi Sê lə lǎghʼ poŋə-ntə̂ʉ yé yi tə́ ndaghʼə ńcóghʼ mbó məŋ, pei pə̂ ntôutə ghâa, ə́ mbaa mpfu wo yi m mbə̌ cər pəcêŋ ə́ ndə̂-tsâŋ lo, mbaa mpfu yi m mə̌ ndaʼ mbó pye ńgó Nkəʉ Shʉʼʉ, ə̂ no lə́nə́ʉ, mbaa mpfu yi m mə̌ ngʉ̌ pye tsuŋu mbə́i.

⁸ Sê pə̌ njî ńgó no yi n ndâʼ, ə́ pə́ lə́nə́ʉ, n nkoŋ wéi lə̂ ntə̂ʉ ghâa tsəm ə́ ndʉŋ-ndʉŋ ghíʼ Yěso Kəlísto koŋ wéi.

⁹ Ə zə̂u yi n ndôu zěi mbó Sê ńté wéi ə́ mpfu yi m mə̌ sʉ̂ʉtə yé pə́ ngô: Ə nkoŋə kə́ kʉʼʉ́ ngûʼ ghuʼú təcər pei, ə́ ngʉ́ pei tsuŋú njí ŋuu yi Sê pə̌ wěi, ə́ mbou ngʉ́ pei fú tsuŋú nzúʼ no yi tsâr yé laʼ zěi,

¹⁰ ńjí ńgó ə́ lei yə́rə́, pei kûʼ lə̂ njí no yi ə́ pǒŋ lə̂ ngʉ́. Ə̂ pə́ yə́rə́, Yěso táa ngǐ kə́ cí tó, pei pə́ tə́ lǒʼ; ŋuu kə́ mbóu ngwo yé có zə̂u yi mboʼ a fə̂r wéi mə́u po.

¹¹ Pei lə̌i ngʉ́ yə́rə́, mə́i Yěso Kəlísto wo tóutə́ wéi, pei ghʉ́ məfaʼ shʉʼʉ ə̂ záa; ə pye jwó ə́ ngúʼtə́ Sê, ə́ mbou ŋáʼá ndwuŋ yé ŋə́ tʉ́.

Ngwôʼ Pôl ghʉ Nkəʉ Shʉʼʉ kʉ́ʼʉ sâr yʉʼ

¹² Pəfə̌r pei jí ńgó no yi ə́ kə cə́r ghâa kə ghʉ Nkəʉ Shʉʼʉ pə̂i nkʉ́ʼʉ́ sar pə̂ yʉʼ.

¹³ Ə́ kə lei pə́ yə́rə́, ŋuu tsəm cər nzeʼ ngə́mnaa mbaa maa yʉʼ tsəm jî ńgó m mbə́ ndə̂-tsâŋ ńté Nkəʉ Shʉʼʉ Yěso Kəlísto.

¹⁴ Pəfə̌r tə nzáa lə jwó ghíʼ m mbə̌ ndə̂-tsâŋ, ə́ nkʉʼʉ́ ncóghʼ ntə̂ʉ gháp lə̂ no Nde, gháp ntə̂ʉ mpfu wo pə̂ sâa-sǎa ə́ ndâʼ no Sê tə́ pôghʼ có zə̂u.

¹⁵ Ə́ pə́ lə́nə́ʉ ńgó pəcó pye laʼ záp tsâr Sê pə́ lə̂ ndághʼ ńŋwə́itə́ ghâa, mbaa lə̂ ndághʼ ńfə̌iʼ mbəʉ záp lə́ məŋ; lə́ pəcó pye ghi pə́ laʼ záp tsâr Sê, ə́ ndaghʼ pə̂ ntə̂ʉ shʉʼʉ ńdáʼ.

¹⁶ Pei pə̂ pye laghʼ ntə̂ʉ shʉʼʉ ńdáʼ, ńté ńgó gháp ghwo nkoŋə nzəm məŋ, ə́ mə́ njî ńgó faʼ zâa pə́ lə̂ nyárə́ ńgó ə no yi ə́ kwar cər Nkəʉ Shʉʼʉ pə́ lə́nə́ʉ.

¹⁷ Lə́ pəcó pye ghí pə́ laghʼ pə̂ lʉŋtə leʼtə Nkəʉ Shʉʼʉ, ə kwaŋtə yi ə́ cʉ́ŋə gháp pə̂ yi tə́poŋ, gháp kwaŋ ńgó gháp wo ghʉ̌ yə́rə́, ə́ lǎghʼ kʉʼʉ́ ngwôʼ yi njwô zěi ndə̂-tsâŋ.

¹⁸ Káa ə̂ pə́i mbə̂ yé có zə̂u! Gháp lə̌i mə́ ndâʼ lə̂ ntə̂ʉ shʉʼʉ kəʉ lə̂ ntə̂ʉ tə́poŋ, mə́i no pə́ pə́ ńgó pə leʼtə́ ləjôghʼ Yěso Kəlísto, no mə́u pou mə́ mboŋə́ ghâa gháʼate. N ngwo kə́ pə́ tsei tsěi tê yə́rə́,

¹⁹ ńté no m mə̌ njî ńgó zə̂u pei tsəm táa ghǐ lyəghʼtə́, n ngwô ləcwôr ə́ ndeitə́ lə̂ məsʉ̂ʉtə méi tû məŋ mbaa mbə̂u yi Zəghʼə Yěso Kəlísto laghʼ ńtôutə ghâa.

