Efêzə 1 - Kaa Shwî

Ə tsêʼtə

¹ Məŋ Pôl yi Sê lə kǒŋ ńgó m mbə́ ngaŋə-ntə̂u Yěso Kəlísto, ŋwáʼá ŋwaʼa wo. N ŋə̂ wěi lə́ pye Sê pi gháp pə́ Efêzə, ə́ mbə́ pye pi gháp lə cóghʼ ntə̂ʉ gháp lə́ Yěso Kəlísto, ə́ nkə́ njî gháp pə́ ndaʼ no yé.

² Ńgó Tə́ waghʼə Sê gháp Nde Yěso Kəlísto ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

Məno shʉʼʉ mi Sê lə lěi lə́ Kəlísto ńgʉ́ lə́ paghʼə

³ Ə́ poŋ ńgó paghʼə pə́ ngúʼtə Sê, ə́ zʉ́ yi a pə̌ Tə́ pə Nde waghʼə Yěso Kəlísto! Ə́ lə leitə́ ghíʼ paghʼə lə tsə́ʉ nzəm Kəlísto, a côghʼ mbwórə lə́ paghʼə, ə́ ŋə́ wághʼə məfuʼ mbə̂u lə̂ mbə̂u mi ə́ fû tʉ̌-lə́pû.

⁴ Sê lə ghí tsuŋú nzʉ̂, mə́i a lə láʼ mə́ ntsóʼ wághʼə ghíʼ paghʼə wo leitə́ nzəm Kəlísto, ə́ cʉ́ʼ pye pé; ə́ pə́ ndêi-lěi ə́ pǒu pə́ tə́ lǒʼ mbi zʉ́. Ə́ lə leitə́ lə̂ nkoŋə yi Sê lə ghwǒ nzəm paghʼə,

⁵ a zâʼ nzʉ̂ ə́ ndǎʼ tə ndǐ saghʼ mə́ ńgó paghʼə ghʉ̌ leitə́ nzəm Yěso Kəlísto, ə́ cʉ́ʼ ghəpə́ yé; yo zə̂u yi a lə kǒŋ koŋə́, ə́ ndághʼ poŋə-ntə̂ʉ yé yi tə́ ndaghʼə ńgʉ́.

⁶ Ə́ pə̂ yə́rə́, ə́ mbə́ ńgó paghʼə ghwo lə̂ ngúʼtə́ Sê ńté fuʼ tə fəiʼi zěi yi a lə ŋə́ lə́ paghʼə pə́ tə pfû có zə̂u, ə́ ndeitə́ ghíʼ a lə təmtə́ wághʼə pə Môu ye yi a kǒŋ yé gháʼate, a pə̂ tə́koʼ zə̂u lətəi-ndwuŋ yi a ŋə̌ lə́ paghʼə.

⁷ Ńté ńgó a lə laghʼ Kəlísto ńgʉ́ poʼ Sê, ə́ leitə́ yə́rə́ a tsûʼ wághʼə mbó ləwʉ̂ paghʼə cwôr, a lyə́ghʼə məno tə́poŋ mághʼə. Sê lə ghʉ yə́rə́ ndághʼ ńnyárə wághʼə mbə̂u yi poŋə-ntə̂ʉ yé yi tə́ ndaghʼə lǎghʼ ńgúʼ,

⁸ a lə fú ngʉ̌ məno shʉʼʉ lə́ paghʼə gháʼate, ə́ pə̂ ghíʼ a lə ghʉ̌ tû zághʼə tsóʼo, paghʼə jîno:

⁹ A lə ghʉ paghʼə jî no yé yi ə́ lə yǎa mbə́ pə́ ləlwǒ, zêi zə̂u pə̂ yi ə́ lə zâʼ nzʉ̂ ə́ mboŋə́ yé, a ntâghʼ ńgó a ghʉ̌ lěi lə́ Kəlísto, ə́ ghʉ̌ ə̂ pə̂utə́.

¹⁰ Zei no yi Sê lə ghʉ̌ ndaʼá ńgó a táa ghʉ̌ lə́ paghʼə lêi pə̂ ńgó a táa kəitə́ zə̂u tsəm yi ə́ pə́ tʉ̌-lə́pû mbaa ndəu ndesé, ə́ ghʉ̌ tâʼ fou lə̂ cʉ́ʼ mə́ sáʼ, ə fou wêi pə̂ Kəlísto.

¹¹ Paghʼə pə Kəlísto lə təmtə́ yə́rə́, ə́ laghʼ ḿbə̂ zaghʼə zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ paghʼə, ńté ńgó Sê ghʉ zə̂u tsəm pə́ ghíʼ a lə fú leʼé ntághʼ ńgó ə́ ghʉ̌ pə́ yə́rə́, ə́ mbou nkôŋ ńgó ə̂ pə́ yə́rə́.

