Daniel 1 - Nivaclé Bible

Pa tôlh'eshicham

¹ Jan t'ôplheeshch'e ti pu'janaesh ja nincôôp ti chinvacleyan ja Joacim, ti lhcaanvacleesh'e ja Judá, vooy ja Nabucodonosor, lhanvacle ja Babilonia pa yamey ja Jerusalên pa yamelhjop japi lhcavos ja yitsaat.*xa*

² Pa Lhcaanvacle yivashanem ja Nabucodonosor ti yash'apee ja Joacim, shi' shta ti yichajc'oya java acloj chiyjuyjata ja lhishjanjavat pa Dios. Vooy ja Nabucodonosor yicha'jey'in japi vanôôcfasha'ne yiey ja Babilonia, pa yan'ôcji java isis chiyvenchat t'ajuya ja vatishjanjavat jan yie' java lhdiosec;

³ jô'tajesh ti yiyôjiesha ja Aspenaz, lhanvacleesh japi t'acum'een ja lhajpôyich ja lhcaanvacle, ti vooyshi japi tôlhshaam japi Israel lhavos ti yinôôclhanitsha tatsha

⁴ ti yichaaj japi nich'acsha'ne isis, ti ampa ca sasee, pa tôôytsesesh pa tcajôyshayesh pava matas pa yitô'yish ti t'acum'een ja lhajpôyich ja lhcaanvacle. Japi lhech pa chiyeyjatsjanesh ja lhcliish shi' ja lhfanishlhavach japi caldeos.*xb*

⁵ Ja Nabucodonosor tayôjijaneshjop shta japi lhech nich'acsha'ne ca chinjutey'in pava nalhus pava yitsôt'ajesh lhacôs shi' pa ôtjayetas t'i' ca niyôjayanshiin ca nôqueshch'e java pu'jana nincôpes, vooy ca nitiftajeshch'e pa mônlhaaesh ca nicumjat'in.

Pa Daniel shi' papi t'iyôyjafas ti yiey pa lhajpôyich pa lhcaanvacle

⁶ Yi'shi' japi lhech nich'acsha'ne lhech ja Daniel, ja Ananías, ja Misael shi' ja Azarías, tô'lha japi t'ajôj'esham ja Judá.

⁷ Japi lhech yinich'anatshem java lheyis ja t'acum'een ja lhajpôyich ja lhcaanvacle: ja Daniel pa lhqueyesh Beltsasar; ja Ananías, pa lhqueyesh Sadrac; ja Misael, pa lhqueyesh Mesac; vooy ja Azarías, pa lhqueyesh Abed- nego.

⁸ Vooy ja Daniel pa yaychavalheshlhavne ca ya aj ca nivatsasinatesh pa lhôc shi' pa ôtjayetas t'i' yiyôjiin ja lhcaanvacle, pa t'aalhsha ja lhanvacleesh japi t'acum'een ja lhajpôyich ja lhcaanvacle ca ya aj ca nitôyôjijanesh pava vatcôs ca nivatsasinatesh.

⁹ Tôlha'jop pa Dios ja lhanvacleesh japi t'acum'een ja lhajpôyich ja lhcaanvacle ti yueshch'e ja Daniel,

¹⁰ taj ti pa yit'esha: —Tsijovaytajeshjulh ja yinvacle. Vooy lhavaatsha yit'eshyam ti tajulhey ca atujelh shi' ca ayô'elh, ca navantajelh ti naajunasheelhch'ejulh jap'elh nich'acsha'ne pa tôlhelh'atsham jayu ti nivalhyi ja lhcaanvacle ca nasclôn.

¹¹ Pa lhechesh ja Daniel pa tasinôyelh ja chiyclôvalhchiyinesh ja lhanvacleesh ti t'acum'een ja lhajpôyich ja lhcaanvacle, pa yiyôjiesha ca ninujumatsenesha ja Daniel, ja Ananías, ja Misael shi' ja Azarías, pa yit'esha:

¹² —Jatants'aclanesh'a ca ac'alhtanesh napuque acavos: ca ayôjijanshem ca nôqueshch'e pava napu'nôjesh nalhus ca anjuteelhyi ja tsi'shaa ca jatujelh pava chiycôvjiyan shi' ca tsi'shaa ca c'ayôelhshi pa yinôôt.

¹³ Ca chint'ôntajshi pava lhech nalhus pa asclôvalhelhjop pa lhjunash jap'elh nich'acsha'ne ti tuj ts'ivee pa lhôc ja lhcaanvacle, pa lhechesh pa asvaneelh pa yijunashelh.

¹⁴ Vooy ja chiyclôvalhchiyinesh pa yajulhjatey, pa yicheshch'e java napu'nôjesh nalhus ti yic'alhtanesha ts'ivee.

¹⁵ Vooy ti t'ônshi' java napu'nôjesh nalhus pa vena lhjunash ts'ivee ti isischisham shi' ti ya'sheshc'oya ti t'unvatsham'in lhacôm'a jap'elh nich'acsha'ne ti tuj pa lhôc ja lhcaanvacle.

¹⁶ Pa nôque lhjunashesh, jan yiclôvalh ti yichajch'een pa lhôc shi' pa ôtjayetas t'i' japin yen ti tuj shi' ti yiyô'ji, pa yijutch'e java chiycôvjiyan ti tuj.

¹⁷ Japi lhech yichatjulh nich'acsha'ne pa yijutem pa Dios pa lhtôycheyash shi' pa lhcajôysha ti yitôyc'oya lhacôm'a java nalhjunashvatc'oya chiyetônch'e. Jô'tajesh ja Daniel ti yitôyc'oya pa nash'e lhacôm'a pava nalhjunashvatc'oya ti yi'shi' vatôvaat shi' pava vatatsômatas.

¹⁸ C'oya ti yameyjop pa yetôn'ejop ja lhcaanvacle ti yinôôclhanita, pa jaspa chinchajey t'ajuyish japi nich'acsha'ne, vooy ja lhanvacleesh ja lhajpôyich ja lhcaanvacle pa yicha'jey t'ajuyish.

¹⁹ Ja lhcaanvacle pa yasinôqui japi lhech, pa lhacôm'a japi nich'acsha'ne pa nive'lhaa papu ca nivan ja lhcajunasheeshch'ejulh ja Daniel, ja Ananías, ja Misael shi' ja Azarías, pa lhe'naa ti yimônlhanitesh ti t'acu'mem'in ja lhcaanvacle.

²⁰ Lhacôm'a java yen ti yitô'ya shi' ti tcajôyshayesh, javan niy'ôsesh'in ja lhcaanvacle, pa napu'nôjesh jat'ajô'jesh java ya'sheshc'oya ti yitô'yish japi lhavcajôyshinjas shi' japi lhavitôyjesesh japin yi'shi' ja lhanvacleyash.

²¹ Vooy ja Daniel pa lhet lha yicheshi yamjey ja vatjutsa' lhnincôp'esh ti lhcaanvacleesh'e ja Ciro.*xc*