Filemón 1 - Nivaclé Bible

Pa Pablo yiisshem'e pa Filemón

¹ Yivaatsha, ya Pablo, chits'ôcfaapee ja Cristo Jesús. Avaatsha Filemón, javanqu'iselh'ay ja casvelh Timoteo, lhayaash ja yenach yiyôyjafaeshjop na vatcumjayash.

² Shi' japi lhtatvelhavot'esh ja iglesia japin tc'a'evane ja ajpôyich. Shi' shta lhja casvelhch'e Apia shi' ja Arquipo, jan catsits'aeshjop na vatshanjayash.*xa*

³ Jayeetajesh ca nicaajelh'am pava vatcufayjates shi' pa vatcanoyash tô'lha pa Catsitata Dios, nôquee ja Lhcaanvacle Jesucristo.

Pa lhencheyash shi' pa nilhcacujayasha pa Filemón

⁴ Yajatesh ti jajutey pa yishameesh pa yi'Dios ti jaychavalhey'ac'oya pa yalhjayash'in.

⁵ Lhayaash ti c'aya'esh pa encheyasha shi' pa niacacujayashaa ja Lhcaanvacle Jesús, shi' jant'ajôôj japi yitsôt'ajesh pa Dios.

⁶ Jaya'lhemey pa Dios japi lhnôyôjem pa niacacujayasha jaspa yitô'yish jayu jô pava vatcufayjates tô'lha ja Cristo Jesús.

⁷ Uj ti tsic'usinat'in pa ts'ishamesh'a pa encheyash, lhayaash ti lhc'usinat'in japi nicacujanjasa.

Vatants'aclanem pa Pablo pa lhancasha' lhey Onésimo

⁸ Lhe'naa ti isjopyam ti c'ayôjeesh'a pava ca asnatesh, lhayaash ti lhcachenachyish ja Cristo.

⁹ Tajulheyam ti jatants'aclanesh'a pa vatencheyash. Ya Pablo, palha niyataôvclaja, nôqueesh chits'ôcfaapee ja Cristo Jesús.

¹⁰ Jatants'aclaney'am na Onésimo, nan yô'seshjop pa nivatcacujayasha jôvelh'e lha vatvônc'ôcfajayte.

¹¹ Jeelh nalhu na Onésimo, ti acasheesh, ninatcajôyshay. Taj ti nôqueesh tcajôyshay pa lhajulhjatey pa jajulhjatey vitsha.

¹² Nôqueesh jachaj'ay na lhech. Pa istaa ca acuumjulh jan ajunashyish ti lhatcuumyijulh.

¹³ Jentaj yamsha ca mônlhaayijop, ca c'ancayôjatey cum ca nits'efenesh, ti jôjjeclay janôôcfa'apee cava Dios lhasinôc.

¹⁴ Taj ti niyit'esh ca yisnatesh navan niaclafeesh. Lhayaash ti sasjop ca jatants'aclanesh'a pava ca yiyôjeesh'a pava isis ti lhasnatesh. Tajulhey jô ti tôlh'atsham pava lhech.

¹⁵ Tajulhey ti tay'ajop clee na Onésimo jaelh nalhu, vooy nôqueesh vapec'ay jayu pa yajateesh ca nôv'ajop jayu,

¹⁶ ti palha nilhancashaa ti ya'sheshc'oya ti lhancasha': nan lhjunash pa vatvelh ti nichitsopeesh. Uj ti jen jô lhech, taj ti t'asheshyic'oya apee ti lhen. Taj ti tanca tsi'shaa jan lhjunash ti nivacle, nôqueesh avelheshjop jô ja Lhcaanvacle.

¹⁷ Nôque lhjunash ca anvelhayutajeshyijop pa nivatcacujayasha, pa acuumjulh yiey jan ajunashyish yivaatsha.

¹⁸ Ca nicaajtaj pava naclôquiesh, ja't'ajesha pava lhpiôc pa a'lhayijop.

¹⁹ Yivaatsha, ya Pablo, qu'isjayanesh'e na yipôcôt: Yijô' ti jashayanch'e jayu. ¡Lhama istajjop ca aychavalhch'e ti lhatpi'ôyishjop pa amônlhajayash!

²⁰ Yivelh, jatants'aclanesh'a ca asnateshyam cavôque, lhayaash ti naacacuesh ja Lhcaanvacle. Istaa ca ashamitjateshyam na yicachi', lhayaash ti casve'lhasham ja Cristo.

²¹ Qu'iisesh'eam navôque, lhayaash ti tsitô'ya ti lhanc'ashemesh jayu. Tsitô'yish shta ti t'ashjat'apee jayu nava jatants'aclanesh'a.

²² Taj ti nôqueesh atôtômjalheshyam pa ca atsan'e, lhayaash ti jalheclôjesh pa Dios ti nape'yeesh ti lht'a'lhelheyam, pa yivashanyam ti c'avanelh jayu.

Pa vat'aacjujunjayash shi' pa is vatnefenjayash yôj'esha'ne Yojesh'esha'ne ti chiyasinôqui'em na vat'aacjujunjayash

²³ Yecju'ay na Epafras nan chits'ôcfeelh'apee ja Cristo Jesús.*xc*

²⁴ Yecju'ay shta ja Marcos, shi' ja Aristarco, nôquee ja Demas shi' ja Lucas, jan tsenesh na yicumjayash.*xd* *xe* *xf* ,,,,

²⁵ Vooy ja cas Caanvacle Jesucristo tajulhey ca nijutelh'ay pa is. Amén.