ROMAN 1 - DVRWQ PVVB

¹ Pwnbov Mwwg Tugu puiyam bekar mvdwb xuqbnv goqnam Jisu Kristog nyera Poul galoqkv.

² Tugu puiyam kol otuq hoqgv Pwnbo mwwg nyiqry benbo tulungam birwl apnum hoo ham dvrwq potalo xeqnamv doodwn.

³ Soq si mwwg Ko tuup, ngulug At Jisu Kristo pagoqkv, mwv nyia kob nyil Debidg dvpar hoqgv ko hosiqb nyil mwam dwrbuqnum;

⁴ mwv Pwnbog dvrwqbo nyiib nyigam gab mwam Pwnbog Ko tuup hvl kaakin dvb xitor xilo atoram jinum, hoo sinam hoqgv turkur mvdwb jinum.

⁵ Mwam hentaql Pwnbov ngam Jisu Kristog nyerab swwm dvb hoo nyob mwlwngam, nyi tulungam Pwnboam mwwjwl bugil swwm dvb bon nyim dvb ngam xuqpan.

⁶ Roman hoqg doonbo nyi tulu, nulam kam Pwnbov Jisu Kristog nyiib swwm dvb bepan.

⁷ Hoqgab ngo nulam mwlwngam Roman ho doon boam Pwnbov aby banv mwwg nyiib swwm dvb goqnam nyi tulungam xeqg yin. Nulug Pwnbov la At Sw Jisu Kristo nyiam anyangam swrsomalongam jitka.

Poulwg Pwnboam Paqnam

⁸ Otuq jaqb ngo ngoqg Pwnboam Jisu Kristog emin gab nul mwlw gab paqdwn. Hoggab gvda gvtwg nyi mwlwngv nulug Jisu Kriston mwwjwnam puiyam tapa do.

⁹ Pwnbov ngoqg benam si jvqtwngv hvl ngoqg xumnam mwwg Ko tuupwg tugu pui bvrwqngam bekinam, Pwnbov, hvvky doodo. Pwnbov cengdwn ngo looxiam nam mwwpa dvn.

¹⁰ Swgwnam mwcw-mvtam nulam bepa dvn. Ngo Pwnboam kodwn, mwv ngam aya mwwpa gvdwl nulam wgdvl kaapa mvdwb kokwngam jit bvk hvl bedwn.

¹¹ Hoqgab ngo nulug lvgab yalwg hemp ponam mam pomin gvdwb mwwl nulam kvvnw aldo; ho nulam atorl swwm dvb mwwdwn.

¹² Ngoqg beta gvdwn si nul gvla ngoqg mwwjwngam haakam mvdwb, hoo ngoqg mwwjwngv nulam svka mins dvb betadvn.

¹³ Ngulug vbw-bor tulu nulv sam mwwgab tvka, ngo vigo otuqho nulam kaatab wdwb mwwrnum, hvbmabde lwxiam hog goma lo hog ak ngam ham nyim maab nyitub-nyic ak dookynum. Ngo nyob luusaq nyi tulug pengko hoqgv Jisun mwwjw dvb mvnam hvbkalam ngulug pengko hoqgv kam mwwjw mvdwb mwwdwn.

¹⁴ Ngoqg nyisv nyi mwlw gab cengnbo ge cengmabo ge, ho damn ge dama ge.

¹⁵ Hoqgab ngo Tugu Puiyam Roman ho doonbo nyi tulungam nulam bekin dvb mwwdwq aldvn.

At Tugu Puiywg Atornam

¹⁶ Ngo tugu pui gab hvnyw bos maadwn. Hoggab soq si Pwnbog mwwjwbo nyi tulu mwlwngam ywwnan atorv, otuqcob Juhudi ho Nyoodo nyiingam.

¹⁷ Hoggab Pwnbog tugu puiyv hoggub nyil nyiam mwwg lvgab nyil swwm dvb mwwdwn ham kaakin dvn. Soq si mwwjwko aro gab nyirab hoqgv nyinya namgob doodwn. Dvrwqbo potangv bedwn. Hiyv nyi akgon Pwnbog lvgab swwd nyiloqkam mwwg mwwjw ko-gab swwtayin.

