Números 1 - Nivaclé Bible

Chiyitsjuulh papi Israel lhavos yiey lhpa Sinaí

¹ Pa vatjutsa' nalhu pa napu'eyshi jive'cla pa napu'eyshi nincôôp, ti meelh ti pitoj'e clee pa ve'lha nincôôp papi Israel lhavos ti tay'een pa Egipto, pa Lhcaanvacle yiyôjiesha pa Moisês ti yiey pa am'e pa'na pan lheyesh Sinaí, yiey pa Tsha'nuvo'esh ti Chivatvan'e pa Dios, ti yit'esha:

² “Asnateshjop pa t'ajuya ca chinatsjuulh lhacôm'a napi Israel lhavos,*xa* yiey pa lhpôc'ôcshamsha'ne shi' pat'ajôôjamsha'ne, ca jaspa chintôya pa lhey shi' pa t'ajôj'e lhacôm'a napi nivacle

³ papi veinte pava lhnincôpes pa natjuyeshey papi yaash, papi t'cajôyshayesh pa vatvatclônjayash. I'sesh'ejop ca chinasclanvatich'e pa c'afoquelhayesh, ca nefen ja Aarón

⁴ shi' pa chiyinvacleyanjop pa t'ajôôjamsha'ne yiey pa tc'acl'eshamsha'ne.

⁵ Navôque lheyis japi lhanvaclesesh ti yefen'ash jayu:*xa* “Yiey ja tc'a'sham ja Rubên: ja Elisur, lhaôs ja Sedeur.

⁶ “Yiey ja tc'a'sham ja Simeón: ja Selumiel, lhaôs ja Zurisadai.

⁷ “Yiey ja tc'a'sham ja Judá: ja Naasón, lhaôs ja Aminadab.

⁸ “Yiey ja tc'a'sham ja Isacar: ja Natanael, lhaôs ja Zuar.

⁹ “Yiey ja tc'a'sham ja Zabulón: ja Eliab, lhaôs ja Helón.

¹⁰ “Yiey japi tc'acl'eshamsha'ne japi lhcles ja Josê: ja Elisama, lhaôs ja Amiud, yiey ja tc'a'sham ja Efraín; shi' ja Gamaliel, lhaôs ja Pedasur, yiey ja tc'a'sham ja Manasês.

¹¹ “Yiey ja tc'a'sham ja Benjamín: ja Abidán, lhaôs ja Gedeoni.

¹² “Yiey ja tc'a'sham ja Dan: ja Ahiezer, lhaôs ja Amisadai.

¹³ “Yiey ja tc'a'sham ja Aser: ja Pagiel, lhaôs ja Ocrán.

¹⁴ “Yiey ja tc'a'sham ja Gad: ja Eliasaf, lhaôs ja Reuel.

¹⁵ “Yiey ja tc'a'sham ja Neftalí: ja Ahira, lhaôs ja Enán.”

¹⁶ Napuque lhanvaclesesh papi tc'acl'eshamsha'ne ti chiyt'acumeyshi papi lhtachifas Israel lhavos ti chinôclitjop papi yitsôt'ajesh lhpôc'ôcshamsha'ne.

^17-18 Pa vatjutsa' nalhu pa napu'eyshi jive'cla pa nincôôp, pa Moisês shi' pa Aarón pa tayelhvane papi lhech nivacle ti nifaclemch'e ti yinôôclhanita pa Dios, pa lhech lhjunashesh lhacôm'a papi lhchifas, ti chiyitsjuulh lhacôm'a papi Israel lhavos, pa yi'sesh'ejop ti yisclanvatich'e papi lhpôc'ôcshamsha'ne shi' papi t'ajôôjam pava ve'lhee ts'ivee lheyis papi lhech shi' pat'ajôôj yamvatsham papi nivacle veinte pava nincôpes ti yamja papi yaash pava lhnincôpes,

¹⁹ jan t'ônasheshem pa Lhcaanvacle pa Moisês ti yiyôjiesha. Côque ti chiyitsjuulh pa lhfanishesh ti yiey pa am'e pa'na lheyesh Sinaí.

^20-21 Ve'lheesh ti chiyitsjuulh pa tc'acl'eshamsha'ne, pa lhpôc'ôcshamsha'ne shi' pat'ajôôjamsha'ne, ti chiyi'sesh'ejop pava ve'lhee ts'ivee lheyis papi lhech shi' pat'ajôôj yamvatsham papi nivacle veinte pava lhnincôpes yamja papi yaash, pa nôque lhjunashch'e ti vacalhesh: Pa tc'a'sham pa Ruben, pa vatjutsa' lhaôs pa Israel, pa chiyitsjuulh papi cuarenta y seis mil quinientos papi nivacle tcajôysheyesh pa vatvatclônjayash.

