Ester 1 - Nivaclé Bible

Pa lhc'usiyash pa lhcaanvacle Asuero

¹ Côque chiychayeshch'e pan yieshi pava lhnalhus pa Asuero*xa* ti lhcaanvacleeshjop pava ciento veintisiete chiyie' ts'ivee, ti tôlheshey pa India pa yamey pa Etiopía,

² ti yiesh'e pa lhanvacleyash yiey pa lhcachivat'eshi pa yitsaat yijôt'aj lhey Susa.

³ Pa nincôôp pu'janaeyshi ti lhcaanvacleesh, pa lhech lhcaanvacle Asuero pa yisnateshjop pa lhc'usiyash ti yisclaneshic'oya lhacôm'a papi lhcumjafas shi' papi tanefeneshelh pa lhanvacleyash, papi c'afoquelhay lhanvacles yiey pa Persia shi' pa Media, shi' papi chinvacleyansha'ne shi' shta papi lhanvaclesesh pava chiyie' ts'ivee,

⁴ jô'taney ti nôclitem pava lhavanjas shi' pa t'unajesh pa lhanvacleyash, shi' ti yaash pa lhasnôycheyashesh pa t'unaj. Pa vatc'usiyash yicheshch'e ti yameshi lhcachivat pa nincôôp,

⁵ ti yameshch'e pa lhech pa lhcaanvacle pa yisnatesh shta peelh lhc'usiyash ti yicheshch'e pava napu'yama nalhus, yiesh'e pa clayôych'e pa lhcôvjiyanjavat pa lhajpôyich pa lhcaanvacle. Lhacôm'a papin yi'shi' pa yijôt'aj yitsaat Susa, papi chiyashjatchisham shi' papi a'lheesh ca chinashjat ti t'alhajop.

⁶ Pa clayôych'e chi'isinatesh pava isis sivôclôc lhayjey climsha'ne shi' pava yacutinlhiy, ti chiyiyitesh'e pava lhniyjôyesh vanisch'esha'ne, pa yinesh ts'ivee pava chamashisha'ne clesanilh clim, shi' ti yôcfeesha ts'ivee pava jpôychiteyesh pava isis utes lhey mármol. Yiney ts'ivee shta pava vatc'oovtes vayuyshi pa clesanilh cojiyaj shi' pa clim, vooy pa cotsjat'e yinesh pava chiyisnatesh utes isis, ti nôcshi' c'ayooyshi, ti clim shi' ti yacutshi.

⁷ Pava yiyôôj t'iyôjatshiyisesh pa clesanilh cojiyaj ti ve'lhee ts'ivee pa lhjunasha'ne, pa yaash pa ôtjayetas t'i', pan lhjunash ti tcufayesh pa lhcaanvacle.

⁸ Pa lhech lhjunash pa lhcaanvacle ti yiyôjiesha papi lhanvaclesesh pava lhtôvjasesh pa lhajpôyich, ti tanca niyôjiesha papu ca niyô'ji, vooy ti yive'lhan'e ts'ivee papi t'a'lha ca niyô'ji pava yen lhatam.

⁹ Pa vooy lhpa lhcaanvacche Vasti yisnatshem vitsha pa vatc'usiyash papi lhjayas papin t'alhey pa lhcaanvacle Asuero yiey pa lhajpôyich.

¹⁰ Pa napu'yama nalhu pa lhc'usiyash, pa lhcaanvacle uj ti nishamesh ti yiyô'ji pa ôtjayetas t'i', pa yicheney pa Mehumán, pa Bizta, pa Harbona, pa Bigta, pa Abagta, pa Zetar shi' pa Carcas, papi lhech napu'yama nivacle lhcafiyanjasesh,

¹¹ ca nachajey t'ajuyish lhpa lhcaanvacche Vasti ca nic'ôclechi pa lhanvaclevo, secl'esh papi lhchifas shi' papi chiyashjat ti chinvacleyansha'ne ca natamp'oyeshem pa lhasnôycheyash lhpa lhcaanvacche, lhayaash ti yijô' ti lhasnôyche.

