Filemôŋ 1 - Kaa Shwî

Ə tsêʼtə

¹ Ŋwaʼa wo fǔ mbó məŋ Pôl yi m mbə̌ ndə̂-tsâŋ ńté no Yěso Kəlísto, paghʼ Timotêi yi â fə̌r waghʼə nzəm Yěso Kəlísto ŋə́ ŋwaʼa wo lə́ gho Filemôŋ, yi o pə̌ sə̌u waghʼ yi lətəi-ndwuŋ, paghʼ zʉ́ pə́tsəm naa fâʼ nzəm Yěso Kəlísto,

² ə́ ŋə̂ mbó pye-Kəlísto pi gháp kəitə ndə̂ gho, ə́ ŋə̂ mbaa lə́ Ápiya fə̌r wághʼə yi məngyě mbaa mbó Arəshîpə yi a pə̌ ngaŋə-ku wághʼə cər ntso nzəm Yěso Kəlísto:

³ Ńgó Tə́ waghʼə Sê gháp Nde Yěso Kəlísto ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

Nkoŋə gháp pə̂i-ntə̂ʉ nzəm Yěso Kəlísto yi Filemôŋ ghwǒ

⁴ Fə̌r Filemôŋ, ə́ pə̂ mpfu tsəm yi m mə̌ ngʉ sʉ̂ʉtə, n nkwâŋ ghô, ə́ mbou ŋə́ nkhwo mbó Sê zaa;

⁵ ńté no m mə̌ nzúʼ pə́ leʼtə mbə̂u yi o laghʼ ńkôŋ pye Kəlísto pə́tsəm, mbaa mbə̂u yi o lǎghʼ ńgwǒ pə̂i-ntə̂ʉ nzəm Nde Yěso Kəlísto.

⁶ M mə̌ sʉ̂ʉtə Sê ńgó a ghʉ̂, ə pə̂i-ntə̂ʉ nzəm Kəlísto yi paghʼə təmtə mbə̂i zěi, ə̂ fâʼ ndəu gho ə́ ngʉ̌ o tsuŋú njí məno shʉʼʉ mi ə́ pə́ ntúŋu ńgó paghʼə ghʉ̂, ə́ ndaghʼ fáʼ nzəm Yěso Kəlísto.

⁷ Ə fə̌r, ə nkoŋə yi o ghwǒ nzəm pye-mə́soŋ pə̌ ŋə̂ ghâa tə́koʼ lətsei, ə́ mbóu mə́ ncôghʼ mətəʉ mâa gháʼate, ńté no o kə côghʼ ntə̂ʉ pye Kəlísto.

Pôl pə̌ sʉ̂ʉtə Filemôŋ ńté Onezîmə

⁸ Ghíʼ ə́ pə́ yə́rə́ lə̂, mboʼ n ntə̂i ndâghʼ ghíʼ poghʼo təmtə́ mbə́ nzəm Kəlísto, ə́ ndǎʼ gho zə̂u yi o ghwǒ lə̂ ngʉ́,

⁹ lə́, n njwǒ ńgó n ngwo cʉ́ʼ lǎghʼ pə̂ nkoŋə yi ə́ pə̌ təcər poghʼo, ə́ sʉ́ʉtə́ ghô lə̂ no zêi yo. Məŋ Pôl, yi n ntə̌ʉ mpfu wo, ə́ ncʉ́ʼ mbə́ tâʼ ntikáŋ, ə́ mbou mbə́ ndə̂-tsâŋ ńté Yěso Kəlísto,

¹⁰ m mə̌ sʉ̂ʉtə ghô ńté Onezîmə. Â môu ghaa lə̂ no Yěso Kəlísto yi n ndə kə́u ndə̂-tsâŋ, ə́ njí yé.

¹¹ Ə́ lə pə̂ cǒ mpfu a pə̂ mbó gho, káa a pə̂ yé có zə̂u mbó gho, lə́ a pou mbə́ mpfu wo, ə́ mbə́ zə̂u lətəi-ndwuŋ mbó gho mbaa mbó məŋ.

¹² M mbághʼə yé ŋə́ lə́ gho mpfu wo gháʼá, a pə̂ mbó məŋ, ə́ ncʉ́ʼ mbə́ ghíʼ kwaʼ ntə̂ʉ ghâa.

