Oseas 1 - Nivaclé Bible

Lhpa lhch'acfa shi' papi lhcles pa Oseas

¹ Nôque lhfaclech'em pa Lhcaanvacle ti yiyôjiesha ja Oseas, lhaôs ja Beeri, jan t'aplhuqu'e ja Uzías,*xa* ja Jotam,*xb* ja Acaz*xc* shi' ja Ezequías,*xd* ti lhanvaclesesh ja Judá, shi' ja Jeroboam,*xe* lhaôs ja Joás, lhanvacleesh ja Israel.

² Pa Lhcaanvacle pa nôque lhjunash ti tôlheshem'e pa lhfaclech'em ti yiyôjieshey ja Oseas: “Napi Israel lhavos apis ti lhavômechyish ti tayijop ts'ivee. Pa lhech ajunasha ca ajayaeesh lhpa ôcjeclô ninve'lhan, pa ôctsôyan lhpa lhech; pa nôque lhjunasha papi lhcles pa lhcleseesh lhpa ninve'lhan.”

³ Pa lhechesh ja Oseas lhjaya'esh lhja Gomer, lhôse ja Diblaim, lhjô lhech pa yituma pa caaj ja lhaôs.

⁴ Pa lhechesh pa yit'esha pa Lhcaanvacle ja Oseas: “Aqueyeesh Jezreel na taôvclaj, lhayaash ca chintaja apee jaclôyit jayu japi tôlhshaam na lhcaanvacle Jehú tôlh'ejop java niysisa ti yisnatesh'e ja Jezreel,*xf* pa lhech c'ôjat'e jayu na lhanvacleyash na Israel.

⁵ Pa lhech nalhu javômjatesha'ne jayu pa t'unaj japi c'afoquelhay Israel lhavos japi yiey ja tshimch'e yiey ja Jezreel.”

⁶ Vooy lhja Gomer pa ve'lheesh yituma shta pa caaj lhja lhôse. Vooy pa Lhcaanvacle yit'esha ja Oseas: “Istaa ca aqueyeesh Nichincavts'aclayesh, lhayaash ti tan jayu ca yicavts'aclayesh na lhanvacleyash napi Israel lhavos. Pa tanca yivômjatemch'e jayu.

⁷ Pa vena yijunashesh ti caaj jayu na yicavts'aclayjayash na lhanvacleyash na Judá: ya lhech, yivaatsha ya Lhcaanvacle ti lh'Diosyish pa c'alhjensha'ne jayu. Taj ti tanca yilhjenesh ca nitôôlhsha pa vatvatclônjayash, vooy ti tanca lhecha pava clutshes yeclôy nilhecha pava clesatas nilhecha pava cuvôyu shi' papi yi'apee.”*xg*

⁸ Ti vô'meshjop ti yifitsjan lhja Nichincavts'aclayesh, vooy lhja Gomer pa yituma shta pa caaj ja lhaôs.

⁹ Pa lhechesh pa yit'esha pa Lhcaanvacle ja Oseas: “Aqueyeesh Niychifasa t'ôyish'e, lhayaash avaatsheelh ti niychifaseelh'ash t'ôyish'e pa tanca a'Diosyisheelh t'ôyish'e.”

Pa chiyachajeyjop papi Israel lhavos

¹⁰ *xh* Ve'lha pa nalhu napi Israel lhavos ti lhjunashjulh jayu pa josôj yie' lhavôôj ja tovôc,*xi* pa ampapu ca isa'emjop ca natsjuulhshi. Pa chap'aclan ti yit'eshelh'aan: “Avaatsheelh tanca yichifaselh'ash t'ôyish'e”, ti yit'eshelh'a jayu pa Dios: “Avaatsheelh lhcleselh'ash na Dios nan mônlha.”*xj*

¹¹ Pa lhechesh pa yamelhvatsham jayu japi yi'shi' na Judá japi Israel lhavos, pa yive'lhan jayu pa lhanvacle ti yetôn, pa lhacôm'a papi nayie' ts'ivee ti tapecley'in jayu na Jerusalên. ¡Pa yaash jayu pa lhnalhu ja Jezreel!