RUTH 1 - DVRWQ PVVB

Xwwmy Naomi

¹ Nyegam tulungv pvvb mvl doog yuk aalho gvdaho dwr ak wnum, hoo Juda gvdag Betleham hoqgv nyi ak, mwv la mwwg nywxwngv hoo mwwg ko tuup vnyiv Moab gvdab nyiogy wnum.

² ‍Nyi hoqg eminv Elimelek hoo mwwg nywxw hoqg eminv Naomi, hoo mwwg ko tuup vnyig eminv Maxlon la Kilion. Bulv Juda gvdag Betlehamg Epratas nyiingv. Bulv Moab gvdab wknv hoo hoqho bulv dooknum.

³ ‍Hvbmabde Elimelek, Naomig nyolv sileq kunum, hoo mwnwg ko tuup vnyiv mwnwg lvgab dootwq kunum.

⁴ ‍Bulv Moab nyem hoqgv nywxw naanum; nyem akwn hoqg eminv Orpa hoo akwn hoqg eminv Rut. Bulv hoqho vnyw nywyw svqtwqb doonum,

⁵ ‍hoo Maxlon la Kilion bunyi sinum, hoqgab dvn akam ko tuup vnyiv la mwnwg nyolv twrkub sileq kunum.

Rutwg Naominvn Tumab Nyinam

⁶ ‍Ho mwn mwnwg nyeexw vnyig lvgab Moab gvda hoqgv wkur dukub nyinum, hoggab mwn Moab rongo rwqtaq hoqgv At Sw mwwg nyi tulungam lvqc kunv bulam dvs-twwsam jipa ku hvl tapanum.

⁷ ‍Hoqgab mwnwg nyeexw vnyig lvgab dook nyook hoqgv mwn wrab kunum, hoo bulv Juda gvdab wdkub lamta ho wdul doonum.

⁸ ‍Hvbmabde Naomi mwnwg nyeexw vnyiam benum, “Nunyiv at-atwg annwg nammwb wkur nuku. At Sw nunyig lvgab anya jaqb lvqc gvnka, hoggab nunyiv sin boam la ngam anya jaqb kvvyw-tada paku.

⁹ ‍At Sw nunyiam nunyig nyol namho swrsol doonu dvb kaapa mvg nvka!” Ho mwn bunyiam moopupnum, hoo bulv sogoql xabnum.

¹⁰ ‍Hoo bunyiv mwnwn benum, “Ma, ngulv noqg lvgab noqg nyiilu dookub wkur ming tayin.”

¹¹ ‍Hvbmabde Naomi benum, “Ngoqg nyem ko vnyi, nunyiv wkur nuku; hoggab nunyiv ngoqg lvgab wmin gvtayin? Sija ngoqg kepo so ko tuupv doot laiyam nunyig nyolwb swwtayin?

¹² ‍Ngoqg nyem ko vnyi, nunyig lamtab wkur nuku, hoggab ngo vigo xox paku nyol ak boonyi kuram. Ngo mwwgwngv doodwn hvl ngo bel soi nyol ak naal hoo ko tuup atag doob nyiloqkam,

¹³ ‍bulv akamb swwnam gob nulv kaaya bviyv? Hoqgab nulv lokta nyol naak ram yv? Ma, hvbma, ngoqg nyem ko vnyi, hoggab soq si ngam kacaq bviyaq dvb mvpa ku, nunyig pagoq gab At Swg alaqkv ngam ceeko dvb laqlin paku.”

¹⁴ ‍Ho bulv lokta sogoql xabnum. Hoo Orpa mwnwg aiyam moopupnum, hvbmabde Rut mwnwn cegab tvl doonum.

¹⁵ ‍Hoo mwn benum, “Kaato, noqg nyeexw ajinv mwnwg nyiilu la mwnwg pwnbo tulu dookub wkur nukba; noqg nyeexw ajin lvgab wkur nuku.”

¹⁶ ‍Hvbmabde Rut benum, “Ngam noq galoqkv wleq tvk hvl bemabv ho nam wmin gvk yo hvl bemabv. Hoggab no hogloqb wtayin hoqb ngo wmin gvtayin, hoo hogloq ho no yubtayin hoqho ngo yubtayin. Noqg nyiilungv ngoqg nyiilungv, hoo noqg Pwnbov ngoqg Pwnbov.

¹⁷ ‍Hogloq ho no sitayin ngokam sitayin, hoo hoqho ngam liitayin. At Sw ngam soq sib nyis kujaqkam hvbmabde sinamv arongv ngam noqg hoqgv mvpin tayin.”

¹⁸ ‍Hoo hwdlo mwn Naomi lvgab wmin gvdwb tuuriqnam mam kaatwl, Naomi mwnwn hog bek maanum.

Naomi la Rut Bunyi Wkurnam

¹⁹ ‍Hoqgab vnyi Betleham ho wc maady deedib wknum. Hoo hwdlo bulv Betleham ho hvvc yukun, bopam ho vnyig haagam gab bopam bumpwngv hur-marab gob nyinum. Hoo nyem tulungv benum, “Soq si Naomi kui yv?”

²⁰ ‍Mwn bulam benum, “Ngam Naomi hvl goqmabv; ngam Mara hvl goqto, hoggab Mwlwngam koi yaanbo akv ngoqg lvgab kacaq bviyaq dvb bon nyipa ku.

²¹ ‍Ngo bwwr tvl soqgv lengnum, hoo At Sw ngam asar dvb so bookur paku. Hoggab ngam Naomi hvl goqdwn, hwdlo At Sw ngam ceekol pooka-yirka paku hoo Mwlwngam koi yaanbo akv ngoqg ao si nyem-nyol cim paku?”

²² ‍Hoqgab Naomi hookurnum, hoo mwnwg lvgab Moabg nyeexw Rut haamin gvnum, bulv Moab gvda hoqgv hookurnum. Hoo bulv Betleham ho tanyeq vly naarab tai moodho haanum.