Jonás 1 - Nivaclé Bible

Pa Jonás yiclôtc'oya pa Dios

¹ Pa Lhcaanvacle yiyôjia ja Jonás,*xa* lhaôs ja Amitai, pa yit'esha:

² “Alhun, ca meey ja uj yitsaat Nínive ca achayemjulh ti jaclôyitsha'ne jayu, lhayaash ti namyi ti jape'ya ja uj lhav'ojiyash,”*xb*

³ Taj ti ja Jonás pa ninanc'ashamesh, pa yen ti yiclôtc'oya pa Lhcaanvacle, pa yichey ja Jope, jan chiy'eshiin java vatôvjatshiyis. Pa yivo'yey ti yu'jeey ca nôc lhja vatôvjatshi ti t'ajuyey ja Tarsis. Pa lhechesh pa tcashaya ja vatqu'isjayanachjop ti chiyshi' pa yi'shi' ti lhech t'ajuyeshi.

⁴ Taj ti pa Lhcaanvacle yivclanjatjop ja lhaviim ti ujesh ti factsejch'e, ti yamjey lhcachivat ja tovôc pa yinenjatchishamch'e pa lhavimitaj, pa nayachajshi lhja vatôvjatshi pa t'esheytaj ca nipôctesshisha'ne.

⁵ Vooy japi lhavosesh ujesh ti nijovayshi, pa ve'lha ts'ivee ti tôney'in pava lh'diosec. Pa nijooylhach'e ti yu'jam'in ja tovôc java chiyantajshi jaspa javôôvji. Lhan'e ja Jonás pa yiey ja shichaam lhja vatôvjatshi pa lhech'e ti yimô' ti nintôy'in.

⁶ Pa lhechesh ja lhanvacleesh pa yichey jan yie' ja Jonás, pa yit'esha: —¿She pa lhech lhasnatesh'e nijôtinôj? ¡Aneetsham pa ôney pa a'Dios! Ameesh ti yen ti naychavalhelh'yiy'in ca nitsilhjenelh.

⁷ Lhan'e, japi lhavosesh yit'eshvaneen ts'ivee: —Shtu'jelh cum jaspa ninôôclhaa pa yie' papi tameneshlhavach pa tavijatay. Pa yu'esh ts'ivee, pa lhech ja Jonás ti tamenlhavach.

⁸ Lhechesh pa yit'esha ts'ivee: —Anfacleelhyam pan lhayaash ti nacheelhyi nôque tavijatay. ¿She pa acumjayashesh ti nôque lhnachesh'e? ¿Pa ta lhtôôlhshi? ¿Ta jôque yi'shi' pa avtsateyish? ¿She papi ave'lheelhch'e?

⁹ Pa yit'esh ti yicuulh ja Jonás: —Yivaatsha ya hebreo, jaycumem'in pa Lhcaanvacle, pa Dios yiey pa vôôs, pan yivclanjat na tovôc shi' na cotsjaat.

^10-11 Ja Jonás pa nifaclemch'e japi lhavosesh ti yiclôtajc'oya pa Lhcaanvacle. C'oya japi lhech ti yipe'yeesh pa yi'van shta ja tovôc ti tatvaych'aclajshiin, pa ujesh ti nijovayshi ts'ivee pa niy'ôsesh'in shta: —¿Ta t'e lhayaash ti lhech afanishesh'avach cavôque? ¿She pa is'ejop ca yifanisheelh'ash jaspa cano'a na tovôc?

¹² —Atsu'elhsham na tovôc, pa cano'a jayu na tovôc —yit'esh ti yicuulh ja Jonás—. Tsitô'yishyivne ti ya'lhech ti jayc'amensha'ne ti tanu' na lhavimitaj.

¹³ Japi lhavosesh pa vaniyitajesh ti yicchatajc'oyaan ca shalhae'ma na cotsjaat, taj ti nincôôvjôcheshi ts'ivee, lhayaash ja tovôc ti yachajch'een lhayshivo.

¹⁴ Pa lhechesh pa tôneyjop pa Lhcaanvacle pa yit'esha ts'ivee: “Lhcaanvacle, ya aj ca asvômjateshelh pa tameneshlhavach nôque nivacle. Ca nintôôlhtajeeyjop pa'na, pa ya aj ca astsavalhjatelhshi pa lhavafi, lhayaash avaatsha, Lhcaanvacle, asnatesh yiey pan lhjunash ti lhen.”

¹⁵ Ti yit'esh'in côque, pa yu'jam ts'ivee ja Jonás ja tovôc, vooy ja tovôc pa cano.

¹⁶ C'oya ti yi'van japi lhavosesh, pa yamqu'een pa lhch'anjayasha ts'ivee pa Lhcaanvacle, pa yijutem java lhcufayjates ts'ivee shi' ti yisnateshjop pava lhfacjesem.

¹⁷ *xc* Lhan'e pa Lhcaanvacle pa yicaatjatc'oya pa sajech lhtata lhey lhavo' pa jaspa tim ja Jonás. Vooy ja Jonás pa yicheshch'e java pu'jana nalhus shi' pava tulhis ti mônlhach'e tasham pa sajech lhtata.*xd*