Sofonías 1 - Nivaclé Bible

Pa lhnalhu'esh pa lhavôôc pa Lhcaanvacle

¹ Côque lhcliish pa Lhcaanvacle ti yiyôjiesha ja Sofonías jan t'aplhuqu'e ja Josias,*xa* lhaôs ja Amón, ti lhcaanvacleesh'e ja Judá. Ja Sofonías lhaôs ja Cusi, jô lhech lhaôs ja Gedalías, jô lhech lhaôs ja Amarías, jô lhech lhaôs ja Ezequías.

² Nôque yit'esh pa Lhcaanvacle: “Javômjat jayu lhacôm'a nava caaj'e na cotsjaat.

³ Javômjat jayu napi nivacle shi' nava yaquisetes, pa javômjat jayu nava ajôclôs shi' nava sajech, pa jancôtjatch'esha'ne jayu napi ojiyis pa jayjat'e jayu na cotsjaat napi nivacle.”

⁴ Nôque yit'esh pa Lhcaanvacle: “Pa jôclôjulh jayu na yipôcôt napi lhtatvelhavot yiey na Judá pa jayjuyjulh shta lhacôm'a napi yiey na Jerusalên. Pa javômjatey jayu na lhc'o'vat na chiydiosiyan Baal, pa namja nava lheyis napi lhcasinôc.

⁵ Pa javômjatc'oya jayu napi vôlh'apeejop nava lhôtôj'e nava lhajpôyjey ti yôclôjey'in nava catiis, napi t'acjatsuyshichamjop'in pa yetônjop'in na yey pa yuesham'in ti yetônjop'in na lhey na chiydiosiyan Milcom.*xb*

⁶ Pa javômjat jayu shta napi tanu'yic'oya, napin ninvo'yiysha'ne ca ninachyiy ca nitsiy'ôs.”

⁷ ¡Acano'eelhch'enshi yiey t'ajuyish pa Lhcaanvacle,*xc* lhayaash pa lhnalhu pa Lhcaanvacle ti shalhajulh! ¡Pa Lhcaanvacle pa yisclansha'ne pa vatcufayjat pa yivenchatem papi t'a'lhajop!

⁸ “Vooy pa lhnalhu'esh pa vatcufayjat pa jivalha jayu papi lhcaanvacles —yit'esha pa Lhcaanvacle—, papi lhcles pa lhcaanvacle shi' lhacôm'a papi yuych'e pava vena tôlheshi.

⁹ Jivalha jayu shta pa lhech nalhu papi t'ôs'apee pava shichaam pava lhashic, shi' papi yitsôyinjat'ôcji pava lhcutsjatesem shi' pava yijôts'ôclônesh'in pa lhajpôyich pa lhanvacle.”

¹⁰ Nôque yit'esh pa Lhcaanvacle: “Pa lhech nalhu chiypeya' jayu ti tôntaj'in ca chinefen nitôôlhshey na Lhashic'oya nava Sajech. Pa nitônvatsham'in jayu napi nivacle yiey na napu'eyshi yitsaat pa caaj jayu pa uj t'ôjôj pa nam'apee nava uticuy lhcles.

¹¹ ¡Pa ônelh'in avaatsheelh napi tsitenas'e na yitsaat lhey Felhech, lhayaash ti lhacôm'a napi lhavcashanjas ti vafsha'ne jayu, lhacôm'a napi chiyuyjatemvanôcji pa peso pa chiyvômjatsha'ne jayu.

¹² “Pa lhech nalhu jaycum'ejop jayu lha itôtaj ti javo'jeyshi jayu napi yiey na Jerusalên. Pa lhechesh pa jaclôyitsha'ne jayu napi nivacle vatlheclôôjtaj ti canoqu'enshi jan lhjunash ja ôtjayetas t'i' ti chiyamjatsham, pa yit'eshvaneen: ‘¡Pa Lhcaanvacle tan jayu ca nasnatesh pa'na, tanca lhecha pa isch'e' shi' pa ojeych'e!

¹³ Pa lhe'naa pava lhcôqueclitôy ti chinjôclesh'in jayu pa chiyvômjat jayu shta pava lhajpôyjey. Yisnatajesh jayu pava lhajpôyjey taj ti tanca nôv'ôcji jayu; yit'ijatajch'e jayu pava ôtjayetacuy taj ti tan jayu ca niyô'ji pa t'i'.”

¹⁴ ¡Palha shalhajulh pa uj lhnalhu pa Lhcaanvacle!*xd* ¡Palha shalhajulh, ti nach tatsha! Pa yicuuctenshi pa lhnalhu pa Lhcaanvacle pa uj ti tavijataych'e: ¡Pa yama papi ya'shesh ti yifiytajsha'ne ti yônjayanvatsham'in jayu!

¹⁵ Pa lhech nalhu'esh pa lhavôôc, pa vatanaputsjayash shi' pa tavijatay, ti yafalhch'e shi' ti chiy'amiyan pa'na, pa tulhitaj shi' pa shnacjay, ti yivôsen shi' pava jpeclis tulhshisha'ne;

¹⁶ pa lhech lhnalhu'esh pava vat'ônjanchey ca chinfuyutajch'ejop pa vatvatclônjayash ca natjuytajulh pava yitsates yijôt'as shi' pava toschisham jpôyjey.

¹⁷ Yit'esh pa Lhcaanvacle: “Yifanisheshjop'in jayu papi nivacle. Ca nit'ôtaytajsha'ne ts'ivee pa taclujuyeesh, lhayaash ti tanjuyeshyijulh pava lhsasch'e. Pava lhavoyey chiysichat jayu jan lhanfanash pa c'ocshi, vooy pa t'asjaan pa ninaclôpju jan lhjunash pa vat'samuuc.”

¹⁸ Vooy pa lhnalhu'esh pa lhavôôc pa Lhcaanvacle, pa tan jayu ca nalhjenesh papi nivacle, pa nilhecha pa lhclesanilh clim shi' pa cojiyaj, lhayaash ti itôjesh pa t'asuyi pa Lhcaanvacle pa tujesham jayu lhacôm'a na vatavtsateyish. ¡Pa lhacôm'a papi tsitenas'e na cotsjaat pa ve'lhaaesh atesha jayu ca chintif'e tatsha!