Efesios 1 - Nivaclé Bible

Pa Pablo yiisshem'e papi lhtatvelhavot'esh pa iglesia yie' pa yitsaat Efeso

¹ Yivaatsha, ya Pablo, jatôôlhsha pa Dios ti lhcachenachyish ja Jesucristo. Qu'iisshem'e nôque yiqu'isjayanach japi yitsôt'ajesh pa Dios japin nincacuesh ja Cristo Jesús yie' ja yitsaat Efeso.*xa*

² Pa caajelh'am jayu pava vatcufayjates shi' pa vatcanoyash tô'lha pa Catsitata Dios shi' ja Lhcaanvacle Jesucristo.

Pava isis vatcufayjates tô'lha pa Cristo

³ Tajulhey ca shtôclôj pa Dios pa Lhtata ja cas Caanvacle Jesucristo. Lhayaash ti casve'lheelhsham ja Cristo, pa lhech shintisesh pava matas vatcufayjates tô'lhey pa vôôs.

⁴ Pa Dios vojooyshilhatam lhapesh ti jôjjeclay nichinasnatesh na cotsjaat tôlh'ejop ja Cristo. Lhayaash ti yeetajesh ti shinvisiyan ca ya aj pa ca natmenjooj jaspa shnôv'e' t'ajuyish.

⁵ Uj ti shinen, pa lhechesh pa t'apayjooyshi lhapesh jaspa lhclesjooj tôlh'ejop ja Jesucristo. Navôque yisnatesh tôlh'ejop java yen.

⁶ Nôquen lhayaash yajatesh ti shtôclôjesh pa Dios ti nô'yeshjoom. Cavôque shintisesh, lhayaash ti tôlh'ejop ti shnôôvjop ja lhenach Lhaôs.

⁷ Tôlh'ejop pa uj lhencheyash pa Dios, vafjoom ja Lhaôs, pa nitonsha'ne pava lhavoyey jaspa yivômjach'e java cassasch'esha'ne.*xb* *xc*

⁸ Nôclitjoom pa Dios pa lhencheyash ti uj, pa nijutjooy pa castôycheyashesh shi' pa cascajôysha.

⁹ Pa shintôychiyinesh pavan yen ninvôôtôya. Pa nôclitjoom shta pava yivaclhitsham pava vaclan jayu.

¹⁰ Yiclôvalhjop pa Dios pan yivaclhitsham jaspa lhjunashjulh jayu ca nôfisjatajch'e ca namtaj pa t'aplhu'. Pa Dios nayjateshva'ne pa t'unaj ja Cristo lhacôm'a pava matas yi'shi' pa vôôs shi' pava yie' na cotsjaat.,

¹¹ Pa Dios voeelhyishilhatam lhapesh, tôlh'ejop ti casve'lheelhsham ja Cristo. Pa jaspa javanelh pava yivenchatelhyam ti tsitisshelh. Lhacôm'a ti yôfisch'e pava yisnatesh ti tatômjalhesh pa Dios. Pa lhech yisnatesh lhacôm'a pavan tajulhe'mey.

¹² Ti nôque lhfanishelhyish, lhayaash ti javatjutsashelh ti jacafiyanelh ja Cristo. Tajulhey ti jôveelhshi jaspa chiyôclôjesh pa t'unaj pa Dios.

¹³ Pa achielh shta ti lhpe'yeelh pa ya'clishesh pa yijô'. Lhayaash ti nifaclelh'am pa vatnilhjenjayash. Nôqueesh naacacuelh ja Cristo pa lhôveelhjop jô lhech. Pa lhniisshelh ti yitsôt'ajelh'ash pa Dios tôlh'ejop pa Espíritu Santo pan chinfaclelh'am.*xd*

¹⁴ Pa Espíritu Santo chinôôy, lhayaash ti yijô' ti nôyôj jayu pa Dios pava yi'van. Nôyôjem jayu papi yitsôt'ajesh ca nivaclhitajesh ca nalhjentajsha'ne. Vaclan cavôque jaspa chiyôclôjesh pa t'unaj pa Dios.,

T'alhey pa Dios pa Pablo jaspa chiyjutey jayu pa lhcajôysha papi nicacujanjasa

¹⁵ Jaypeeycheyesh ti caajelh'am pa naacacujashelha ja Lhcaanvacle Jesús. Caajelh'am shta pa encheyashelhva'ne lhacôm'a papi yitsôt'ajesh pa Dios.

¹⁶ Nôquen lhayaash nivô'mesh ti jajutey na yishameelh'ash ti yajatesh ti jaya'lhelhey'am pa Dios.

¹⁷ Jayaalhshey pa lh'Dios ja cas Caanvacle Jesucristo, pan lhasnôyech Vatata, jaspa yijutelh'ay pa is acajôysheelh. Pa natôôyshelh jayu pava chiyifiich, pava nichintô'ya.

¹⁸ Jaya'lhelhey'am pa Dios jaspa nasclanelhch'eam pa aychavalhjayashelh. Pa lhecheesh pa natôôyshelh jayu pa acaclecleyashelh'in pa lhasnôyech'esh pa acôseeshelhshiin shta pava nôyôjem pa Dios papi yitsôt'ajesh.

¹⁹ Pa natôôyshelh jayu shta ti uj pa t'unaj pa Dios, nichinatsjulhey pa ca nôj'e'. Pa lhech t'acuumjotshiin, lhayaash ti niicacueshelh. Nôque vat'unaj nôclit pa Dios

²⁰ pa uj ti vaniyitjulh ti yinenjatchishamshi capi vafsha'ne ja Cristo. Pa lhechesh pa yiney lhfayish yiey pa vôôs.*xf*

²¹ Pa chiyajulhjat'apee lhacôm'a papi lhcaanvaclesesh na cotsjaat, shi' pa vatvacleyash shi' shta pa vat'unaj. Chiyan'apee shta lhacôm'a pava matas navôque nalhus shi' shta pava amc'oya nalhus.

²² Pa yinashjat'ôcji lhacôm'a pava matas java lhafoc ja Cristo. Pa vooy ja Cristo chiyjutey ja iglesia pa lhshatech'esh lhacôm'a.*xg*

²³ Pa vooy papi iglesia lhavos lhavu'vat'esh ja Cristo. Jô lhech chive'lhasham Cristo. Pa vooy ja Cristo vi'sesh lhacôm'a pava matas.,,