²⁰ Ə zə̂u yi m mə̌ ntsâa mbou mə́ nzʉ̂ʼtə lə̂ ntə̂ʉ ghâa tsəm, ə́ pə́ ńgó koo n ngʉ̂ có zə̂u yi ə́ wo ghʉ̌ sə̂ʉ kó ghâa, tə ncʉ́ʼ yə́rə́ n ndâghʼ lənyâŋ ghaa ńgʉ́ ləjôghʼ Yěso ghûʼ, ə́ mpfu wo ghíʼ m mbyěr pə́ wó, kəʉ ghíʼ n ndə̌i mbə́i nkwʉ́ kwʉ́ lo.

²¹ Kəlísto yaa mbəi mbə́ no pâa tsəm ńté ńgó n ndə̌i mbə́ wó, mə́i m mbə́ wó ńtê pə́ yé; ə́ nkə́ nkwʉ́, mə́i ləwʉ̂ pə̂ pə́ pəi yi n ngwo zʉ́ nzəm zʉ́.

²² Lə́, n ndə̌i nkə́ mə́ ncî pə́ mbî, mə́i n ngwo fǎʼ məfaʼ mi ə́ wo pfútə́ pye. Ghíʼ ə́ kə́ mbə́ yə́rə́ lə̂, kâa m mə́ njî ghâa kəʉ ə́ pə́ ntúŋu ńgó n nkə́ mə́ ncî pə́ mbî ə́ mə́ mpfútə pye-mə́soŋ kəʉ ə́ pə́ ntúŋu ghâa nkwʉ́ kwʉ̂?

²³ Ə̂ məlaŋə́-ndə̂u mə́mbwô mi ə́ tə́ʉ mbi məŋ; ə zâa yi m mə̌ ntsâa lə̂ nzáp, ə́ pə̂ lə́ fú ndəu ndesé yaʼa, ə́ ndə́r ńgwo ncə́r Kəlísto, zêi zə̂ ə̂ yi ə́ pǒŋ mbó məŋ ndêi có;

²⁴ Lə́ ə́ sâa-sǎa mbôŋ ńgó n nkə́ mə́ ncî pə́ mbî ńté wéi.

²⁵ Ghíʼ n ntsúŋú mə́ njî yə́rə́ lə̂, n ngwo nyáŋ, ə́ pə́ təcər pei, ə́ pə́ tôutə wéi, pə̂i-ntə̂ʉ zéi nzəm Kəlísto ghúʼ, pei nyáŋ lə̂ lətsei.

²⁶ Ə̂ lêi yə́rə́, n ngʉ́ mbə̌ʉ tə mbə́ təcər pei, pei kʉʼʉ́ mbə́ cər lətsei ńté ghâa, ə́ ńté ghíʼ pei lǎr mbəʉ zéi lə́ Yěso Kəlísto.

²⁷ Lə́, pei ŋə̂i lə̂ mbə̂u yi Nkəʉ Shʉʼʉ Kəlísto pə̌ ntúŋú. Ə̂ lêitə́ yə́rə́, n ntó lâʼ pei, kəʉ ndə́iʼ tó po, n nkə̂ mə́ nzûʼ pə́ ńgó pei ghwo tâʼ kwaŋtə moʼ, ə́ mbou mə́ ndâghʼ pə́ tâʼ ntə̂ʉ ńdwóʼó ntso pə̂i-ntə̂ʉ lə̂ ndághʼ ḿbáa no yi pei lə pə́i, ə́ pə̂ no lə́ lə́nə́ʉ yi ə́ fû lə̂ Nkəʉ Shʉʼʉ.

²⁸ Pəghaŋə mbəu péi lə̌i ngwə́rə́ wéi, koo pei pôghʼ. Pei ghʉ̂ yə́rə́, ńjí ńgó gháp fú mə́u, ə́ njwó ńgó gháp pə́ lə̂ laŋə́-ndə̂u ləcwî. Ə̂ póu mbə́ mbó pei, ə́ mbə́ ləiʼi yi ə́ nyárə ńgó pei pə́ lə̂ laŋə́-ndə̂u ləcwôr, məno mêi mə́tsəm pə̂ mi Sê lə̂ ghʉ.

²⁹ Ńté no Sê lə ŋə́ wéi saa lə̂ ngʉ́ məfaʼ Kəlísto, ə́ ngí pə́ pə̂i no yé, ə́ nkə́ mə́ njwô ngwôʼ nzəm zʉ́ lə́wó.

³⁰ Lə̂ mpfu wo pei kə̌ mə́ ndwóʼo zéi ntso yi pei kə jwó n ndwóʼo cǒ mpfu, n nkə̌ mbyér mə́ ndwóʼo lwóʼo, pei tsuŋu mə́ njí.