२ थेसलोनिकी 1 - साःरो बाचा1 गे पावल, सिलास स़ोनो तिमोथीराए गेल्योनी थेसलोनिके सहरल लिज़्याव मन्दलीलाई गेबाबु परमेस्वर स़ोनो गेप्रभु येसु ख्रीसनी निमिननी आव चिथी परींद गेयाचिज़्या। 2 परमेस्वर गेबाबु स़ोनो गेप्रभु येसु ख्रीसनी जेल्योदा नियुँ गराँद जेयुँ होलाँ जैद ओयाचिरक। परमेस्वरए मिँरालाई न्यायस याफाल्रिज़्याव 3 गेनैं गेमेंर, जे परमेस्वरए ओपाँत जेयुँ झन ज़ उहुप्नाज़्याव, स़ोनो जे जेल मया दासिद झन ज़ जेखैनाज़्यावए, गे जेजूँनी परमेस्वरलाई एकतार धन्याबाद चरैःन्या ज़्यासो ज़ ताद ले। 4 स़ोनो जे प़ाइँ खिरीर दुखर सहिद परमेस्वरए ओपाँत थ॰रिद जेलिज़्यावए गे परमेस्वरए ओमन्दलीराए ङ़ाक जेजूँनी ‘आः चावर लिज़्यार’ लिद प़ाइँलाई ज़ है गेरादोज़्या। 5 नो जेदैज़्याव दुखराल परमेस्वरए ओन्याय चाव ज़ रैंःज़्या। परमेस्वरए ओराज्यालाव दुखर जेसहिज़्यावए, जे ओराज्या दैन्याकावर जेथ॰रिरिज़्या। 6 नो जेखिरी पसिज़्यावरालाई ते नो जेदैज़्याव दुखरानी परमेस्वरए ओन्यायनी ज़ जेखिस फेरैद्यान्या ले। 7 जे दुख दैज़्यावर ते गेस सिप ताद जेयुँ होलाँ तारिज़्या। हो बेलाक गेप्रभु येसु बनै यासक्ती ल्यो ओचाकर्यारास स्वर्गनी हुद वीं वीं चाँःज़्याव मेंःल सरैंःसिद, 8 परमेस्वरस माखैवर स़ोनो गेप्रभु येसुए चाव ओथा माभैंःज़्यावरालाई सजा याएरिज़्याव। 9 नोर प्रभुए ओङ़ाकिन स़ोनो ओसक्तीलाव ओज़गैकिन तँदा ताद खर्क ज़ मापुलुस्धुन्या सजाल परिरिज़्यार। 10 हो छ्याम फरी परमेस्वरए छैंव उमींराए याक्याँत ओल उमिन ब झन ज़ ज़गैव रैंःरिज़्या। स़ोनो ओललाई यायुँ हुप्ज़्यावराए याखार्ल उगुनर झन अचम्बलाव थ॰रिरिज़्या। आव गेरासथैज़्याव परमेस्वरए ओपाँत जे ब जेयुँ जेसुहुबोए नोराए याखार्ल जे ब जेतारिज़्या। 11 है जैद परमेस्वरए जेलाई उखुल्चिउल उयुँलाव मितावर ओजैचिउक, स़ोनो परमेस्वरए ओपाँत जेयुँ हुप्द चाव य़ेन दाव जेपैंज़्याव भरिल ओल ओसक्तीनी ज़ सयो·द ओयाचिउक लिद जे जेजूँनी परमेस्वरलाई एकतार ज़ गेपोंखारिज़्या। 12 हो ताकिन ची गेप्रभु येसु ख्रीसए उमिन जे जेल्योनी ब चाव रैंःरिज़्या, जे ब ओल उमिननी चाव जेरैंःरिज़्या। आव भरी गेपरमेस्वर स़ोनो गेप्रभु येसु ख्रीसनी नियुँ ओगराँवनी ज़ ओताक। |
© 2015, Wycliffe Bible Translators, Inc. All rights reserved.
Wycliffe Bible Translators, Inc.