TAITAS 1 - DVRWQ PVVB

¹ Jisu Kristog xuqnam, Pwnbog nyera ak hoq galoqkv. Pwnbog xuqnam nyi tulug mwwjwnam ho bulam jvqtwngam la nyedar alwb nyil swwm dvb ngulug dormongv tomswrnam nwrba cwtam swwgam hingwnam pagoqkam, ngam tomswrl svka mvdwb xuqnum,

² Xaalyo maanbo Pwnbov, mwv ngulam kolwg moodv lengma daab nwrba cwtam hingw ho dvqgw dvb birwl apnam,

³ hoq mood jaqho mwv mwwg puiyam bekinnum, hoqgab soq pui sam ngam svtinum, hoo ngo soq sam ngulam ywwnbo ngulug Pwnbog gaml gab sam bekar dvn.

⁴ Ngoqg jvqtw ko tuup, ngulug mwwjwnam akinam mwwjwl swwnbo, Taitas gab ngo soq pota sam xeqg dvn. Ab Pwnbov la ngulam ywwt ywwnbo Jisu Kristo nulam anyangam la swrsomalongam jignvka.

Kwrit Diipho Taitaswg Bon Nyinam

⁵ Ngo nam Kwrit diipho bon nyis doonam mam nyingongam nyija mvdwb, ho nampam pvmx lo dvrwq namlongam kvvyw-tada bo nyiixa nyi loq xuqm dvb apaqnum. Ngoqg tomswrnam tulungam mwwgabto.

⁶ Dvrwq namlongam kvvyw-tada bo nyi akam soq sib nyinbo nyi loq xuqto, yolu doomabo, nywxw akin boonbo, mwwg ko tulungv mwwjwbo hoo yolu swcin dukar maanbo, nyiig benam mam tanbo nyiib nyinbov aldvn. Hoggab mwv Pwnbog bonam kaanbo nyiv.

⁷ Dvrwq namlongam kaaya bo nyi akv yolu swcin nyiib nyidwb nyima dvn; mwv hang lenga bo nyiib nyidwb nyima dvn, hvbmab atwg mwwkwb nyimab, opo twwxum bob nyimab, nyiam jwwkar pakarbob ho roogumbo nyiv almadwn.

⁸ Mwv nyiinam namho ayab svgagvrwq bo ho hognvkv aldvn ham aby bonbo nyiib nyidwb nyiky dvn, mwv atam hingkubl swwnbo, cwqnbo, dvrwqbo, hang dvrwqb mwwnbo hoo nyid mood jaqkam bon nyinbo nyiib swwdwb nyiky dvn.

⁹ Hoq nyi akv mwam tomswrnam hvbkalam mwv Pwnbog agam mam hengab lalal mwwjw dvb nyiky dvn, hoggab hoqhvk bvrwq gamlv mwwjw dvb la loodwb nyidwn. Soq sib nyib nyiloqkam mwv nyi asaqkam jvqtwngam tomswr nyodwb nyitayin hoo ham tanbo mwlwngam bulug nyimur kunam mam bulam kaakin nyotayin.

¹⁰ Hoggab nyuurub mwwnbo nyi tulungv bes maaiyam bel nyi tulungam vm mvvl xaalyo bo nyi tulungv vi yaanv Juhudi nyi tulug pengko hoqgv Juhudi dormongam apaqpel mwwjw bov.

¹¹ Hoggab bulam hvb bem maadwb bitur dvb nyikinpa, hoggab bulug imiq dvpar tulu gon pvrpwngam tomswr sv maaiyam tomswr banv hvnyw-harwb nyil twngk paam gvdo ho nyicu-nyiya mvgdo.

¹² Bulug Kwrit nyi akgon nyiqry kaanbov mwv benum, “Kwritwg nyi tulungv looxiam xaalyo bov, almanbo svdinv, dvlam bov.”

¹³ Mwwg benam hv jvqtwngv. Hoqgab no bulam hindib mwwjwl swwm dvb, Juhudi tulug gonam tal,

¹⁴ jvqtwngam haqpaqbo nyia kog gamlam tal nyim mvma dvb vc alwb bulam biturto.

¹⁵ Dvrwqb nyil swwnbo nyi tulu gab hog mwlw luuxiv bulug gab dvrwqdvn; hvbmabde kacbo nyi gab la mwwjw maanbo nyi tulu gab hog mwlw luuxiv dvrwq maadwn, hoggab bulug hangv la mwwdynanv kacdvn.

¹⁶ Bulv bedwn ngulv Pwnboam cengdwn, hvbmabde bulug nyinamv Pwnboam bepa maadwn. Bulug bonam nyinamv oyum aldvb nyidwn hoo bulv benam tama dvn, hoo hog nyis tulungam albo akukam nyidwb kvtaq maadwn.