¹² Taj ti lhpa lhcaanvacche pa tcavoyeshjulh ca nôfisjatemch'e pa lhayôjijat pa lhcaanvacle ti yiyôjitajesha papi nivacle lhcafiyanjas. Pa lhechesh pa lhcaanvacle pa yisuyiyan. Pa yamqu'een pa lhavôôc,

¹³ pa taniy'ôseshelh papi yitôyc'oya pa t'ônashch'e pava vatyôjijates, lhayaash ti yifayjanesh pa lhfanishesh pa lhcaanvacle ti vatpeya'shelh papi yitôyc'oya pava vatyôjijates shi' ti yivoyjateshch'e.

¹⁴ Papi lhech, yaash ti shalheelhvane pa lhcaanvacle, lhech pa Carsena, pa Setar, pa Admata, pa Tarsis, pa Meres, pa Marsena shi' pa Memucán, papi lhech napu'yama chiyashjatesh pa yitsaat Persia shi' pa Media, ti ve'lheelhsham ti lhcumjafasesh pa lhcaanvacle shi' ti yashjatesh pava yicumjatesh'in pa lhanvacleyashesh papi lhchifas.

¹⁵ Pa lhcaanvacle pa niy'ôsesh: —Ja t'ônashesh na vatyôjijat, ¿ta ca yifanisheesh lhja lhcaanvacche Vasti ti tôlh'ejop ti ninanc'ashamesh na jayôjitajesha ti jajuteyjop japi yicachenjasesh?

¹⁶ Pan yieyshi ts'ivee ti t'acuumjelh'in pa lhanvacleyash, lhech pa Memucán yit'esh ti yicuulh pa lhcaanvacle: —Lhja lhcaanvacche Vasti tan ca ve'lhaa'ey ti yiv'ojiyan na Yinvacle, vooy shta lhacôm'a napi chinvacleyansha'ne shi' shta lhacôm'a japi lhtachifas yiey java yie' ts'ivee na nash'e na lhcaanvacle Asuero.

¹⁷ Ja lhfanishlhavach lhja lhcaanvacche Vasti pa yitôôysha jayu lhacôm'a japi ôcjeclôy, côque tôlhesham jayu japi lhech ti tanca nivijatanjulh japi lhjayas, pa yit'esh'in jayu ts'ivee: ‘Na lhcaanvacle Asuero t'aalhtajey lhja lhcaanvacche Vasti, lhjô lhech pa tcavoyjulh ca nôquey’.

¹⁸ Japi lhjayas japi t'acuumjiin ja Persia shi' ja Media, pa yitôôysha jayu ja lhfanishlhavach lhja lhcaanvacche, pa nitasinôyshelh jayu nôqueesh japi lhjayas, côque tôlheemsham jayu ti vanapunsha'ne shi' ti ninc'usinatvatsham'in.

¹⁹ Pa lhe'naa, na Yinvacle ca najulhjatajey, ca chintôyeshvane peelh lhcaanvacle lhayôjijat, ca chini'seshi nav'elh vatyôjijatesjop japi Persia lhavos shi' japi Media lhavos, secl'esh ca nichinvômjateey:*xb* ‘Lhja lhcaanvacche Vasti nisa'jop jayu ca nôqueyshi t'ôyish'e na lhcaanvacle.’ Vooy na lheytajesh ti lhcaanvaccheesh pa chinjuteem jayu lhap'elh ôcjeclô yaash ti chiyôyesha.

²⁰ Na lhcaanvacle lhayôjijat isjop jayu ca nitô'ya nan tuc'a'ey na lhanvacleyash, pa lhech lhjunasha pa lhacôm'a papi ôcjeclôy pa nivijatanjulh jayu papi lhjayas, pa ca nôôvtaj'e papu.

²¹ Pan yen'ech'e pa Memucán pa yajulhjate'mey pa lhcaanvacle shi' papi ve'lheelhsham pa lhanvacleyash, vooy pa lhcaanvacle pa yisnateshch'e.

²² Pa yicheney ts'ivee pava lhqu'isjayanjas pava yie' ts'ivee ti yi'shi' pa lhanvacleyash, pa yi'sesh'e pa lhcliish shi' shta pava yitsôt'ajesh lhclishayesh yiey pava yie' ts'ivee shi' papi lhchifasesh pa lhanvacleyash, ti yiyôjiesha papi lhech papi lhjayas ts'ivee ti lhcaanvaclesesh yiey pava lhajpôyjey ca nasinôquielh pava ya'shesh ti tajulhe'mey.