^22-23 Pa tc'a'sham pa Simeón pa chiyitsjuulh papi cincuenta y nueve mil trescientos.

^24-25 Pa tc'a'sham pa Gad pa chiyitsjuulh papi cuarenta y cinco mil seiscientos cincuenta.

^26-27 Pa tc'a'sham pa Judá pa chiyitsjuulh papi setenta y cuatro mil seiscientos.

^28-29 Pa tc'a'sham pa Isacar pa chiyitsjuulh papi cincuenta y cuatro mil cuatrocientos.

^30-31 Pa tc'a'sham pa Zabulón pa chiyitsjuulh papi cincuenta y siete mil cuatrocientos.

^32-35 Papi lhcles pa Josê pa chiyitsjuulh papi cuarenta mil quinientos tô'lha pa tc'a'sham pa Efraín shi' papi treinta y dos mil doscientos tô'lha pa tc'asham pa Manasês.

^36-37 Pa tc'a'sham pa Benjamín pa chiyitsjuulh papi treinta y cinco mil cuatrocientos.

^38-39 Pa tc'a'sham pa Dan pa chiyitsjuulh papi sesenta y dos mil setecientos.

^40-41 Pa tc'a'sham pa Aser pa chiyitsjuulh cuarenta y un mil quinientos.

^42-43 Pa tc'a'sham pa Neftalí pa chiyitsjuulh papi cincuenta y tres mil cuatrocientos.

⁴⁴ Côque ti vacalhesh ti yitsjuulh pa Moisês shi' pa Aarón shi' papi doce lhanvaclesesh papi Israel lhavos ti chijuyjata papi tc'acl'eshamsha'ne shi' papi t'ajôôjamsha'ne:

⁴⁵ papi Israel lhavos papi veinte pava lhnicôpes pa yama papi yaash pava lhnincôpes ti tcajôyshayesh pa vatvatclônjayash,

⁴⁶ papi lhech seiscientos tres mil quinientos cincuenta pat'ajôôj yamvatsham.

Chiyetôneyshisha'ne papi levitas

⁴⁷ Vooy papi levitas nichinu'esham ti chiyitsjuulh pat'ajôôjamsha'ne papi lhacchevot'esh,

⁴⁸ lhayaash pa Lhcaanvacle ti lhech t'ônashesha pa Moisês:

⁴⁹ “Meelh ca atsjuulhtaj napi Israel lhavos, pa ya aj ca u'esham ca atsjulhesh napi lhech yiey ja tc'a'sham ja Leví.

⁵⁰ Vooy napi levitas isjop jayu ca ayôjiesha na vatcumjayash'e na is'ôcji lhtôvash yiey na chivatpeya'esh, lhacôm'a pava chiycheneshjop shi' pava chiyetônjop na is'ôcji lhtôvash. Napi lhech lhcumjayashesh jayu ca nichaajlhach'esha'ne jayu na is'ôcji lhtôvash shi' nava chiycheneshjop.Isjop jayu shta ca nasnateshjop pava lhatsha'nuvos yiey na lhavôjqu'e na is'ôcji lhtôvash.

⁵¹ Meelh ca natc'uytajesh ts'ivee vooy japi lhech pa nanclan'e na is'ôcji lhtôvash, pa yitsemajc'oya shta yiey pan t'ichay'e jayu. Lhacôm'a papi tavujuya ca shalhatajeema na is'ôcji lhtôvash, pa tanivalhchayesh jayu pa lhavafi.

⁵² Vooy jap'elh Israel lhavos pa namjop jayu pa t'ichavatjop ti c'afoquelhayesh, yiey pava yitsôt'ajesh ts'ivee t'ichavtesjop ti caaj pa yinôôclhanitsha sivôclôc lhayeech.

⁵³ Vooy napi levitas yamjatjop jayu pava lhatshatnuvos na is'ôcji lhtôvash ti yie' na chivatpeya'esh, pa vanujumatsenesh jayu, pa jaspa tanca suyaa na Lhcaanvacle napi Israel lhavos.”

⁵⁴ Vooy papi Israel lhavos pa yisnatesh lhacôm'a yiey pan t'ônasheshem pa Lhcaanvacle ti yiyôjiesha pa Moisês.