Amós 1 - Nivaclé Bible

Yisclanemch'e papi vatachifas nashch'e lhavôôj

¹ Navôque lhclishaya ja Amós, tashinshtaj lhavo'esh ti yie' ja cotsjaat Tecoa, ti tôlhesha pa Dios pa lhjunashch'e japi Israel lhavos, ti napu' java nincôpes amc'oya ti nayuuynayuych'e, jan t'aplhuqu'e ja Uzíaz,*ca* ti lhcaanvacleesh ja Judá, shi' ja Jeroboam,*xb* lhanvacleesh ja Israel.

² Meelh ja Lhcaanvacle ti yich'anjata pa t'ôjôj ti cu'yuyuyshi ti yiey lhja utiyuc Sión yiey ja Jerusalên,*xc* java yitjatas yiey na cotsjaat pa tapecvane ts'ivee ti clôjôjqu'een ja lhôtôj'e lhja utiyuc Carmelo.

³ Nôque yit'esh pa Lhcaanvacle: “Japi yie' ja Damasco*xd* yisnatesh'in pava lhav'ojinôc pa tanca vô'mesh jayu ca jaclôyitsha'ne; lhayaash ti yoflhiteshamsha'ne japi yiey ja Galaad*xe* ti yicheneshjop pa clesanilh.

⁴ Pa lhe'naa ti janapjunesh jayu ja lhajpôyich ja lhcaanvacle Hazael, pa lhech itôj pa yivutuyanch'e jayu java isis lhajpôyjey yiey ja Bet-hadad.*xf*

⁵ Yifayishjop jayu ca janc'at'ey java lhashic ja Damasco; pa javômjatshi jayu jan chinvacleyantaj'e yiey ja Bicat-avên shi' jan chinvacleyantajesh ja Bet-edên, vooy papi Siria lhavos chiychaj'in jayu ca chinôcfee ts'ivee ja Kir.”*xg* Lhech yit'esh pa Lhcaanvacle.

⁶ Nôque yit'esh pa Lhcaanvacle: “Japi yie' ja Gaza yisnatesh'in java lhav'ojinôc pa tanca vô'mesh jayu ca jaclôyitsha'ne; pa chinchaj'in ts'ivee ca lhancumteseesh lhacôm'a japi lhtachifas pa chincashaayshey'in yiey ja Edom ca lhancavosa'esh.*xh*

⁷ Pa lhe'naa ti janapjunsham jayu java vatashclôfjesjop ja Gaza, pa lhech itôj pa nivutuyanch'e java isis lhajpôyjey.

⁸ Pa javômjatshi jayu jan chinvacleyantaj'e ja Asdod shi' jan chinvacleyanesh ja Ascalón. ¡Lhacôm'a na yunaj pa jôquesha jayu ti jayjuyjulh ja Ecrón, pa jamjey ca janjoolhajatajesh japi filisteos*xi* ti jaclônsha'ne jayu!” Lhech yit'esh pa Lhcaanvacle.

⁹ Nôque yit'esh pa Lhcaanvacle: “Napi yie' na Tiro*xj* pa yisnatesh'in nava lhav'ojinôc pa tan jayu ca vô'mesh ti jaclôyitsha'ne; lhayaash ti yijutajop'in japi lhcumtes pa t'unaj ja Edom, pa lhacôm'a japi vatachifas japi caajtajem pa vatpeya'shelh japi lhavelhavot.

¹⁰ Pa lhe'naa ti janapjunsham jayu java vatashclôfjesjop ja Tiro, pa lhech itôj pa nivutuyanch'e jayu java isis lhajpôyjey.”

¹¹ Nôque yit'esh pa Lhcaanvacle: “Napi yie' na Edom*xk* yisnatesh'in nava lhav'ojinôc pa tan jayu ca vô'mesh ti jaclôyitsha'ne; pa nichaj'in java clesatas pa amem pa lhcavts'aclayjayash, ti nachanesha japi lhavelhavot Israel lhavos. Pa lhetlha na'shesh'e ts'ivee pa t'asuyi pa nint'ôsesha'ne pa lhcôntayash.

¹² Pa lhe'naa ti janapjunsham jayu na Temán, pa lhech itôj nivutuyanch'e jayu lhacôm'a java isis jpôyjey yiey ja Bosra.”

¹³ Nôque yit'esh pa Lhcaanvacle: “Napi yie' na Amón*xl* yisnatesh'in nava lhav'ojinôc pa tanca vô'mesh jayu ti jaclôyitsha'ne; lhayaash ti yen ti yashjatlhatam na lhcootsjat, pa yiseejshamsha'ne lhcachic japi ôcjeclô yitumasha'ne yie' ja cotsjaat Galaad.

¹⁴ Pa lhe'naa ti janapjunsham jayu na vatashclôfechjop ja Rabá, pa lhech itôj nivutuyansha'ne jayu java isis lhajpôyjey ti tônesh'apee ts'ivee pa vatvatclônjayash shi' ti cu'yuyuyshi pa nalhu ti lhavimitajesh.

¹⁵ Vooy na lhanvacle yichey jayu pa am'e pa'na, shi' lhacôm'a japi nivacle chiyashjat.” Lhech yit'esh pa Lhcaanvacle.