¹³ N ntə̌i mə́ ntsâa lə̂ nyér yé mbəʉ məŋ ghíʼ m mbə̌ ndə̂-tsâŋ ńté Nkəʉ Shʉʼʉ lo, ńjí ńgó a pə̌ mpfûtə ghâa lə̂ zô yʉʼ.

¹⁴ Lə́, kâa n kə kôŋ ghâa lə̂ ngʉ́ có zə̂u tə́ ghó o pə̌i, ńjí ńgó lei yə́rə́, lə́u o ghʉ̂ ghô no shʉʼʉ pə́ ghíʼ pə́ fárə ghô fárə́ po, lə́ ə́ ndǎghʼ pə̂ ntə̂ʉ shʉʼʉ ńgʉ́.

¹⁵ Ndeʼ có mə́i pei Onezîmə kə nyéʼ sěi, ńjí ńgó pei zʉ́ pou ngǐ jwó, ə́ fú nyáŋ tə lə́u ndáʼ kə́ sêi wéi zʉ́ po.

¹⁶ Ńté no a pə̂ mpfu wo, káa pyêr yé pə̂ ndaʼ puʼ, lə́ a pə̂ mpfu wo tə ndêi puʼ: â tâʼ fə̌r yi lətəi-ndwuŋ. A pə́ mbó məŋ, ə mbə́ ŋuu lətəi-ndwuŋ gháʼate, lə́ a ghwo lə̂ mbə́ ŋuu lətəi-ndwuŋ mbó gho tə ndêi yə́rə́; a wo pə́ mbó gho, ə́ pə́ kwaʼ ŋuu-məsoŋ, ə́ kə́ cí pə́ fə̌r gho nzəm Yěso Kəlísto.

¹⁷ O lə̌i mbyé ghâa ghíʼ sə̌u gho, o pfû yé ghíʼ ə́ tə́i mbə́ məŋ, mə́i o pfǔ ghâa.

¹⁸ Ə́ lə̌i mbə́ yi a kə wʉ̂ no mbó gho, kəʉ ngwô pə̂ nzǒ zô o nyêr, məŋ lə̂ ngʉ̂ ncʉ́ʼ ntʉ́ zěi.

¹⁹ N ndaghʼ pə̂ ndʉʉ pô ghaa ŋwáʼá mwo məno: Məŋ Pôl, n ngʉ̌ paghʼə́ nzǒ ye zêi ńŋə́ lə́ gho. Kwaʼ lə́nə́ʉ kâa n ngwô ghâa lə̂ nkʉ́ʉtə́ ghô kʉʉtə́ ńgó poghʼo ghwo nzǒ, lə́ nzǒ zêi pə̂ ləcǐ-mbî gho yi o ghwǒ lə̂ ŋə́ lə́ məŋ.

²⁰ Ə fə̌r ghâa, m mə̌ sʉ̂ʉtə ghô ńgó o lêitə́ lə̂ nkoŋə Nde, ə́ ngʉ̌ yo no shʉʼʉ lə́ məŋ, lǎghʼ ghíʼ poghʼo təmtə́ lə́ Kəlísto, ə́ ncóghʼ ntə̂ʉ ghâa.

²¹ N ntsuŋu mə́ njî ńgó ə no yo yi n ŋwaʼa ńŋə̂ lə́ gho lo, o wo ghʉ̌ zə̂u yi n ntúŋu gho zěi ńŋə́ lə́ məŋ. M mə̌ njî ńgó o pə̌i ghʉ̌ tə ə̂ lêi yə́rə́.

²² Kə́ ncí ntsúŋú tâʼ lûm ndə̂ ə́ ndaghʼ ńzʉʼtə́ ghâa, ńté no m mə̌ ntsuŋú njî ńgó ə́ wo leitə́ lə̂ məsʉ̂ʉtə méi, pə tsóʼ mbô lə́ məŋ, n ntó ńcə́r wéi.

Pəlyəghʼ-nzəm mətseʼtə

²³ Epafərásʉ yi paghʼ zʉ́ nǎa mbə́ ndə̂-tsâŋ ńté no Yěso Kəlísto pə̌ ntsêʼtə ghô,

²⁴ Máakúsʉ, mbaa Aristâkə ə́ nkʉʼʉ́ Demásʉ gháp Lúʼkáasʉ, ngaŋə-ku zâa cər faʼ kə̂ mə́ ntsêʼtə ghô záp lə́wó.

²⁵ Ńgó Nde Yěso Kəlísto ghʉ̂ pei jwó poŋə-ntə̂ʉ yé yi tə́ ndaghʼə.