PILIPI 1 - DVRWQ PVVB

¹ Jisu Kristog nyera Poul la Timoti galoqkv Pilipi gvda lo doonbo Jisu Kriston mwwjwbo Pwnbog nyi tulu gab la dvrwq namlongam svka bo hoo nyig-wgbo nyi tulu gab-

² Ngulug Ab Pwnbo la At Sw Jisu Kristo nulam anyangam la swrsomalongam jignvka.

Poul Mwwg Pota Xeqnam mam Poory bo Tulu gab Swgwnam

³ Ngo nul mwlwg bvrwqngam mwwpa yukam ngo nul mwlw gab doonyig looxiam ngoq Pwnboam ngo paqdwn;

⁴ hoo ngo swgw gwwcw gwwtam bepa dvn. Ngo hemp alwb swgw dvn.

⁵ Hoggab nulv ngam tugu pui gab bon nyikho otuqjaq nyirab aljaq hoqgv svka kaarab banv sija godab svka pa.

⁶ Hoqgab ngo cengdwn nulug uraho albo bonam nyirabo Pwnbov Jisu Kristo hookurnam Aal nagub ham niqtuq nyilin gvg naadwb jiyi nvpv mwwdo.

⁷ Aalwg looxiam nulam ngoqg hang ura si mwwpa dvn hoo nulug pagoqkam ngo soq sib mwwpanam si aldo. Hoggab nul mwlwngv ngoqg lvgab ngam Pwnbov hognvkv jipa kun ham naabamnum. Ngo sija pvtwq uraso doojaqkam hoo otuqho Tugu Puiyam nyemaq daql ngo birwql yvdwkho nulv ngoqg nyemaqb daqmin gvnum.

⁸ Pwnbov cengdwn ngo hog hwdgo nulam jvqtw jaqb Jisu Kristog ayanam lvgab ayadvn ham Pwnbov kaabnv doodo.

⁹ Ngo nulgab soq sam swgw dvn, ngo xumdwn nulug abynamv meeg yaiya koi mvdwb, hoo hognvkv mwlw jaqkam alyadwn ham nulam jvqtw jaqb hindil,

¹⁰ mwlwngam alyanam mam xuql naam dvb mwwdwn, hoo kokwngam Jisu Kristog haad Aalam nulv hog mwlw dvrwq maanbo hoqgv aado lo dootayin.

¹¹ Nulug swwca lo jvqtw jaqb alboam jidy bov ho Pwnboam yuum dvb la paqdwb jidy bov Jisu Kristo arotwq.

Simab Doonamv Kristo gab

¹² Ngoqg vbw-bor tulu, nulam ngo cengm dvb mwwdo, hognvkv ngoqgab nyiknum hoq mwlw hv jvqtw jaqb Tugu Puiyam goopor mvdwb svka pakun.

¹³ Hoqhvb nyinam gab lvpw atwg nammam kaayal rvkil daqnbo rvkybo tulungv hoo nyi asaq mwlwngv ngo Jisu Kristog emin gab pvtwq uraso doodwn hvl cimpw nyiaknum, hoggab ngo Kristog nyerangv.

¹⁴ Ngoqg pvtwq uraso doonamv ngoqg vbw-bor tulu gon At Swn mwwjwl hingw mvdwb, hoo Tugu Puiyam bulam haakam alwb bos majaqb bekin mvdwb jipan.

¹⁵ Hvbsujaqkam nyi tuugin Jisu Kriston hang baqbnv hang pwsaqb baql mwwg puiyam bekin dvn. Hvbmabde nyi tuugin hind alwb mwwdy lalal Kristog puiyam bekin dvn.

¹⁶ Bulv soq sam nyinam si abynam gab nyidwn, hoggab bulv cengdwn Pwnbov ngam Tugu Puiyam nyemaq daql ceetor mvdwb xuqpan hvl cengdwn.

¹⁷ Hvbmabde nyi tuugin Kristog puiyam jvqtw jaqb mwwjw swwswl bekar maadwn, hvbmab hang baql atwg hang mwwnam mam xumtwq dvb bekar dvn, hoo ngo pvtwq uraso doode so ngam meegta hentwr hem dvb mwwl nyidwn.

¹⁸ Hvb nyisjaqkam hv alv! Hoq nyinam ham ngo hemp mwwpa do, hoggab alwb mwwl beg ge, korwb mwwl beg ge, hoggub nyilakam Kristog puiyam bekin pa. Ngo hvraqb hemp pokil dootayin.

¹⁹ Hoggab ngo cengdwn, nulv ngoqgab swgw ko-gab Jisu Kristog yalwg svkanam mam ngo kaapa tayin, hoo ngam tolin taikun.

²⁰ Hoggab ngoqg hang uralo mwwgabl hingwnamv ngo hoggub nyilakam ngoqg bon nyinbo tulungv hvraqb nyitayin, hvbmab nywywngam nyimab ngoqg bon bonam dooram, ngo haakam alwb ham nyitayin, ho doonyig looxiam sijaqkam turjaqkam haakam alwb nyil ngo vpv atv Kriston yuum dvb sitam sul nyitayin.

²¹ Swwnamv hognvkv? Ngoqg gab simab swwnamv Kristo gab alv, ho sib nyiloqkam ngoqgab alv.

²² Hvbmabde ngo simab doob nyiloqkam ngo meegta bon xinam go niqtuq nyilin dvb nyitayin, ho ngo hognvkam xuqstayin ham ngo cengma.

²³ Hvbmabde soq vnyig pengko so ngam nootul ap pa. Ngo soq swwg sam apaqpel Kristog lvgab doonw do, hoggab hoqhv soq mwlw sam alyadwn.

²⁴ Hvbmabde ngo simab doonamv nul mwlw gab alyatayin.

²⁵ Hoggab ngo jvqtw alwb hingw sudwn, ngo dootayin; ngo nul mwlwg lvgab doobal nulug mwwjwngam la hempam meegta koi mvdwb jitayin.

²⁶ Hoggab kokwngam ngo nulug dookub wl nulug lvgab lokta doomin gvk baloqkam nulv hog hwdgo ngam bel xitor yaagub Jisu Kristog tol hins yuk yv.

²⁷ Sija bes poot jaqg nulam beta gvdwn si, nulug swwnamv Kristog tugu puiyam benam hvbjaq niqtuq kvlwq dvb, ngo nulam wl kaas jaqkam hoo wl kama jaqkam nyidwb nyipa; nulv Tugu Puiyam mwwjwl biimab pagoq goqkinam lokub mwwnam akinam mwwl tuugab nyidwk hvl benam mam ngo tapa tayin.

²⁸ Nulam ceebio baqnbo nyemaq tulu gab nulv bos somabv, hvbmabde looxiam haakam alwb mwwto, hvbnyiba loqkam bulug sigv doodwn hvl cengtayin, hoggab Pwnbog galoqkv nulug mviyananv haatayin.

²⁹ Hoggab nulam Kriston mwwjw mwtwq dvb jima, hvbmabde mwwg gab nyelin dors henl hentwr henl mwwg bonam nyil swwm dvb kam jipan.

³⁰ Ngo sijakam otuq hoqg ngoqg nyob panam akinam podul hvraqb doodwn ham nulv tapa do. Nulv kam ngoqg nyob pak so paba dvb nyipa.