Nyia Kog Nyimurnam

¹⁸ Pwnbog hang, lengnam ao gvda toloqgv nyic nyil nyi almab nyinbo ho nyic jvqtwngam cem mvmab betambo nyi mwlwg aoho ipoqnam mam kaakin do.

¹⁹ Pwnbov bulam laqm-baqm dvn hoggab Pwnbo pagoqkam nyiv cengk lamtangv kaadar al dvb nyidwn. Pwnbov mwv atv lamtangam kaadar dvb mwjnum.

²⁰ Pwnbov gvda gvt sam pwda yik hoqgv mwam kaapa lamanamv mwwg nwrba cwtam ator rvla mwwg dvrwqnam mam kaadar cekar dvb kaapanum. Nyiv Pwnbog pwnam mam kaatwl mwwjw dvb nyidwn. Hoqgab bulv bepaqko pagoq akukam dooma.

²¹ Bulv Pwnboam cengdwn, hvbmabde bulv mwam xidy paqdy sam mwam xima dvn ho mwam paqkam maadwn. Hvbmabde mwv bulug hang mwwnamv hog niqtuq doomab nyidkun ho bulug hang urangam kanv putw paqtwl doodkun.

²² Bulv bedwn, ngulv damn bov, hvbmabde bulv paca ngviya sulak.

²³ Hvbsujaqkam nywywngam sima bo Pwnboam xumab bulv nyi sin boam, pvtangam, sudum svram, ho tvb-tapeq kam kvvyw-tac dvb mvnam mam xumdwn.

²⁴ Nyi tulungv hoqhvb paca caagam gab Pwnbov bulam kac-kanyiaqbo bonam bulug hang mwwby kob nyim dvb bulam apaq kunum, ho bulv hvnyw-haram akwn akwn lvgab nyinum.

²⁵ Bulv Pwnbog jvqtw pagoqkam xaalyo gob kwly naadwn. Bulv nwrba gob paqdynam Pwnboam xumab, Pwnbog pwnam yaangam bulv xumnv hoqgab bon nyidwn; Amen.

²⁶ Hoqgab Pwnbov bulam hvnyw-har nyipanam hangam jinum. Nyemv nyegangam nyol naamab nyem orum yaangam nywxw-nyol naamin sunum.

²⁷ Hoq hvbkalam nyegangv nyem mam nvvnw maab nyega orum yaangam hvnyw-har doomab nywxw-nyol hvb nvvnw minsnum. Soq sib nyia kov hvnyw-har dookmab bulug pengko ho nyimin sunum, hoo hvb nyigam gab bulv laqm baqnum.

²⁸ Nyiv Pwnbog jvqtw gonam mwwgab maab hangho apdvb haqgam gab mwam sur nyiib hang baqm dvb jinum hoqgab bulv nyis maaiyam nyikar dvn.

²⁹ Bulug hang uraho nyic luuxy jvqtw maanv, almanv, kaabynamv, nyi mwnwnamv paateql doodwn. Bulug hang uraho kaaneqnamv, nyi mengnamv, paiyaq minsnamv, vm mvvnamv, nyi mwnwnam rooxo dvn. Bulv jebs-japeqdvn

³⁰ akwn akwnwg almanam puiyam bedwn, nyic nyik lamtangam nyic nyidwb vigo meekar dvn. Bulv bulug ann ab benam mam bugil tama dvn;

³¹ bulv mwwlaq maadwn; bulv bulug birwl apnam mam mwwgab maadwn, hoo bulv nyi asaqkam aya maadwn.

³² Bulv cengdwn Pwnbog pvvb lo hoqhvb nyil swwnbo nyi tulungv sidwb nyidwn. Hvbsujaqkam bulv soq sam toxa maajaqb nyidwn, ho asaq nyiam kam almadwb bulug lvgab nyicam loomin gvm do.