¹² Ə́ pə̂ ńgó paghʼə pi paghʼə lə pə́ pəluŋ-mbi pye lə̂ ngwô kwaŋtə shʉʼʉ nzəm Kəlísto lə̂, paghʼə ghúʼtə́ Sê ńté no a ghǔʼ gháʼate!

¹³ Pei zéi lə lei tə nzúʼ tsâr no lə́nə́ʉ, ə́ Nkəʉ Shʉʼʉ yi ə́ ŋə̂ ləcwôr, ə́ mbə́i no Kəlísto; Sê côghʼ ləiʼi yé lə́ pei, ə ləiʼi zêi pə̂ Zəghʼə Ndêi-lěi yi a lə ghʉ̌ ndaʼá mə́u lə̂ ngʉ́ ŋə́ lə́ paghʼə.

¹⁴ Ə Zəghʼə Ndêi-lěi ə̂ nduŋ-mbi zə̂u yi Sê tə̌u ńŋə́ lə́ paghʼə lə̂ ndághʼ ńnyárə́ ńgó zə̂u tsəm yi a lə ghʉ̌ ndaʼá mə́u lə̂ ngʉ́ ŋə́ lə́ pye pé, a ghʉ̌ ŋə́; paghʼə ghʉ̌ ghwǒ məzə̂u mei mə́tsəm, ə́ mpfu yi Sê ghʉ̌ fú kwarə́ wághʼə lə̂ məno tə́poŋ. Ghíʼ ə́ kə́ mbə́ yə́rə́ lə̂, paghʼə pə́ ngúʼtə Sê mpfu tsəm, ńté no a ghǔʼ gháʼate!

Pôl pə̌ sʉ̂ʉtə Sê tû pye Kəlísto pi Efêzə

¹⁵ Ə̂ zə̂u yi ə́ ghʉ̌, tə fú ghíʼ n ndə zúʼ ńgó pei ghwo pə̂i-ntə̂ʉ nzəm Nde Yěso, ə́ mbou ngwô nkoŋə nzəm pye Sê pə́tsəm,

¹⁶ kâa m mə́ nkâa ghâa cǒ mpfu lə̂ ŋə́ nkhwo mbó Sê ńté wéi. M mbə̂ mpfu tsəm yi m mə̌ sʉ̂ʉtə Sê, ə́ nkʉ́ʉtə́ wéi,

¹⁷ ə́ mbou mə́ mbûʼ mbô mbó Sê, ə́ Sê Nde waghʼə Yěso Kəlísto, ə́ Tə́ yi a ghwǒ ləghûʼ, ńgó a ŋə́ wéi Zəghʼə jîno, ə́ yi ə́ wo ŋéʼ nyôghʼ méi, pei sâa-sǎa njí ŋuu yi a pə̌ wěi;

¹⁸ ńgó a ŋéʼ nyôghʼ méi, pei jwó nkeʼ ye. Ə̂ lêi yə́rə́, pei jí zə̂u yi a lə fûŋ wéi mə́u; ə́ njí mbə̂u yi məzə̂u shʉʼʉ mi a lə tsuŋtə́ lə̂ ndághʼ ńzʉ́ʼtə́ wéi mbaa lə̂ ndághʼ ńzʉ́ʼtə́ pəcó pye pi a lə tsóʼ gháp lǎghʼ nzáa, ə́ mbou mbôŋ,

¹⁹ ə́ mbou njí ńgó mətəʉ mi a ghwǒ ə́ mə́ ndághʼ ńnâŋtə wághʼə pi paghʼə pə̌i no yé, ə́ təi ńděi mətəʉ mə́tsəm. Ə́ mbə́ mətəʉ mi

²⁰ Sê lə lǎghʼ ńgʉ́ Yěso zʉ̂ʉ lə̂ ləwʉ̂ nou pəpfû sê, ə́ ngwo ńnyáŋ lə̂ ndyəghʼə pô yé yi təʉ, ə́ tʉ̌-lə́pû.

²¹ A pə́ yʉʼ wó, ə́ nděi pəcwôʼ Sê pə́tsəm gháp pə pəfou páp, tə mbaa zə̂u tsəm yi ə́ pə́ tʉ̌-lə́pû ə́ ngwǒ mətəʉ; a lei maa ŋuu ntsəm cər yo kəm nzʉ̂ mbaa cər kəm nzʉ̂ yi ə́ ghʉ̌ poŋə́ tó.

²² Sê lə côghʼ zə̂u tsəm mbó Kəlísto, ə́ ntághʼ yé tû-mbi lə̂ cûʼtə pye Sê ghíʼ gháp wo pə́ zûʼ ntsʉ yé.

²³ Ə cûʼtə pye Sê, ə̂ mbəʉ Kəlísto. Pə́ lei pə́ lə̂ cûʼtə pye Sê, ə́ njwô ńgó Kəlísto pə́ wó; a pə́ yʉʼ tsəm cər nzʉ̂.