Génesis 1 - Nivaclé Bible

Chiyivclanjat lhacôm'a

¹ Na tôlh'ejop lhacôm'a, pa Dios yivclanjat pa vôôs shi' na cotsjaat.

² Na cotsjaat niysasha'ne pa ca lhjunasha; tif'apee pa yinôôt, pa lhechesh pa lh'Espíritu pa Dios naacjut'a pa yinôôt.

³ Lhechesh pa yit'esh pa Dios: “¡Nicaaj pa nalhu!”*xa,xb* Pa caaj pa nalhu.

⁴ Ti yivan pa Dios pa nalhu ti tajulhey, pa yicatsônjat pa tjonshajayshi.

⁵ Pa yit'esha “nalhu”, vooy pa tjonshajayshi pa yit'esha “tulh”. Pa nôj ca vatjutsa' nalhu.

⁶ Naelhcha yit'esh pa Dios: “Nicaaj pa tanuvatc'oya ca nicatsônvatc'oya pa yinôôt, ca jaspa napu'asham pa ca nôv'e' pa yinôôt.” Pa nôque lhjunash.

⁷ Pa Dios tô'lha pa tanuvatc'oya ti yicôtsônjat pa yinôôt: pa ve'lha yi'shi' yitsha pa yinôôt ti lhecheshch'e ti chiycatsônjatesh, pa vooy paelh yichishamnee.

⁸ Pa lhqueyesh “nalhuyish”*xc* pa tanuvatc'oya. Côque ti nôj pa napu' nalhus.

⁹ Pa lhechesh pa yit'esh pa Dios: “Na yinôôt nan yiôcji na nalhuyish aven'esh pa ca vee, secl'esh ca chinvan pa clôjôj.” Pa lhech lhjunash.

¹⁰ Yiey pa clôjôj'e lhqueyesh pa Dios “cotsjaat”, pa vooy pa yie' pa yinôôt pa lhqueyesh “uj tovôc”. Ti yi'van pa Dios ti tajulhey pa lhjunash,

¹¹ pa yit'esh: “Nitôlh'e na cotsjaat lhacôm'a pa ca lhjunashtaja pava vatcôvjiyanchecuy: pa t'aclôôc caaj pava lhtôsjey, shi' pava aacjuy pavan tô'lha lhay.” Pa lhech lhjunash.

¹² Na cotsjaat tôlh'e lhacôm'a pa ti chiycôvjiyan'e: pa t'aclôôc pavan tô'lha pava lhtôsjey shi' pava aacjuy pavan tô'lha lhay.

¹³ Côque ti nôjeshch'e pa pu'jana pava nalhus.

^14-15 Pa lhechesh pa yit'esh pa Dios: “Nicaaj pava pjumtses yiey na nalhuyish ca nitujat'e na cotsjaat shi' ca nivenchatc'oya pa nalhu pa tulh, shi' ca natjuya ca chintôyesha pa nalhu, pava yincôpes pa shi' ca chinatsjulheshch'e nava nalhus t'ajuya ti chivatc'usinatesh'in.” Pa lhech lhjunash.

¹⁶ Pa Dios yisnatesh nava napu' ti tujey: na uj t'ajuya ti tujey ti nalhu, shi' na tiqu'in tujey ti tulh. Shi' shta nava catiis yisnatesh.

¹⁷ Pa Dios yan'e nava tujey yiey na nalhuyish ca nitujat'apee na cotsjaat

¹⁸ na nalhu shi' na tulh, ti yivenchatesh ti tujey pa tulh'e. Pa yi'van ti tajulhey pa lhjunash.

¹⁹ Côque ti nôjeshch'e pa yichatjulh pava nalhus.

²⁰ Pa lhechesh pa yit'esh pa Dios: “Nôvji' na yinôôt lhacôm'a pan t'ajôjesh pa lhjunash pava sajech, nicaaj shta pava ajôclôs ca nachajshiin na lhaviim yiey na cotsjaat.” Pa lhech lhjunash.

²¹ Pa Dios yivclanjat pava us tovjôy lhavos yi'shi' pa uj tovôc, tsich'em pa t'ajô'jesh pa lhjunash pava yi'shi' pa yinôôt, pa shi' lhacôm'a pa t'ajô'jesh pa lhjunash nava ajôclôs. Ti yi'van pa Dios ti tajulhey pa lhjunash.

²² Pa yit'eshem pa is lhjunash lhacôm'a pava yivclanjat, cavôque yit'esha: “A'vatclônatelh ca actsôôytajelh pa amelhch'een na uj tovôc, pa caaj jayu shta pava acloj ajôclôs tif'apee na cotsjaat.”

²³ Côque ti nôjeshch'e pa ve'lha nôjesh pava nalhus.

²⁴ Pa lhechesh pa yit'esh pa Dios: “Nôv'e' na cotsjaat lhacôm'a pa t'ajô'jesh pa lhjunash nava yaquisetes: nitôyicla shi' pava tôyic, shi' pava t'otayesh t'oot.” Pa lhech lhjunash.

²⁵ Pa Dios yisnatesh tsich'em navôque yaquisetes, pa yi'van ti tajulhey pa lhjunash.

²⁶ Pa lhechesh pa yit'eshlhatam pa Dios: “Nôqueesh shtasnatshelh pa nivacle. Pa casjunashajajulh jayu casvaatsha.*xd* Pa ya'sheshc'oya jayu pa t'unaj nava sajech, nava ajôclôs, nava yaquisetes nitô'yicla shi' nava tôyic, pa yash'apee jayu shta nava t'ota'yesh pa t'oot.”

²⁷ Meelh pa Dios ti yivclanjat pa nivacle, pa yijônlhach'e pa Dios lhavaatsha; pa nivacle shi' lhpa nivacche ti yivclanjat.*xe*

²⁸ Pa yijutem pa is ti yit'eshem:*xf* “Avatclônatelh, pa acloja papi acleselh; amelhch'een na cotsjaat pa ataanvacleyanshelh; a'shelhchishamc'oya nava sajech shi' nava ajôclôs, shi' shta lhacôm'a nava yaquisetes shi' nava t'ota'yesh pa t'oot.”

²⁹ Lhechesh pa yit'esha: “Ovalhelhey, avaatsheelh jajutelh'am lhacôm'a nava vatcôvjiyanchecuy yiey na cotsjaat navan tô'lha nava lhtôsjey shi' lhacôm'a nava aacjuy tô'lha nava lhay. Lhacôm'a navôque jayu ca chintuj.

³⁰ Taj ti lhacôm'a nava yaquisetes tôyic, nava tosis shi' nava ajôclôs jajutem nava t'aclôôc lhacôm'a ca lhôcleesh.” Pa lhech lhjunash,

³¹ pa Dios yi'van lhacôm'a pa t'ajôôj pava yisnatesh ti tajulhey. Côque ti nôjeshch'e pa ve'lhayama pava nalhus.