Joel 1 - Nivaclé Bible

Pava fanjay clap'afemch'e pava vatcavcalhjes

¹ Nôque lhcliish pa Lhcaanvacle ti yiyôjiesha ja Joel, lhaôs ja Petuel.

² Ach'anelhch'e jum navôque, napi nitaôvclasa, shi' shta avaatsheelh napi tsitenas'e na vatavtsateyish. ¿Nive'lhaaesh t'e ca avanelh'in pava nôque lhjunash? ¿Tanca avanshelh'in ca lhech lhjunasha jan t'aplhuqu'e japi anavot'elh?

³ Anfacle'lhem napi acleselh, vooy lhavaatsha ca nanfaclemch'e papi lhcles ts'ivee, papi lhech ca nanfacleem papi nijooylhach'e ca nanvat'astaj.

⁴ Pava ninama pava tinvos pa tifch'e' pava fanjay:*xa* pava ninama pava fanjay, pa tifch'e' pava jpônjas, vooy pava ninama pava jpônjas pa tifch'e' pav'elh tinvos.

⁵ ¡Avaatsheelh, netseselhsha'ne, anjat'o'elhch'esha'ne! ¡Apeelhvatsham'in, napi yiyôjisha'ne pa ôtjayetas t'i', lhayaash pa t'i' nava ôtjayetas ti chinjôclesh jayu!

⁶ Pava fanjay lhech papi acloj t'unis lhtachifas, lhtsevteniyashjulh pa jump'uvalhjetaj jan lhjunash pava lhcuvshinchey lhpa jump'uvalhjetache,*xb* ca nivaatfostajsham na yivtsateyish.

⁷ Ca nivômjatsha'ne java yivôtjayetacuy, ca nit'ovôseshch'e java yi'higocuy, ca nitôts'ôj lhacôm'a pa niclimiyanch'esha'ne java lht'oy.

⁸ Jan lhjunash lhpa nich'a nijayayu ti yip'in pa yuych'e lhpa lhtacshivoque, tôlh'ejop pa lhavafjayash pan vatpeya'tajelh.

⁹ Lhech lhjunash japi vatcasinôc ca naptajvatsham'in, lhayaash ti ampa jayu pava chiycavcalhesh nilhecha pa ôtjayetas t'i' ti yiey ja vatishjanjavat, ca nijutem pa Lhcaanvacle.

¹⁰ Java vatcac'ovtes pa clamamach'esha'ne; vooy na cotsjaat pa nôv'e' pa vatacshiyash. Pa nivôôm pa trigo, vooy java ôtjayetacuy pa clôjôjach'esha'ne, vooy java olivochat pa natpecvane ts'ivee.

¹¹ Avaatsheelh papu ca natcuumtajshiin pava lhcac'ovtes shi' pava ôtjayetacuy, pa apeshelh'in pa atacshinjayashelh, lhayaash ti vômji' pava lhu'tajelhch'e shi' pava vacalhtaj pa trigo shi' pava cebada.

¹² Pa clôjôjach'esha'ne pava ôtjayetacuy pa nivôôm shta pava higocuy. Clôjôjesha'ne shta pava lhey granados, pava ftsuuc, pava manzanacuy shi' lhacôm'a pava aacjuy yi'shi' pa joot. ¡Pa nôque lhjunash pa nac'oyesh pa lhshamitjayashtaj lhacôm'a papi nivacle!*xc*

¹³ Avaatsheelh, a'vatcasinôclelh, acumjat'eshelh java itôvtes, uyelhch'esha'nejop java p'ajavsha'ne pa apeshelh'in pa ôôytejelh'am, lhayaash na lhishjanjavat pa a'Dioselh ti palha ampava pa ca chicavcalhesh nilhecha pa ôtjayetas t'i' ca chincufa'yesh.

¹⁴ Ônelheyjop napi achifaselh ca ach'ayaneshelh'in pa vat'ayipcuyash; Pa atc'aeelh'evane na lhishjanjavat pa Lhcaanvacle a'Dioselh japi nitaôvclasa shi' lhacôm'a japi tsitenas'e na lhavtsateyish, pa etônelhjop pa Lhcaanvacle.

¹⁵ ¡Pa yijô, shalhajulh pa lhnalhu pa Lhcaanvacle! ¡Suyshi pa nalhu, ca shtanôjtajch'een ti tô'lha pan yaash pa tunaj!*xd*

¹⁶ Yiesh'e casjuyiish ti chinjôôcjooj na vatôc, pa lhech yôj'e' pa casc'usiyash yiey na lhishjanjavat pa cas'Dios.

¹⁷ Pava lhtôsjey lhocjisha'ne yiey java chiyu'taj'ech'e, pa vôôm pa trigo vooy pava vatequescheyc'oya pa yafalhch'esha'ne.

¹⁸ ¡Pa yeyshiyanch'e pava vôcôc! Cha'lheesh ti vo'tajeysha'ne pa yitjataj pava vôcôc; vooy pava tashinshtas pa vafsha'ne.

¹⁹ ¡Avaatsha jayôn'ay'ajop, Lhcaanvacle, lhayaash pa itôj yivutuyanch'e pa yitjataj yiey na am'e pa'na shi' pava aacjuy yi'shi' pa joot!

²⁰ ¡Lha'ma shta pava yaquisetes yalhanashch'een ti nôjô'ay'in, lhayaash ti yimch'esha'ne java tovjôy lhcles vooy na itôj yivutuyanch'e cava yitjatas.*xe*