Éxodo 1 - Nivaclé Bible

Pa lhanclôyitsjayash papi israelitas yiey pa Egipto

¹ Navôque lheyis papi israelitas papi yamelhey pa Jacob pa Egipto, ve'lhee ts'ivee pa t'ajô'jamsha'ne:

² Pa Rubên, pa Simeón, pa Leví, pa Judá,

³ pa Isacar, pa Zabulón, pa Benjamín,

⁴ pa Dan, pa Neftali, pa Gad shi' pa Aser.

⁵ Papi tôlhshaam pa Jacob yamvatsham pant'ajôôj setenta. Pa Josê apis ti yie' pa Egipto.*xa*

⁶ Pa Josê shi' papi lhcheclavot, pa lhacôm'a ti vafsha'ne.

⁷ Taj ti nôque lhjunash papi israelitas caaj papi acloj lhcles pa yamey ti uj ti t'unvatsham'in. Pa acloj'e pa lhavtsaat papi lhech.

⁸ Pa lhech t'aplhuqu'e ti caaj pa nich'a lhcaanvacle yiey pa Egipto. Pa lhech ninantôfa'clesh ca Josê. Pa yit'esha papi lhchifas:

⁹ “Ava, napi israelitas nôqueesh acloj pa yaashjac'oya casvaatsha.

¹⁰ Pa nôque lhjunash tajulhey ca nicaaj pa casfanisheesh ca jaspa ya aj ca lhetipaa ca nivatclonat'e, lhayaash ti ameesh ca nicaaj pa vatvatclônjayash ca lhtsavot'eesh papi nicatsic'utsfasa ca shtavatclônelhsha'ne pa shinayjat'e jayu na catsivtsat.”*xb*

¹¹ Pa lhenaa papi egipcios ti yicaatjat papi lhavosesh ca jaspa niyôjiesha papi israelitas pa caclec lhcumjayash. Pa yisnatchiyinesh pava yitsates pa Pitón shi' pa Ramsês, pan yijuyjata pa faraón, lhcaanvacleesh pa Egipto, ti yan'ôcjiin pava vatcos.

¹² Taj ti c'oya ti ujesh ti chiycômcloqui pa jô' pa yijô' ti vatclônat'e. Pa nôque lhjunash papi egipcios ti uj ti caaj pa t'ajovayeem.

¹³ Papi egipcios yicômclôqui jum papi israelitas.

¹⁴ Pa yicômclôquiesh pa lhamônlhajayash ti yicumjat'e pa caclec vatcumjayash ti yisclanshi pa t'ôôlhshi shi' ti yisnatesh pava cotsjatis. Pa yisnatesh shta lhacôm'a pa vatcumjayash'e yiey pava vatcac'ovtes. Cavôque lhacôm'a chiyclôyitesh jumje papi israelitas.

¹⁵ Jô'tajesh pa lhcaanvacleesh pa Egipto ti tasinôyelh lhpa Sifra shi' lhpa Fúa, papin lhavoqueyesh ti yiclôvalhesh'in ti nicavat'as'in papi hebreas, pa yit'esha:

¹⁶ —Meelh ca aclôvalhtajeshelh napi hebreas ca nancavat'astaj pa ovalhelhsha'ne pa nich'a nivat'aj. Ca ôcjeclôtaja pa amônlhanitelh, taj vooy ca yitsuujtaja, ¡pa aclônelh!

¹⁷ E'ana jô papi lhavoqueyesh ti nijovayeshem pa Dios pa ninôfisjach'e pan t'ônashtajem pa lhcaanvacleesh pa Egipto, pa yimônlhanitsha'ne shta papi taôvclas yitsjôy.

¹⁸ Pa lhechesh pa vooy pa lhcaanvacleesh pa Egipto vancacheney papi lhech ca nachey pa yit'esha: —¿Ta lhayaash t'em ti lhmônlhanitelhsha'ne papi yitsjôy taôvclas?

¹⁹ —Lhayaash japi ôcjeclôy hebreas nilhjunashajulh japi ôcjeclôy egipcias —yit'esh ts'ivee ti yicuulh—. Teya ti p'alha'in ti nicavat'as'in ti jôjjeclay ti yamelhey'in ca yiclôvalheshelh.

^20-21 Pa nôque lhjunash papi lhtachifas israelitas lhetipa ti vatclônat'e pa t'ajôôj. Pa yajatesh ti jô' pa yijô ti t'unvatsham'in. Jô'tajesh ti yiey pa lhjunash papi lhavoqueyesh ti caajem pa t'ijovayeem pa Dios, pa yefenesh pa lhech pa yijutem ti caaj papi acloj pant'ajôôjamsha'ne.

²² Pa lhan'e pa faraón pa yiyôjiesha lhacôm'a papi lhchifas: “U'elhsham ja tovôc lhacôm'a papi yitsjôy taôvclas hebreos ca nanvat'astaj,*xc* taj ti vooy papi ôcjeclôy amônlhanitelhsha'ne.”